Plattdeutsche Nachrichten Plattdüütsche Narichten vun'n 22. Juli 2022

Ukraine un Russland kamen övereens bi Koorn-Exporte

Istanbul. De Ukraine un Russland willt vundag en Afkamen för den Export vun Koorn ut de Havens an dat Swatten Meer ünnerschreven. Dorop sünd sick Vertreder ut beide Länner överens kamen. De Törkei un de Vereenten Natschonen hebbt dorbi vermittelt. Vörsehn is ünner annern, dat in Instanbul, de Schepen, de ut de Ukraine komen or dorhin fohren, in Istanbul döörsöcht weern. Dat schall to´n Bispill helpen, dat nich mit Waffen smuggelt warrt. In de ukrainisch Havens lagern twintig Milionen Tünnen Koorn, de nich in dat Utland levert weern könen, wiel de Havens siet den Anfang vun den Krieg dicht sünd.

Verkehrsünnernehmen willt 9-Euro-Ticket wieder lopen laten

Berlin. De Verband Düütsche Verkehrsünnernehmen is dorför dat negen Euro Ticket twee Maand wieder lopen to laten. Hauptbaas för de Geschäften Wolff snackt in de „Süddeutschen Zeitung“ vun en Övergangslösung. Börgerslüüd köönt so eerstmal ok in´n September un Oktober weniger utgeven. Wenn dat Ticket twee Maand wieder löppt, hett de Politik un dat Wirtschaftsfeld mehr Tiet, üm en Angebott op Duer uttoklamüüstern. De Verkehrsverband harr vörher op lange Sicht en Ticket för 69 Euro vörslaan, dat bunnswiet in Bussen un Bahnen gellt.

Kitas in de Stadt bremen kriegen mehr Geld

Bremen. De Kitas in de Stadt kriegen mehr Geld. In düsset Johr schöölt se 1,6 Millionen Euro mehr as Extra-Geld, för allens wat so brukt warrt, kriegen. In dat tokamen Johr sünd dat denn goot veer Millionen. Dat hett de Senat besluten. Mit dat Geld schall utglieken weern, dat veel in de verleden Johrn dürer wurren is. Ünner annern geiht dat üm dat Kita-Eten. Dat Extra-Geld för de Kitas sünd siet 2008 nich hoochsett wurren. De Kitas harrn dorüm bi dat Personal sport.

Booandrag för Schoolschipp Düütschland liggt op´n Disch

Bremerhaben. De Booandrag för dat Schoolschipp Düütschland is fardig. As de Noordseezeitung vermellt, hett de Vörsitter vun den Schoolschippvereen, Jäger, den Andrag nu op´n Disch leggt. Dat Schipp liggt al siet binah een Johr in den nejen Haven. Eerst döör Klagen vun Lüüd, de dor wahnt, weer opfullen, dat dorför en Verlööf vun dat Booamt nödig is. As dat Magistrat vermellt, stimmen de Behörden normalerwies binnen twölf Weken över süksen Andrag af.

Düütsche Football-Froenlüüd sünd ünner de letzten Veer

Football. Bi de Europameisterschaft sünd de Froenslüüd vun de düütsche Mannschaft ünner de letzten Veer. Dat DFB-Team wunn in London-Brentford gegen Österriek mit twee to null. In dat Speel ünner de letzten Veer mutt Düütschland gegen Frankriek or de Nedderlannen ran. Dat wordt wi morgen gewahr.

Dat Weer

Un nu noch en Blick op dat Weer: in Achim 20, an’n Bremer Flegerhaben un in Bremerhaben 16 un in Demorst sünd dat opstunns 19 Graad. Hüüt gifft dat en Wesselspeel ut langen mit velen Wulken un korten Afsnitten mit Sünnschien. An de Küst mehr Wulken. An´n Avend schafft dat de Sünn mehr döör de Wulken to kieken. De Wind weiht en beten. An de Küst dorgegen in Maten mit frischen starken Böen. Dat blifft dröög bi 18 bit 23 Graad. In de Nacht mal mehr, mal weniger Wulken bi Temperaturen vun thein bit 14 Graad. Morn fangt dat an de Küst mit en poor Wulken an. In dat Binnenland ehrder Sünnschien. An´n Namiddag dreiht sick dat üm. Dat blifft mehrstendeels dröög bi 19 bit 23 Graad. Sünndag kloor, af un an Wulken, aver dröög bi Temperaturen vun 24 bit 29 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.