Plattdeutsche Nachrichten Plattdüütsche Narichten vun'n 14. Januar 2022

Jümmer mehr Minschen steken sick mit Covid-19 an

Berlin. De Corona-Tallen in Düütschland sünd den drüdden Dag na´nanner op en nejen hööchsten Stand krabbelt. Dat Robert-Koch-Institut vermellt, dat bunnswiet mehr as 92-dusend neje Fallen an en Dag opschreven wurren. Dat sünd binah 35-dusend mehr as vör een Week. De Söven-Dag-Inzidenz stiegt op den nejen Rekordweert vun goot 470.

Jümmer mehr Corona-Fallen ok in´t Land Bremen

Bremen. Ok in Bremen un Bremerhaben stiegen de Corona-Tallen wieder düütlich. In de Stadt Bremen kladdert de Söven-Daag-Inzidenz op goot 1533, so veel as noch nienich. Dat vermellt de Gesundheitsbehöörd. In Bremerhaben sinkt de Inzidenz dorgegen licht op 885.

Bunnsdag bringt neje Quarantään-Regeln op den Weg

Berlin. De Bunnsdag hett den afännerden Quarantäänregeln tostimmt. Vör een Week harrn Bund un Länner düsse afsnackt. De Vörschrift verlövt korte Quarantääntieden. Ok de Isolatschoon bi Kuntaktlüüd mutt nich ween, wenn man al de drütte Sprütt kregen hett.

Tennis-Profi Djokovic dröff wedder nich na Australien inreisen

Melbourne. De australisch Minister för Lüüd de na Australien koomt un blifft, Alex Hawke, hett dat Visum för den Tennisprofi Novak Djokovic, de noch keen Sprütt kregen hett, wedder för nich rechtens verkloort. Dormit kann he nich bi de Australien Open mitmaken. Of de Serbe gegen de Entscheden vör Gericht geiht, is noch nich kloor.

Handball-EM fangt för de düütsche Mannschaft an

Bratislava. De düütschen Handball-Speler starten vundag in de Slowakei in de Europameisterschaft. In dat eerste Speel vun de Vörrunn speelt de DHB-Utwahl um Klock söss an´n Avend gegen Belarus. Bavento geiht dat in de eerste Runn noch gegen Österriek un Polen. De eersten Twee vun jedeen Koppel komen in de Hauptrunn.

Dat Weer

Un nu een Blick op dat Weer: in Wittmund söven, an den Bremer Flegerhaben  un an de Fischreehabenslüüs in Bremerhaben söss un in Deefholt sünd dat opstunns fief Graad. Af un an könen mal en poor Regendrüppen dorbi ween. De Wind weiht en beten. An de Küst af un an in Maten vun West bit Noordwest. Dat Thermometer wiest Temperaturen vun söss bis acht Graad. Tokamen Nacht kann dat Daak un Daak in de hoge Luft geven. De Temperaturen liggen denn bi dree bit fief Graad. Morrn fangt dat wedder mit Wulken un Daak an. Dat blifft dröög un gries bi fief bit söven Graad. Sünndag eerst dichte Wulken, af un an Regen un later is denn ok an de Küst en beten Sünnschien möglich. Dat Thermometer wiest fief bit acht Graad.

Dat weern de Nahrichten op platt. Ralph Stölting hett se tohoopstellt. Op Platt trechtmaakt un vörleest hett se Markus Weise.