Plattdeutsche Nachrichten Plattdüütsche Narichten vun'n 7. Juni 2022

FDP is gegen Överwinnstüer

Berlin: De FDP is gegen de Afgaav vun den Gewinn bi Mineralöölfirmen, de vunwegen den Krieg bavento kaamt. Fraktschoonsbaas Dürr snackt in de Bild Bildzeitung vun en bannig slechten Instrument. De Koalitschoonspartner vun de Liberalen, SPD un Grööne, sünd för de „Överwinnstüer“ as se dat nöömt. Man ok de Linken un en Deel vun de Union sünd för socke Afgaven.

Johnson översteiht Misstroensvotum

London: De britsche Regerungsbaas Johnson blifft in sien Amt. He hett güstern Avend dat Misstroensvotum vun sien konservativen Fraktschoon överstahn. Den Gegenpart vun Johnson fehlten 32 Stimmen, üm em aftosetten. Achter de Fraag wat se em troet, sticken de Fiern in sien Regeerungssitt wieldess dat Corona-Slamassel un dat to de Tiet allens op Null sett wurr.

Bahn kummt woll nich mit dat 9-Euro-Billjet trecht

Berlin: Bi de Düütschen Bahn hett dat 9-Euro-Billjet an Pingsten woll för Maleschen sorgt. Per Dag geev dat um un bi 700 Henwiesen vun dat Bahn-Personal, man ok, wiel de Töög to vull weren, dat vermellt de Bedrievsraat. Dat weren düütlich mehr as an en normalen Wekenenn, maakt dat Redaktschoonsnetwark Düütschland künnig.

Nee´e Bremer Fahrradrood warrt dütlich dürer

Bremen: De Boe vun de neen Fahrradrood vun den Bremer Wall bet in de Neestadt warrt binah duppelt so düer as eegens plaant. Dat steiht in de Senaatsvörlag, de buten un binnen vörliggt. De Fachlüüd vun dat Boeressort rekent nu dormit, dat de Streek knapp acht Millioon Euro köst. Dorachter stickt, dat de Boekosten na baven kladdern, 90 Perzent vun dat wat bavento an Geld bruukt warrt, schall de Bund övernehmen.

Intendant Klaus Pierwoß is doot

Bremen: Klaus Pierwoß, de al lang Generaalintendant vun dat Bremer Theater weer, is doot. He starvt an Sünndag mit 79 Johren. Pierwoß hett dat Leit vun´t Theoter 13 Johr lang – bet to´n Sömmer 2007. To düsse Tiet wurr dat Veer-Sparten-Huus mehr as eenmal uttekent, man ok as „Opernhuus vun´t Johr“.

Dat Weer

Un nu kiekt wi op dat Weer: In Emm un Cuxhaben hebbt wi 13 Graad, in Bremerhaben 14 Graad un in Bremen sünd dat opstunns 15 Graad. Hüüt fangt de Dag stark wulkig an. Övern Dag mööt wi jümmer mal wedder mit Regen reken, meist an de Küst. An Namiddag seht wie ok mal de Sünn dör de Wulken kieken. De Wind weiht vun de süüdwesten bet westen Kant, an de See ok mal mit stöörmschen Böen. An Avend denn weniger Wind. Dat Thermometer krabbelt dorbi op 16 bet 20 Graad. In de Nacht meist blots en poor lose Wulken hier un dor seht wi ok de Steerns blinkern un dat blifft dröög. Na´n Morgen hen schickt us dat Emsland denn mehr wulken un dat bi 11 bet 7 Graad. Middeweken fangt de Dag eerst dröög un to´n Deel fründlich an, achteran trecken vun Ostfreesland un dat Emsland dicke Wulken op un denn pladdert dat ok noch. Dat Thermometer wiest us 19 bet 21 Graad.

Dat weren de Plattdüütschen Narichten. Tohoopstellt vun Claudine Bimmermann. Op Platt trechtmaakt un vörleest vun Martina Brünjes.