Plattdeutsche Nachrichten Plattdüütsche Narichten vun'n 16. Mai 2022

Werder Bremen fiert den Wedderopstieg in de 1. Footballbunnsliga

Bremen: Werder Bremen is trüch in de Football-Bunnsliga. De Kru harr güstern Namiddag in dat letzte Speel in de tweeten Liga vun düsse Speeltiet, gegen Regensborg mit 2 to 0 de Nees vörn. An Avend rullt de Mannschaft vun Trainer Ole Werner denn in en open Lastwagen över den Oosterdiek. In de Stadt hebbt de Frünnen vun Werder Bremen bet in den Morgen fiert.

CDU winnt Landdagswahl in Nordrhein-Westfalen

Düsseldörp: In Nordrhein-Westfalen harr de CDU bi de Landdagswahl de Nees vörn. En Koalitschion mi de FDP is nich mehr mööglich, vunwegen de so slecht afsneden hett. Wat för de SPD bi de Wahl rutsuert is, hett dat betnu noch nienich geven, un dormit lannt se op Platz twee. De Gröönen kunnen ehren Andeel an Stimm meist op dat Dreefache hoochsetten un gellen dormit as „Tung an´ne Waag“. Mööglich is nu en swatt-grööne Maatschaft, aver ok en Ampel-Koalitschoon ut SPD, Gröönen un FDP.

Schweden un Finnland beraden över en NATO- Andrag

Stockholm: In Schweden un Finnland seten hüüt de Parlamente tohoop, üm aftostimmen, of se bi de NATO mitmaken. Dat se „ja“ dorto seggt, gellt as seker, achterna de Sozialdemokraten vun all beid Länner de just regeeren, dorför sünd. Betnu sünd Finnland un Schweden sülvststännige Staaten.

Bremer CDU will sik op Toppkandidaaten fastleggen

Bremen: De Lannsvörstand vun de Bremer CDU will sik an Namiddag op en Toppkandidaaten för de tokamen Börgerschaftswahl fastleggen. Parteibaas Meyer-Heder warrt as dat utsüht Frank Imhoff vörslaan. In sien egen Partei meent de Liddmaten, dat de aktuelle Börgerschaftspräsident de gröötsten Schangsen hett.

Saison-Start in Bremer Baadeanstalten

Bremen: Dat West-Bad in Bremen Walle geevt hüüt as eerstet Freebad dat Start-Teken. Dat Slottparkbad, dat Stadionbad un dat Freebad in Blomendool wüllt nakamen, wenn dat Weer goot is. Rund um Bremen umto sünd de Badeanstalten to´n Deel al längst open.

Dat Weer

Un nu kiekt wi op dat Weer: In Cuxhaben hebbt wi fofteihn Graad, in Bremen un Bremerhaven sünd dat sessteihn Graad un in Deefholt sünd dat opstunns achteihn Graad. De Dag fangt meist mit lachen Sünnschien an. Vun Namiddag af an trecken düster Wulken vun dat Emsland ran, de to´n Deel kräftig Regenschuer un Gewidder mitbringt. Hier un dor ok mit Hagel, stöörmschen Böen un starken Regen. De Wind weiht in Maaten vun de oosten bet süüdoosten Kant, bi Blitz un Donnerslag weiht he för korte Tiet mit starken bet störmsche Böen, man ok Stormböen sünd mööglich. Dat Thermometer kladdert op 22 bet 28 Graad. In de Nacht treckt de kräftige Gewidderregen langsam na de Elv af, dorbi kann dat angahn, dat wi rusig Weer kriegt. Över Nacht warrn Regen un Gewidder vun´t Emsland her weniger un ok de Wulken warrn weniger. Un dat denn bi 14 bet 11 Graad. Dingsdag pladdert dat meist in oosten vun de Werser, dorgegen fangt de Dag in´t Werser-Ems-Rebeet fründlich un dröög an. An Namiddag rieten de Wulken överall op, Sünn un Wulken wesseln sik af, hier un dor en poor Regenschuer. Dorbi kladdert dat Thermometer denn op 21 bet 24 Graad.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.