Plattdeutsche Nachrichten Plattdüütsche Narichten vun'n 22. Juni 2022

De Eer bevert in Afghanistan: Mehr as 280 Minschen doot

Islamabad: In dat Grenzland twüschen Afghanistan un Pakistan hett de Eer bevert. De Behörden dor vermellt: In de Nacht sünd tominnst 280 Minschen to Dode kamen, noch 250 sünd verletzt worrn. Vele Hüüs in de oostafghaansche Provinz Paktika sünd twei. De Weert vun dat Bevern leeg bi sowat 6. Bet na de pakistaansche Hauptstadt Islamabad hen weer dat to marken.

Lindner: Op knappe Tieden inrichten

Berlin: Finanzminister Lindner wohrschaut: De Ukraine-Krieg kunn in de Wirtschaft bösen Schaden anrichten. In’t ZDF hett he vun en lange Tiet snackt mit Inflatschoon, Frachtwegen mit Löcker un hoge Priesen för Energie. En poor Weken oder Maanden noch, denn kunn Düütschland in en Laag kamen, de würklich bang maakt. Nu müss vör de Inflatschoon en P sett warrn. Vundaag snackt de Top-Lüüd vun de Koalitschoon doröver, wat se gegen de jümmers högeren Priesen maken köönt.

Lauterbach: Kene freen Coronatests mehr för all

Berlin: Wenn dat na Bunnsgesundheitsminister Lauterbach geiht, kriegt bald veel weniger Lüüd en freen Corona-Gautest. De ARD hett to weten kregen: Düsse Tests schüllt blots noch Lüüd kriegen mit Anteken vun de Krankheit un to’n Bispeel Froenslüüd, de en Kind kriegen schüllt, un lütte Kinner. Ok wenn een in’t Krankenhuus rinwill, schall dat nix kosten. Bremens Gesundheitsministersch Bernhard un ok Gesundheitsministerin Behrens vun Neddersassen wüllt, dat de Regel so blifft, as se is. Doröver snackt ok de Gesundheitsministers vun den Bund un vun de Länner, de gegen Middag in Maideborg tohoopkaamt.

Senat: Mehr Geld för dat Schippfohrtsmuseum

Bremen: De Senat hett noch mal um un bi 7 Millionen Euro för dat Schippfohrtsmuseum in Bremerhaven freegeven. Dat schall mithelpen, dat dat Museum sien Rang as Forschungsmuseum vun den Bund beholen kann. Dorför mööt se aver ok den „Bangert-Bo“ op Schick bringen. Dor wüllt se in tokamen Tieden de Utstellung op Duer wiesen. Dat Umboen weer aver verleden Johr en Barg dürer worrn, as se rutfunnen harrn, dat se gegen Füer nich goot afsekert weren.

Werder fangt mit Training an

Bremen: Werder Bremen maakt sik trecht för de ne’e Speeltiet in de Football-Bunnsliga. In de letzten Daag stünnen de Leistungsweerte op den Plaan. Vunnamiddag is Trainer Ole Werner mit sien Kru dat eerste Mal op den Platz. Mit dorbi sünd ok de neen Speler Amos Pieper un Dikeni Salifou. Sünnavend steiht dat eerste Testspeel an. In Veern speelt Werder gegen den VfB Ollenborg, de na de drüdde Liga opstegen is.

Dat Weer

Un woans süht dat mit dat Weer umto ut? Opstunns hebbt wi in Bremerhaven 16 Graad, in Emm sünd dat 17, in Rotenborg 18 un in Bremen 19 Graad. Vundaag: Veel Sunnschien, un dat warrt gau warm. An’n Namiddag kaamt en poor opstiegen Wulken dorto, dat blifft aver hell un kloor. Dat Thermometer krabbelt op 19 bet 26 Graad. De Wind dorto weiht flau, gegen Middag ok en beten mehr, vun de noorden bet noordwesten Kant. Tokamen Nacht blenkert de Steerns, blots an de See treckt en poor Wulken op. In’t Binnenland kann sik fröh an’n Morgen hier oder dor Dies un Daak utbillen. Dat blifft dröög bi 11 bet 8 Graad, an de See 13 Graad. Morgen: Sunnschien satt mit blots af un an mal en poor opstiegen Wulken. Dröög bi 27 bet 32 Graad, an de See 23 bet 26 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.