Jetzt läuft:

Juanes La Camisa Negra
  • Jetzt läuft:

    Juanes La Camisa Negra
  • Davor lief:

  • Um> 23:50 Uhr lief: Electric Light Orchestra Mr. Blue Sky
  • Um> 23:45 Uhr lief: Toto Africa
  • Um> 23:41 Uhr lief: Lenny Kravitz Johnny Cash
  • Um> 23:37 Uhr lief: Tommy James & The Shondells Mony Mony
  • Um> 23:33 Uhr lief: Madonna Holiday
  • Um> 23:25 Uhr lief: Alphaville Sounds Like A Melody
  • Um> 23:21 Uhr lief: Seal Love's Divine
  • Um> 23:19 Uhr lief: Stills & Nash Crosby Just A Song Before I Go
  • Um> 23:15 Uhr lief: Murray Head One Night In Bangkok

Nachtprogramm

Plattdeutsche Nachrichten Plattdüütsche Narichten vun'n 5. Juli 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 5. Juli 2022

CDU bekriddelt wat bi dat Topp-Drepen vunwegen de anstiegen Priese rutkamen is +++ Polizei sett een Minschen na Scheten op US-Opmarsch fast +++ NATO ünnerschrifft de Protokolle över´t Mitmaken för Finnland un Sweden +++ Italiensche Regerung besluut den Nootstand, vunwegen dat böös dröög is +++ Swienspest: Vun hüüt af an gellen nee´e Oplagen för Bedrieve in dat Emsland +++ Dat Weer

Bild: Radio Bremen

Informationen zum Audio

CDU bekriddelt wat bi dat Topp-Drepen vunwegen de anstiegen Priese rutkamen is

Berlin: De Oppositschon bekriddelt dat nix bi de „konzentreerten Aktschoon“, as se dat nöömt, in dat Kanzleramt bi rutkamen is. Bunsskanzler Scholz hett sik güstern mi Vertredern vun Arbeitgevern, Gewarkschaften un Weertschopsverbännen besnackt, wat gegen de hooge Inflatschoon maakt warrn kann. CDU-Baas Merz see to den Senner „Welt“, Scholz weer jedeen Antwurt schullig bleven. Wo de Laag utsüht, is noch keen Utweg för de Maleschen. För Union-Fraktschoonsviez Spahn keem de Aktschoon al to laat. De Maleschen mit de Inflatschoon geev dat al siet Anfang vun düt Johr, see he in dat ZDF.

Polizei sett een Minschen na Scheten op US-Opmarsch fast

Highland Park: Achteran bi en Opmarsch in de Nöögde vun de US-Grootstadt Chicago scheten wurr un dor ok Minschen sturven sünd, is de Minsch, de dat woll daan hett, fastsett worrn. De Polizei maakt künnig, dat is een 22 Johr olen Kerl. Woso he dat doon hett, is noch nich kloor. He hett woll bi en Opmarsch to den USA-Natschonaalfierdag vun en Dack ut op en Barg Minschen schoten. Tominns sess Minschen sünd dorbi sturven, mehr as 20 sünd an Liev to schaden kamen.

NATO ünnerschrifft de Protokolle över´t Mitmaken för Finnland un Sweden

Brüssel: De Opnahm vun Sweden un Finnland in de Nato is nu en Stapp wieder. In dat Hauptquarteer vun de Allianz in Brüssel sünd just de nödigen Protokolle över dat Mitmaken ünnerschreven worrn. Dormit köönt den beid Länner an all Drepen vun de Militärmatschaft deelnehmen, man noch nich afstimmen. Dat de Länner ganz un gor bi de NATO mitmaken könnt, mutt noch vun all dartig Liddmaten afnickt warrn.

Italiensche Regerung besluut den Nootstand, vunwegen dat böös dröög is

Rom: In Noorden vun Italien is dat so böös dröög, dat Italien för fief Gegenden den Nootstand utropen hett. Dormit köönt de Behöörden nu ünner annern ok dat Water ratschoneern. De Nootstand gellt bet to dat Enn vun düt Johr. Dat markt in´ne Hauptsaak de Buern un ehre Acker rund um den Stroom Po umto. So böös dröög weer dat siet 70 Johr nich mehr. Städter as Pisa or Verona hebbt den Verbruk vun dat Water rünnersett, vunwegen dat överall so dröög is.

Swienspest: Vun hüüt af an gellen nee´e Oplagen för Bedrieve in dat Emsland

Emsbüren: Dormit de Afrikaansche Swienspest sik nich wieder utbreet, gellen vun hüüt af an nee´e Oplagen för Swiensbuern in den Kreis Emsland. Dat liggt doran, dat op en Bedriev in Büren de Deertensüük utbraken is. Rund um den Hoff umto warrt nu för 30 Daag ene Schutzzoon inricht. In düt Rebeet mööt de Swiens in den Stall blieven un dröfft ok nich woanners henbrocht warrn. Dat gellt nu för rund 250 Betrieve mit um un bi 200.000 Deerten.

Dat Weer

Un nu kiekt wi op dat Weer: In Bremerhaben sünd dat 17 Graad, in Bremen un Cuxhaben hebbt wi 18 Graad un in Deefholt sünd dat opstunns 19 Graad. Hüüt fangt de Dag mit lachen Sünnenschien, blots wenig Wulken un meist dröög an. Övern Dag sliekern sik hooge Wulken in´t Land de meist blots hier un dor en poor lütte Schuer daal schicken. Meist is dat fründlich un dröög. De Wind weiht flau bet in Maaten, an de See ok mal frisch un böig vun de westen bet noordwesten Kant. Dat Thermometer kladdert op negenteihn bet twintig Graad an de Küst un op 21 bet 23 Graad in´t Binnenland. In de Nacht lösen sik de Wulken op un wi köönt de Steerns blinkern sehen. Vun de Noordsee her trecken denn dicke Wulken op de an de Küst un in´t nöördliche Binnenland hier un dor en poor lütte Schuer in´ne Packelaasch hebbt. Un dat den bi 9 bet 14 Graad. Morgen fangt de Dag fründlich an, man laterhen wesseln sik Wulken un Sünn af, hier un dor gifft dat en poor Schuer, meist is dat aver dröög. An Namiddag un Avend hebbt de Wulken denn in de Düütschen Bucht de Nees vörn un in´n Verloop regent dat an de Küst mal mehr mal weniger. Dat Thermometer wiest us morgen 18 bet 21 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.