Plattdeutsche Nachrichten Plattdüütsche Narichten vun'n 2. August 2022

USA maakt Al Kaida-Baas Al-Sawahiri doot

Kabul: De Baas vun de Terror-Koppel Al Kaida, Al Sawahiri, is doot. De USA hebbt in de afghansche Hauptstadt Kabul ut Drohnen schaten, un dor is he bi to Dode kamen. Dat hett US-Präsident Biden bekannt maakt. En Spreker vun de Taliban hett seggt: Ja, Al-Sawahiri is doot, un dat weer en Schann. Dat he angrepen worrn is, dat weer gegen de internatschonalen Grundlagen. Al-Sawahiri harr de Rull vun Bin Laden övernahmen, he weer een vun de Mannslüüd achter de Terroranslääg op dat World Trade Center an den 11. September 2001.

Schipp mit Koorn ut de Ukraine kummt later

Istanbul: Dat eerste Schipp mit Koorn ut de Ukraine kummt woll wat later in de Törkei an. Dat törksche Verteidigungsministerium vermellt: Se rekent mit dat Schipp eerst tokamen Nacht. Woso dat so is, hebbt se nich seggt. Ehrgüstern harr dat Schipp in Odessa afleggt. An Boord sünd 26.000 Tunnen Koorn. In Istanbul schall dat Schipp unnersöcht warrn un denn na den Libanon wiederfohren.

Spanien will mehr Energie insporen

Madrid: Spanien gifft dor en Antwoort op, dat Energie knapp warrt. Dat Land will kloor mehr insporen. De Regerung vermellt: Dat gellt för all de öffentlichen Hüüs un ok för Bahnhööv un Flegerhavens. Denn aver ok för Kinos, Koophüüs un Arbeitssteden. Överall hier dröfft se in’n Winter blots bet 19 Graad inböten, in’n Sommer köhlt se nich ünner 27 Graad daal. Dat Inspoor-Paket gellt bet Harvst tokamen Johr.

Esens: Lütte Kinner ut Café utsparrt

Esens: In en Cafè in de oostfreesche Lüttstadt dröfft kene Kinner ünner 10 mehr rin. Se mööt buten op de Terrass blieven. De Mann, den dat Café tohöört, sä: Vele Öllern laat de Kinner maken, wat se wüllt. Överall gaht se tokehr oder beklackert de Dischen un Stöhl. „So löppt dat en poormal de Week. Ik müss dor nu en P vör setten“ – dat hett he op Twitter schreven. Enige Besökers vun dat Café finnt dat goot, annern nich. För den Kinnerschutzbund is dat „Diskrimineerung“.

DFB-Pokaal: Werder in de twete Runn

Cottbus: Werder Bremen steiht in de twete Runn vun den DFB-Pokaal. Güstern Avend hebbt se bi den Regionaal-Ligist Energie Cottbus mit 2:1 den Bavenhand hatt. In de twete Runn is ok Eintracht Frankfort. De hebbt 4:0 in Maideborg wunnen. Wiederkamen is ok Union Berlin mit 2:1 na de Extra-Tiet gegen den Chemnitzer FC. Un denn hett noch Darmstadt Ingolstadt mit 3:0 ünnerkregen.

Dat Weer

Un woans süht dat mit dat Weer umto ut? Opstunns hebbt wi in Bremerhaven 17 Graad, in Bremen, Bassen un Hu‘e sünd dat 18 Graad. Vundaag: Eerst Sünnschien mit ganz poor lütte Wulken. An’n Namiddag treckt vun de Ems her ok dichte Wulken ran, man wenn överhaupt, denn pladdert dat blots en beten an de Küst. Anners blifft dat dröög. Dat Thermometer krabbelt an de See op 24 Graad, in’t Binnenland op 26 bet 29 Graad. De Wind dorto weiht flau, na de Ems to ok en beten mehr, he dreiht över Dag vun de süüdoosten över de süüdwesten op de westen Kant. Tokamen Nacht funkelt de Steerns. Un dröög blifft ok. Bi 18 bet 14 Graad. Morgen: Sünnschien satt un dröög. Af un an maalt sik en poor dünne witte Wulken an den Heven. Op de Inseln 26 Graad, anners 28 bet 33 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.