Plattdeutsche Nachrichten Plattdüütsche Narichten vun'n 3. August 2022

Bartsch foddert Stopp bi de hogen Priese för Etensaken

Berlin – De Fraktschonsbaas vun de Linken, Bartsch, foddert, wat gegen de hogen Priese för Etensaken to daan. He sä, Ünnernehmen as Rewe, Edeka, Lidl or Aldi mööt ehr Verantwurten för de Sellschupp nakamen. Von de Bunnesregeern foddert Bartsch, de Mehrwertstüer op de wichtigst Etensaken to strieken.

Schipp mit Koorn ut de Ukraine ward kuntrulleert

Istanbul – Dat ukrainsche Koorn-Schipp „Razoni“ is in de Türkei ankamen. In’n Haben vun Istanbul ward dat Schipp hüüt ünner annern op Wapen kuntrulleert – erst achteran draff dat wieter in Richt Libanon fohrn. Dat is dat erste Schipp mit Koorn ut de Ukraine siet de Krieg anfungen hett. Dat Koorn ward besünners in Noordafrika orrig dull bruukt.

China antert op Pelosi-Besöök in Taiwan

Peking – China hett den US-amerikanschen Botschafter herbestellt. Darachter stickt de Besöök vun de US-Politikerin Pelosi in de demokratsche Inselrepublik Taiwan. Een Vertreder vun de chinesischen Böversten sä, de Reis weer nich to begriepen un he hett draut, dat dar wat nakummt. China kiekt Taiwan as een aftrünnig Provinz an un will, dat sik dar nümms inmengeleert.

Ampel eenigt sik woll op nee’et Infektschonsschutzgesett

Berlin – Nadat se över Weken verhannelt hett, hett sik de Ampelkoalitschon woll op een nee’et Infektschonsschutzgesett eenigt. Dat vermellt de Zeitungen vun de Funke-Mediengrupp. Mit Blick op den Harvst un de nöchste Corona-Well sä Bunnesgesundheitsminister Lauterbach, Dütschland wees praat. Wat nipp un nau in dat nee’e Gesett steiht, dat hett he man nich seggt.

Straafperzess na Drauen mit Moord

Ollenborg – De Polizeipräsident vun Ollenborg, Kühme, is een paar Mal mit Moord bedraut worrn - vun een, de sien Naam nich seggt hett. Man nu hebbt se een funnen, vun den se vermoden sünd, dat he dat weer. As de Ollenborger Polizei vermellt, hannelt sik dat üm een 55-jöhrigen Mann. Gegen em hebbt se een Straafperzess op’n Weg bröcht. Polizeipräsident Kühme harr sik toletzt mehr as eenmal öffentlich gegen Hass, Hissen un Rassismus stark maakt.

Dat Weer

Un nu een Blick op dat Weer: op Wangerooge 20, in Bremerhaven 23 un in Bremen un Deefholt sünd dat opstunns 26 Graad. Vundaag schient den helen Dag de Sünn, blots een paar dünne Wulken sünd an’n Heben to sehn – bi 26 Graad op de Eilanden un 29 bit 32 Graad in’t Binnenland; dat kann ok bruttig weern. Tokamen Nacht ward dat licht wulkig bit klaar, Regen fallt gar nich. Dat Thermometer sackt op 19 bit 15 Graad. Morrn schient bi dünnen Wulken lange de Sünn un Regen is erst nich in Sicht. To’n Abend hen treckt denn vun’t Ollenborger Münsterland mehr un mehr dicke Wulken op, de de ersten dullen Schuers un Grummelschuers bringt - bi 29 bit 35 Graad in’t Binnenland, an de Waterkant bi 25 bit 28 Graad. Dat weern de Narichten op Platt. Claudine Bimmermann hett se tohoopstellt. Op platt trechtmaakt un vörleest hett se Heidi Jürgens.