Jetzt läuft:

Foreigner Cold As Ice
  • Als nächstes läuft:

  • Um 07:34 Uhr läuft: Men Without Hats The Safety Dance
  • Jetzt läuft:

    Foreigner Cold As Ice
  • Davor lief:

  • Um> 07:26 Uhr lief: Lisa Stansfield All Around The World
  • Um> 07:22 Uhr lief: Jupiter Jones Still
  • Um> 07:20 Uhr lief: Lesley Gore It's My Party
  • Um> 07:16 Uhr lief: Glenn Medeiros Nothing's Gonna Change My Love For You
  • Um> 07:11 Uhr lief: Bruce Springsteen The River
  • Um> 07:08 Uhr lief: Purple Disco Machine Feat. Sophie & The Giants Hypnotized
  • Um> 07:04 Uhr lief: Alphaville Big In Japan
  • Um> 06:55 Uhr lief: The Corrs What Can I Do
  • Um> 06:53 Uhr lief: Bob Dylan Blowin' In The Wind

Der Sonntag

Plattdeutsche Nachrichten Plattdüütsche Narichten vun'n 1. August 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 1. August 2022

Scholz graleert Footballspelerinnen – ok wenn se dat WM-Endspeel verloren hebbt +++ Baas vun Gesamtmetall: Rente eerst mit 70 +++ Baerbock fohrt na Atomkonferenz na Nee York +++ Hunnerte Lehrsteden in Bremen noch free +++ Lieutenant Uhura vun dat „Ruumschipp Enterprise“ is storven +++ Dat Weer

Bild: Radio Bremen

Informationen zum Audio

Scholz graleert Footballspelerinnen – ok wenn se dat WM-Endspeel verloren hebbt

London: Bunnskanzler Scholz hett de düütschen Footballerinnen den Rüch steilt, wo se dat WM-Endspeel mit 1:2 gegen England verloren hebbt. In de Umtreckkamer sä Scholz, de Froenslüüd harrn veel op de Been stellt un se kunnen stolt op sik ween. Vörher harr Scholz twittert: Dat weer weltklasse. Königin Elisabeth II hett de engelsche Mannschaft graleert, dat se över Düütschland de Bavenhand kregen hebbt. Eerst in de Extra-Tiet is dat 2:1 fullen. De düütschen Fans wüllt de Froenslüüd gegen Middag in Frankfort hoochleven laten.

Baas vun Gesamtmetall: Rente eerst mit 70

Berlin: De Baas vun den Arbeitgeververband Gesamtmetall, Wolf, hett seggt: De Rente mit 70 schall her. An de Funke Mediengrupp sä he: Wo de Minschen jümmers öller warrt, warrt ok de Last för de Sozial- un Rentenversekerung mehr un mehr. Dorüm sett he sik dorför in, dat de Rentenanfang pö a pö na baven sett warrt. De Sozialverbänn sünd bet nu jümmers dorgegen angahn. Opstunns gellt: De Rententiet warrt bet 2029 vun 65 op 67 hoochsett.

Baerbock fohrt na Atomkonferenz na Nee York

Berlin/Nee York: Bunnsbutenministersch Baerbock fohrt vundaag na en UNO-Kunferenz, de sik um den Atomwaffensparrverdrag dreiht. De Kuntrakt is de Grundlaag dorför, dat de Atomwaffen överall op de Welt afrüst warrt. Ok schall he dorför sorgen, dat nich noch mehr Staaten Atomwaffen in de Hand kriegt. Snacken wüllt se nu doröver, wat se dorvun in de verleden Johren ümsett hebbt. Fachlüüd taxeert: Op de Welt gifft dat sowat 13.000 Atomwaffen.

Hunnerte Lehrsteden in Bremen noch free

Bremen: Wo dat ne’e Lehrjohr anfangt, sünd in Bremen un Bremerhaven noch sowat 700 Lehrsteden free. De Bunnsagentur för Arbeit seggt: Dat sünd jümmers weniger Lüüd, de sik för en fre‘e Steed anmellt. Lehrlinge fehlt bi Krögers un Weertslüüd, man ok bi Versekerungen un Banken. Woso dat so is? – Mehr un mehr junge Lüüd studeert na de School, en Lehrtiet nehmt se nich op.

Lieutenant Uhura vun dat „Ruumschipp Enterprise“ is storven

Los Angeles: De US-Schauspelerin Nichelle Nichols leevt nich mehr. Ehr Familie hett seggt: Güstern is se in Silver City in New Mexiko dootbleven. Nichols is vör allen mit ehr Rull as Lieutenant Uhura in de Feernseh-Serie „Ruumschipp Enterprise“ bekannt worrn. Se hett för vele swatte Froenslüüd den Weg na Hollywood eenfacher maakt. Nichols is 89 worrn.

Dat Weer

Un woans süht dat mit dat Weer umto ut? Opstunns hebbt wi in Brevöör 16 Graad, in Bremen un Bremerhaven sünd dat 17 un in Möppen 18 Graad. Vundaag: Eerst vele Wulken mit en beten Sünnschien. An de Küst kriggt de Sünn gau de Bavenhand, man süüdlich vun Bremen kann dat hier un dor noch en Tietlang pladdern. An’n Namiddag un Avend lacht denn aver överall de Sünn, un de Wulken lööst sik op. Dat Thermometer krabbelt an de See op 19 Graad, in’t Binnenland 21 bet 23 Graad. De Wind dorto weiht flau oder en beten mehr vun de noordwesten Kant. Tokamen Nacht: Blots en poor Wulken oder gor kene. Gegen Morgen köönt vun de Noordsee her Wulken optrecken, dat blifft aver dröög. Bi 13 Graad op de Inseln un 10 bet 7 Graad in’t Binnenland. Morgen: Mal Sünnschien, mal Wulken, un de köönt an’n Namiddag un Avend vör allen an de Küst ok en beten Regen mitbringen. Dat warrt wedder warmer mit 24 bet 28 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.