Plattdeutsche Nachrichten Plattdüütsche Narichten vun'n 12. Mai 2022

Russland gaht scharper gegen westliche Energiebedrieven vör

Moskau: Russland hett gegen mehr as 30 Energiebedrieven in de EU, de USA un in Singapur Sanktionen utsproken. Op de List steiht ok Gazprom Germania. De düütsche Dochter vun den russ`schen Energiekonzern Gazprom steiht siet rund een Maant ünner de Kuntroll vun de Bundesnetzagentur. De Ünnernehmen, de betropen sünd, dröfft heel keen Geschäften mehr mit russ`sche Firmen maken. Wieldes hett Bunnswirtschaftsminister Habeck to de Wirtschaftsweek seggt, dat Düütschland all tokomen Winter mit denn russ`schen Gasstopp torechtkomen kann. Man dorför mööt de Spiekers vull sien.

Bunnsdag will Gesetz för weniger Stüern besluten

Berlin: De Bunnsdag will hütt wat vun de Last an Stüern nehmen in Milliardenhööchde besluten. Plaant is ok, den Grundfreebedrag bi de Inkamenstüer üm good 360 Euro na baven to setten. Ok dat Geld för Pendlers willt se hoch setten. Buterdem willt de Afornten eenen Tolsag, de op´n Stutz betahlt wordt, för Kinner ut Familien, de nix in de Melk to krömen hebbt. Plaant sünd 20 Euro mehr an staatliche Stütt.

Bunnswiet gaht ErzieherInnen wedder op de Straat

Bremen: Bunnswiet gaht hütt wedder de Anstellten, de de Gören grootmaakt op de Straat. Alleen in Bremen hett de Gewarkschaft ver.di an de 1.800 Mitarbeiders,vun de Kitas vun de Stadt, to Lawai för Wohrschau opropen. Vun Klock 11 an willt de Kita-Mitarbeiders un Öllern achter de Kusthalle to een Protestaktion tohoop kamen. De Gewarkschaften fordert, dat ehr Beruf mehr acht wordt. Ok verlangt se mehr Geld un ok, dat man sik mehr insett üm goode Fachlüüd uttobillen. Dat Verhanneln loppt al siet Februar, dat geiht denn tokomen Week in de drütte Runn.

Bremen will Service för instand setten vun elektroonsche Geräten utboen

Bremen: In den Kampf gegen den elektroonschen Schrott willt se in Bremen den Service för dat instand setten vun Geräten utboen. Dat hett de bremsche Börgerschaft besloten. De Senat schall nakieken, wo man in Bremen un Bremerhaben Zentren dorför inrichten kann, dor wo man ok good hen kummt. Tosamenarbeiden will man to´n Bispeel mit Handwarkers.

Bahn mutt streckwies köttere Züge insetten

Bremerhaben: Op enkelte Regionalstrecken vun de Bahn gifft dat upstünds köttere Züge, de blots mit veer Wagens ünnerwegens sünd. Vunwegen den Krieg in de Ukraine hett eene Firma, de Wagen-Raden in dat Land herstellt, dicht maakt. Bedropen is ok de Streck Bremerhaben– Hannover un Bremerhaben- Ossenbrüch.

Dat Weer

Un nu een Blick op dat Weer: in Bremerhaben 12,un in Leer, in Bremen un in Nienborg sünd dat opstünns 13 Graad. Hütt wesselt sik de Sünn un de Wulken af, hier un dor kann dat mal so´n beten pieseln, bi 16 bit 20 Graad. Tokamen Nacht is de Heven erst noch klar. Vun Middernacht an treckt denn dichte Wulkenfeller op. An de Küst kann dat mal so´n beten Regen geven, bi 11 bit 7 Graad. Morrn geiht dat mit dichte Wulken los. De lockert denn vun Middag an op. Hier un dor kummt denn ok mal Natt vun baven rünner. Erst regnet dat an de Küst, an´t Nomdag ok rundüm Bremen. De Temperaturen liggt bi 16 bit 20 Graad. Sünnavend gifft dat eenen Mix ut Sünnenschien un Wulken, man dat blifft dröge, bi 17 bit 22 Graad. Dat weren de Narichten op Platt. Tohoopstellt hett se Katrin Martens. Trechtmaakt un vörleest hett se Antje Kruppa.