Jetzt läuft:

Andreas Bourani Auf Anderen Wegen
  • Als nächstes läuft:

  • Um 15:01 Uhr läuft: Simple Minds Alive And Kicking
  • Jetzt läuft:

    Andreas Bourani Auf Anderen Wegen
  • Davor lief:

  • Um> 14:47 Uhr lief: Toto Georgy Porgy
  • Um> 14:44 Uhr lief: Vaya Con Dios Nah Neh Nah
  • Um> 14:37 Uhr lief: Of Monsters And Men Little Talks
  • Um> 14:33 Uhr lief: Gerry Rafferty Baker Street
  • Um> 14:25 Uhr lief: Duran Duran The Wild Boys
  • Um> 14:22 Uhr lief: Dermot Kennedy Power Over Me
  • Um> 14:19 Uhr lief: Abba Honey Honey
  • Um> 14:14 Uhr lief: Queen A Kind Of Magic
  • Um> 14:08 Uhr lief: Texas Lightning No No Never

Der Nachmittag mit Jörn Albrecht

Plattdeutsche Nachrichten Plattdüütsche Narichten vun'n 12. September 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 12. September 2022

Roop warrt luuter: Wiedere Waffen schüllt na de Ukraine levert warrn +++ Selenskyi geevt Russland de Schuld, dat de Stroom utfullen is +++ Handwark bekriddelt Börgergeld-Plaans +++ Schotten nehmt Afscheed vun de Queen +++ Metall-Tarifrunn fangt in Neddersassen an +++ Dat Weer

Bild: Radio Bremen

Informationen zum Audio

Roop warrt luuter: Wiedere Waffen schüllt na de Ukraine levert warrn

Berlin: Achteran dat unkrainsche Militär jümmer mehr Gegenden trüchgewinnen kunnt, wasst de Druck op de Bunnsregerung wiedere Panzer un Kanonen an de Ukraine to levern. FDP-Fachfro för Verdeffenderen Strack-Zimmermann verlangt an Morgen in de ARD, dat Düütschland bats op de Steed Kampfpanzer an dat Land levert. Man ok de Grönen-Baas Nouripour see in de Augsburger Allgemeen, dat he dorför is. All in de Regerung wussen, dat noch mehr mööglich is. Op graden Weg schüllt man nu ut den Bestand vun de Bunnswehr un vun de Industrie levern.

Selenskyi geevt Russland de Schuld, dat de Stroom utfullen is

Kiew: In wieden Deelen vun de Oostukraine weer güstern Avend de Stroom utfullen. Präsident Selenskyi twittert, de Gegenden Charkiw un Donezk weren meist ahn Stroom. De Börgermeister vun Charkiw see, dat Russland mit dat Scheten op de Infrastruktur trüchbetahlen will, wat de ukrainschen Suldaaten an Steeden wedder goot maakt hebbt – Selenskyi meent dat evenso. Maleschen mit Stroom un Waterversorgung gifft dat ok in annern Rebeeten vun de Ukraine.

Handwark bekriddelt Börgergeld-Plaans

Düsseldörp: De Zentraalverband vun dat düütsche Handwark bekriddelt dat Börgergeld. De Baas vun den Verband Wollseifer see to de Rheinischen Post, dat Geld sorgt dorför, dat Minschen de en lütten Lohn kriegen, weniger Motivatschoon hebbt, normal to arbeiden. Veel stellt sik denn de Fraag, woso gah ik morgens Klock söben na de Arbeit, wenn de Lüüd, de Börgergeld kriegen, dat sülvige op´n Konto hebbt. Dat Börgergeld schall in dat tokamen Johr Hartz 4, wat betnu gellt, aflösen. De Gesetzvörlag schall Middeweken in´t Kabinett op´n Weg brocht warrn.

Schotten nehmt Afscheed vun de Queen

Edinburgh: Achteran Königin Elisabeth de Tweete verleden Week sturven is, köönt vun hüüt af an de Minschen in Schottland Afscheed nehmen. De Liek vun de Königin warrt in en Troerprozeschion to de Saint-Giles-Kark föhrt un dor opbohrt. König Charles de Drütte, sien Fro Camilla un annere Liddmaaten vun dat Königshuus sünd bi den Gottesdeenst dorbi. Plaant is, dat morgen de Sarg na London brocht warrt.

Metall-Tarifrunn fangt in Neddersassen an

Hannober: In dat düütsche Weertschaftsfeld för Metall- un Elektro, fangt hüüt Namiddag dat Verhanneln över de Tarife an. Den Anfang maakt de Bezirk Neddersassen un Sassen-Anhalt. Tokiekers de en Oog dorop hebbt, reken mit vigelienschen Verhanneln. De IG Metall verlangt acht Perzent mehr Lohn – de Arbeitgever snackt dorgegen vun en Null-Runn, Grünnen sünd dorbi de afsünnerliche Opgaav för dat Weertschaftsfeld. In de Metall un Elektroindustrie arbeiden rund 3,8 Millioon Minschen.

Dat Weer

Un nu kiekt wi op dat Weer: In Bremen, Bremerhaben, Emm un Cuxhaben hebbt wi överall sessteihn Graad. Hüüt fangt de Daag meist wulkig mit en beten Sünnschien an, man dat is in´t Binnenland noch en beten frisch. Övern Dag wesseln sik Sünn un Wulken af un dat blifft dröög. An de Küst rullen an Avend dicke Wulkenfeller ran, liekers blifft dat meist dröög. Hüüt weiht en flauen Wind vun de süüd- bet süüdwesten Kant. Op de Eilannen stiggt dat Thermometer op 21 Graad un in´t Binnenland op 23 bet 24 Graad. In de Nacht warrn de Wulken in´t Binnenland eerst weniger, vun de Noordsee her warrn de denn aver mehr, na Middernacht pladdert dat denn. Bet an´n Morgen breet sik de Regen bet na Bremen un umto ut. Un dat denn bi 16 Graad op de Eilannen un 15 bet 14 Graad in´t Binnenland. Morgen trecken dicken Wulken övert Land, de denn ok Regen or Schuer mitbringen. An de Küst warrt dat an Namiddag drööger, af un an kickt dor denn ok de Sünn vörbi. Dat Thermometer schafft dat op 19 bet 22 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.