Jetzt läuft:

Duran Duran The Wild Boys
  • Jetzt läuft:

    Duran Duran The Wild Boys
  • Davor lief:

  • Um> 14:22 Uhr lief: Dermot Kennedy Power Over Me
  • Um> 14:19 Uhr lief: Abba Honey Honey
  • Um> 14:14 Uhr lief: Queen A Kind Of Magic
  • Um> 14:08 Uhr lief: Texas Lightning No No Never
  • Um> 14:05 Uhr lief: Jimmy Cliff You Can Get It If You Really Want
  • Um> 13:57 Uhr lief: Bon Jovi You Give Love A Bad Name
  • Um> 13:49 Uhr lief: Ozzy Osbourne Dreamer
  • Um> 13:47 Uhr lief: Shannon Let The Music Play
  • Um> 13:45 Uhr lief: Herman's Hermits No Milk Today

Der Nachmittag mit Jörn Albrecht

Plattdeutsche Nachrichten Plattdüütsche Narichten vun'n 12. August 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 12. August 2022

Schröder verklaagt Bunnsdag +++ RKI: Över de hööchsten Corona-Tallen rut +++ Atomenergiebehöörd: AKW Saporischschja is kene Gefohr +++ Bremen plaant Warmstuven för den Winter +++ Füerwehr in den Hoorz hett allens in’n Griff +++ Dat Weer

Bild: Radio Bremen

Informationen zum Audio

Schröder verklaagt Bunnsdag

Berlin: De fröhere Bunnskanzler Schröder verklaagt den Bunnsdag. He will, dat för em wedder en Kontor mit Mitarbeiders praat steiht. De Huusholts-Utschuss vun den Bunnsdag harr em düt Recht in’t Vörjohr wegnahmen. Schröder siene Afkaten seggt, dat weer nich na Recht un Gesetz. Wo Schröder mit Russlands Präsident Putin mackert, warrt he böös bekriddelt. De Huusholts-Utschuss harr aver rutstellt: Dat stickt dor nich achter.

RKI: Över de hööchsten Corona-Tallen rut

Berlin: Dat Robert-Koch-Institut seggt: De Sommer-Corona-Törn nimmt af. Verleden Week sünd de Krankentallen wedder kloor na ünnen gahn – överall in Düütschland un för jeedeen Öller. Ok müssen vunwegen Corona weniger Lüüd na’t Krankenhuus un weniger sünd doran storven. Opstunns verkloort Gesundheitsminister Lauterbach den Corona-Kurs för Harvst un Winter.

Atomenergiebehöörd: AKW Saporischschja is kene Gefohr

Nee York: Dat ukrainsche Atomkraftwark Saporischschja is opstunns kene Gefohr för de Sekerheit. Dat sä güstern Avend de Baas vun de Atomenergiebehöörd Grossi vör de Vereenten Natschonen. Dat kunn aver gau anners warrn. Russland hett dat AKW besett un nu tosekert: De internatschonalen Fachlüüd köönt dor rin. Russlands Botschafter Nebensja hett vörslaan: Noch düssen Maand kunnen se allens ankieken. Man dat de russschen Suldaten vörher dor aftreckt – dor warrt nix vun.

Bremen plaant Warmstuven för den Winter

Bremen: Schull in’n Winter Gas fehlen, will dat Land Bremen warme Noot-Quarteren inrichten. Dat hett Börgermester Bovenschulte in en „Spiegel“-Interview künnig maakt. In Bremen un Bremerhaven wüllt se so’n Quarteren in Hüüs inrichten, de dicht bi dat Feernwarms-Nett staht. Wo Energie so düer worrn is, verlangt de Börgermester ok: Mehr Last müss wegnahmen warrn vun Lüüd, de nich veel verdeent.

Füerwehr in den Hoorz hett allens in’n Griff

Wernigerode: Dicht bi Schierke hett in den Natschonalpark Hoorz de Wald brennt. De Landkreis Hoorz hett anseggt: Dat Füer is noch op 13 Hektoor. Noch sünd dor 200 Füerwehrlüüd bi’t Löschen. Güstern weer dat Füer twüschen Schierke un den Brocken in Gang kamen. Lüüd, de den Brocken besöcht harrn, hebbt se in Sekerheit bröcht. De Hoorzer Smallspoorbahnen fohrt nich mehr.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Bassen 23 Graad, in Weyerbarg sünd dat 24 Graad. Vundaag: Sünnschien un blauen Heven. Af un an maalt sik vun de Elv her en poor dünne Wulken in de Luft – un dröög blifft dat ok. Dat Thermometer krabbelt vun 27 Graad an de See bet op 29 bet 33 Graad in’t Binnenland. De Wind dorto weiht flau, över Dag ok en beten mehr, vun de oosten bet noordoosten Kant. Wohrschau: In‘n Wald kann dat licht Füer geven. Tokamen Nacht funkelt de Steerns, mit de een oder anner dünne Wulk dorbi. Dröög. Bi 19 bet 18 Graad op de Inseln un 15 bet 13 Graad in’t Binnenland. – Allerbeste Schangsen also, dat wi uns de Steernscheters vun de Perseiden bekieken köönt, ok wenn de meist vulle Maand teemlich veel Licht geven deit. Morgen: Sünnschien satt un dröög. Vun Middag op an: En poor opstiegen Wulken. An de See 26 bet 29 Graad, anners 31 bet 33 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.