Jetzt läuft:

Genesis In Too Deep
  • Jetzt läuft:

    Genesis In Too Deep
  • Davor lief:

  • Um> 20:21 Uhr lief: Melissa Etheridge I'm No Angel Myself
  • Um> 20:16 Uhr lief: Leonard Cohen Suzanne
  • Um> 20:12 Uhr lief: Moon Martin Bad News
  • Um> 20:09 Uhr lief: Smokie Needles And Pins
  • Um> 20:05 Uhr lief: Whitney Houston I Wanna Dance With Somebody
  • Um> 19:56 Uhr lief: George Kranz Din Daa Daa (Trommeltanz)
  • Um> 19:51 Uhr lief: Bon Jovi Bed Of Roses
  • Um> 19:47 Uhr lief: Joan Baez Wozu Sind Kriege Da
  • Um> 19:42 Uhr lief: Paul McCartney It's So Easy

Der Abend mit Norbert Kuntze

Plattdeutsche Nachrichten Plattdüütsche Narichten vun'n 23. Mai 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 23. Mai 2022

Bunnesgesundheitsministerium reknet mit noch mehr Apenpocken-Fällen +++ Verkööp vun’n 9-Euro-Ticket fangt an +++ Bold woll Urdeel in’n ersten Kriegsverbreker-Perzess in Kiew +++ UNHCR: mehr as 100 Millionen Minschen dör Gewalt verdrieven +++ Putin dreept Lukaschenko in Sotschi +++ Dat Weer

Bild: Radio Bremen

Informationen zum Audio

Bunnesgesundheitsministerium reknet mit noch mehr Apenpocken-Fällen

Berlin – Dat Bunnesgesundheitsministerium reknet mit noch mehr Apenpocken-Fällen in Dütschland. Wegen de velen Kuntakte vun de Infizerten ward dat woll noch mehr Kranke geven, heet dat in een Bericht vun’n Gesundheitsutschuss vun’n Bunnesdag. Bit güstern Namiddag geev dat veer Infektschonen in Dütschland, vun de se seker weet – een in München un dree in Berlin. Middewiel sünd de Apenpocken een Krankheit, de sik internatschonal utbreedt, heet dat in den Bericht wieter.

Verkööp vun’n 9-Euro-Ticket fangt an

Hannober/Bremen – Dat 9-Euro-Monatsticket för Bus un Bahn kann een nu all köpen, ok in Neddersassen un Bremen. De Tickets gellt vun’n 1. Juni an bit to’n Enn vun’n August un kost för de hele Tied 27 Euro. Reisende köönt dat Anbott bunneswiet in Bus un Bahn, de regional fohrt, nutzen. Köpen kann een dat Ticket överall, wo dat Fohrkorten gifft: an Schaltern, in Kunnenzentern un an Automaten.

Bold woll Urdeel in’n ersten Kriegsverbreker-Perzess in Kiew

Kiew – In’n ersten ukrainschen Kriegsverbreker-Perzess rekent se nu mit dat Urdeel gegen den russischen Suldaten, de anklaagt is. De 21-jöhrige harr vör Gericht utseggt, dat he op Befehl een 62-jöhrigen Börger daatschaten hett. De Staatsanwaltschupp hett för em as Straaf een Leven lang achter de Trallen beandragt. Sien Verteidiger will, dat he freesproken ward, wiel de Suldat op Befehl schaten hett.  

UNHCR: mehr as 100 Millionen Minschen dör Gewalt verdrieven

Genf – De Tall vun de Minschen, de dör Krieg un Terror ut ehr Heimat verdrieven worrn sünd, is op de hele Welt op mehr as 100 Millionen kladdert. Dat vermellt dat UN-Flüchtlings-Hölpswark UNHCR in Genf. De UN-Hoochkommissar för Flüchtlinge sä, de Tall wees een Rekord, den dat nie harr geven dörven. Striets mööt ahn Gewalt lööst un verhinnert weern.

Putin dreept Lukaschenko in Sotschi

Sotschi – Russlands Präsident Putin will sik mit den Machthebber vun Belarus, Lukaschenko, drepen. Darbi schall dat woll üm dat wietere Tohooparbeiten vun de beiden Länner in een so nöömten Unionsstaat gahn. Viellicht wüllt se ok Hand in Hand arbeiden bi Industrie-Ünnernehmen un bi de Raketenwetenschupp. Buterdem geiht dat üm den Ümslag vun belarusschen Waren in Habens vun Russland un den Boo vun een belarusschen Haben in de Nöögde vun St. Petersburg.

Dat Weer

Un nu een Blick op dat Weer: op Wangerooge 15, in Deefholt 16 un in Bremen un Bremerhaven sünd dat opstunns 18 Graad. Hüüt kummt na een fründlich Beginn vun Südwesten her to’n Namiddag hen een paar Schuers op - köönt ok Grummelschuers darbi ween. An’n Abend ward dat meist överall natt. Dat ward een beten warmer as toletzt bi 21 Graad op de Eilanden un 23 bit 25 Graad in’t Binnenland. Tokamen Nacht treckt dulle Schuers un Grummelschuers dör, later in de Nacht ward dat dröger. Dat Thermometer sackt op 14 bit 13 Graad. Morrn mal mehr, mal minner wulkig mit een paar Schuers. Orrig warm ward dat nich – mit 16 bit 19 Graad. Middeweken fangt de Dag fründlich an, denn fangt dat vun de Küst her an to pladdern bi 16 bit 19 Graad. Dat weern de Narichten op Platt. Carola Schwirblat hett se tohoopstellt. Op platt trechtmaakt un vörleest hett se Heidi Jürgens.