Plattdeutsche Nachrichten Plattdüütsche Narichten vun'n 28. Juni 2022

Attack op en Block mit Ladengeschäften in de Ukraine - Retters söökt wieder

Krementschuk: Achteran en Block mit Ladengeschäften in de zentraalukrainschen Stadt Krementschuk mit en Rakeet angrepen wurr, söökt de Rettungslüüd wiederhen na Minschen de överleeft hebbt. Bi de Attack sünd tominns 18 Minschen sturven. Wiedere 60 sünd böös an Lief to Schaden kamen, 40 Minschen sünd bet nu noch verschüüt. Dat Huus is in Flammen opgahn. De Staats- un Regerungsbaas bi dat G-7-Topp-Drepen verordelen de Attack un snackt vun en Kriegsverbreken. Ok de UN-Sekerheitsraat warrt sik mit düsse Luftattack ut´nannersetten. De Vertreder vun Russland nöömt den Angreep en Provokatschoon vun de Ukraine.

EU-Staaten snackt över dat „Ut“ för Verbrenner-Autos

Straßborg: De Umweltminister vun de EU snackt doröver of dat mööglich is, de Verbrennermotoren bi Neewagen af 2035 to verbeden. Dat EU-Parlament is dorför. De Liddmaten vun dat een or annere Land hebbt wat dorgegen. Wo de Bunnsregerung afstimmt is noch nich klor. Vunwegen de FDP heel un deel gegen en Verbott is, mutt sik Umweltministersch Lemke woll dor ruthalen, nix dorto to seggen warrt denn as „Ne“ utleggt.

Deerten-Afwehr-Sprei is Schuld doran, dat all rut mööt ut dat Klimahuus

Bremerhaben: En Deerten-Afwehr-Sprei weer de Utlöser, woso all Lüüd ut dat Klimahuus in Bremerhaben güstern Namiddag ruut mööt. Mehrere hunnert Minschen weren to de Tiet in dat Huus. De een or annere Besöker hett vunwegen jümehr Gesundheit klaagt, to´n Bispill Pien in´ne Ogen. De Polizei ünnersöcht totiets wer dat Middel in de Luft puust hett. 57 Minschen worrn vun Hölpslüüd betüdelt, söven mööt mit en Nootfallwagen in´t Krankenhuus.

Maskenplicht löppt bet August in Bus un Bahn wieder

Bremen: De Plicht in Bus un Bahn en Mask op Mund un Nees to setten löppt tominns bet Mitt August wieder, dorophen wurr de Coronaorder ännert. Dat mellt ok de Spreeker vun dat Gesundheitsressort Fuhrmann bi Buten un Binnen. An Steeden, wo sik Minschen opholen de besünners gau to Schaaden kamen köönt, so as in Krankenhüüs, Praxen un Pleeghüüs, gellt sogor en FFP-2-Maskenplicht.

Doder op Bremer Kraftwark-Flach funnen

Bremen: Op dat Flach vun dat SWB-Kraftwark in Bremen-Hastedt is güstern laat an Avend en Liek funnen worrn. Dat hannelt sik üm en Sekerheitsmitarbeider vun dat Kraftwark, see en Polizeispreker. Üm ruttofinnen wat dor passert is, hebbt Schandarms mit Maschinenpistool dat Flach vun dat Kraftwark in de Nacht wiet afsperrt. Henwies op en Verbreken gifft dat opstunns nich.

Dat Weer

Un nu kiekt wi op dat Weer: In Bremerhaben, Möppen un Emm hebbt wi överall 18 Graad, in Bremen sünd dat opstunns 19 Graad. Hüüt fangt de Dag meist överall mit lachen Sünnenschien an. Vun Middag af an seht wi hier un dor opstiegen Wulken, dat blifft aver dröög un de Sünn lacht wieder. De Wind weiht flau, an de Küst ok in Maaten un he dreiht vun de süüdwesten na de noorden Kant. Dat Thermometer kladdert op 20 bet 26 Graad. In de Nacht lösen sik de opstiegen Wulken gau op un wi seht de Steerns funkeln bi 16 bet 12 Graad. Morgen eerst fründlich, övern Namiddag trecken dicke Wulken op, de an Avend hier un dor Schuer un Gewidder bringen, op´n Poeng kann dat ok mal Starkregen geven, meist is de Dag aver fründlich un dröög. Dat Thermometer wiest us morgen an´ne Küst 22 bet 24 Graad un in´t Binnenland 25 bet 26 Graad.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.