Plattdeutsche Nachrichten Plattdüütsche Narichten vun'n 15. September 2022

Politik, Wirtschaft un Gewarkschaften snackt wegen keddelige Laag

Berlin: Bunnskanzler Scholz drapt sik hüüt to’n tweten Mal in’n Rahmen vun de so nöömten konzerteerten Akschoon mit Gewarkschaften un Arbeitgevers. Wegen de anstiegen Energiepriesen un de hogen Inflatschoon wüllt se doröver snacken, wat se tosamen dorgegen ünnernehmen wüllt. Dat eerste Drapen weer in’n Juli. An’n Namiddag wüllt se präsenteern, wat se nu utklamüstert hebbt.     

Swedens Regeern an’t Enn

Stockholm: Swedens Regerungsböverste Andaschon hett ehren Daalslag bi de Parlamentswahl togeven. Dat konservativ-rechte Lager hett woll en knappe Mehrheit kregen. As de Soziaaldemokratin säe, ward se dorüm as Ministerpräsidentsche ehren Hoot nehmen.    

Rekordversöök op Schienen

Bremführ: De Watergastoog „Coradia iLint“ vun dat Ünnernehmen Alstom is vun Bremführ ut to en Utfohrt dwars dör Düütschland losfohrt. Dorbi schall he en Rekord opstellen. De Brennstoffzellentoog schall mit eenmal optanken vun 250 Kilo Watergas en Streck vun mehr as dusend Kilometers bet na Möhldorf in Bayern trüchlegen. Noch nie is en Watergastoog mit eenmal optanken so wiet kamen.      

Afscheed vun de Queen

London: In de Nacht al hebbt Dusende vun Minschen in’t britsche Parlament Afscheed vun Königin Elisabeth nahmen. Siet den fröhen Avend is ehr Sarg in de Westminster Hall öffentlich opstellt. Vör dat Huus töövt Minschen in en kilometerlangen Reeg. Dat Staatsbegrävnis vun de Queen ward an’n Maandag ween.    

Düütsche Bunnsliga-Teams verleert bi Champions League

Manchester: In de Football-Champions-League hebbt Dortmund un Leipzig an’n Avend ehre Speele verloren. De BVB hett 1 to 2 bi Manchester City verloren. RB Leipzig is mit 0 to 2 gegen Real Madrid ünnergahn. För de Sassen weer dat de twete Daalslag in’t twete Gruppenspeel.

Dat Weer

Un nu en Blick op dat Weer: In Bremerhaben un Deefholt 14, in Emmen un Leer 15, un in Bremen un Cuxhaben sünd dat opstünns 16 Graad. Hüüt Vörmiddag is dat dicht wulkig, un vun Tiet to Tiet fallt ok’n beten Regen. Later lockert dat vun de Noordsee her op. Blangen Sünnschien gifft dat aver ok noch enige Regenschuers, de vun de Küst in’t Binnenland treckt un besünners an’n Namiddag ok degter ween köönt. Dorto Temperaturen vun 17 bet 19 Graad. Ok in de Nacht is dat Weer mal so, mal so. Jümmer wedder treckt degte Regenschuers vun de Noordsee in’t Binnenland, hier un dor ok mit Gewidder bi 11 bet 8 Graad. Morgen geiht dat mit Schuerweer in den Dag. An’n Vörmiddag wiest sik de Sünn noch fakener twüschen de opstiegen Wulken, an’n Namiddag kummt se meist gor nich mehr dör. Ok de Regenschuers ward mehr un degter, to’n Deel ok mit Gewidder, besünners an de Küst. Dat Thermometer stiggt blots op 14 bet 17 Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.