Plattdeutsche Nachrichten Plattdüütsche Narichten vun'n 13. Januar 2022

Düütschland schafft Impfziel bet Enn Januar woll nich

Berlin: Bet Enn Januar ward woll doch nich so veel Minschen gegen Corona impft ween, as de Bunnsregeern dat haapt hett. So as Gesundheitsminister Lauterbach dat inschätzt, is dat Impfziel düchtig in Gefohr. De Ampel-Koalitschoon hett plaant, datt bet Enn Januar 80 Perzent vun de Minschen in Düütschland impft sünd. Över de Fierdaag sünd de Impftallen aver trüchgahn, säe Lauterbach to dat Narichtenportal „The Pioneer“. Dorüm mutt dat wedder anschuuvt warrn, so de Minister. An’n Namiddag stellt Lauterbach sien Plaan för de Duer vun düsse Regeern vör.  

Nee’er hööchster Weert bi Corona-Tallen

Berlin: De Corona-Tallen gaht wieter na baben. Dat Robert Koch-Institut hett meist 81.400 Neeinfekschonen mellt – dat is noch mal wedder en nee’er hööchster Stand. De Söben-Daag-Weert liggt opstünns bi meist 428, güstern noch bi 408. Bavento gifft dat 316 wietere Dode, de mit Covid-19 tosamenhangt. In’t Land Bremen is de Corona-Tall wieterhen an’n hööchsten. De Weert liggt in de Stadt Bremen bi 1.437 un in Bremerhaben bi 906. 1520 hebbt sik in Bremen nee infizeert, in Bremerhaben 311. Een wieterer Minsch is doodbleven.   

Rent schall in Düütschland stiegen

Berlin: Rentners in Düütschland köönt dormit reken, datt de Rent düütlich hooch sett ward. Bunnsarbeitsminister Heil geiht dorvun ut, datt de Rent üm över 4 Perzent anstiegen ward. To glieke Tiet hett Heil seggt, datt’n sik keen Sorgen üm dat Finanzeern vun de Rent maken mutt. Wenn noog Minschen arbeiden gaht, denn kann de Rent ok betahlt warrn, ahn datt de Bidrääg oder de Stüertoschüss stiegen mööt, säe Heil. Arbeitgeverpräsident Dulger hett de Politik toletzt vörsmeten, datt se keen Reform henkregen hebbt.  

Italien denkt an Dode vun „Costa Concordia“-Haveree

Giglio: Teihn Johr na de Haveree vun den Krüüzfohrer „Costa Concordia“ wüllt se hüüt op de italieenschen Middelmeerinsel Giglio an de Doden denken. Dat Schipp hett domals en Felsen striept un is to’n Deel ünnergahn. 32 Minschen sünd dorbi doodbleven, dorünner 12 düütsche Fohrgäst. De Kaptein vun de „Costa Concordia“ is ünner annern wegen fohrlässige Tötung to 16 Johr achter de Trallen verurdeelt worrn.

Handball-Europameisterschaft fangt an

Bratislava: In Ungarn un in de Slowakei fangt hüüt Avend de Handball-Europameisterschaft an. De eerste Partie ward vun de beiden Gastgevers speelt. Dat Topspeel stiggt denn twüschen Frankriek un Kroatien. De DHB-Utwahl fangt morgen in Bratislava gegen Belarus an. Wietere Gegner vun Düütschland in de Vörrunn sünd Öösterriek un Polen.

Dat Weer

Un nu en Blick op dat Weer: in Nienborg 3, an’n Bremer Flegerhaben 4, in Bremerhaben 5, in Emmen 6, un in Wittmund sünd dat opstünns 7 Graad. Hüüt geiht dat wegen deepe Wulkenfeller meisttiets dakig-gries in den Dag. Hööchstens op de Eilannen un an de Küst kann dat Sünnschien geven. In’t Binnenland is de Sünn över Dag blots hier un dor mal to sehn, meisttiets blifft dat hevenschattig. En poor Druppen sünd mööglich, mehrstendeels blifft dat aver dröög bi 5 bet 8 Graad. In de Nacht is dat dicht wulkig, meisttiets blifft dat aver dröög. Eenzig an de Noordsee sünd ok mal de Steerns to sehn. De Temperaturen gaht blots licht trüch op 6 bet 3 Graad. Morgen blifft dat wieterhen hevenschattig un gries. Af un an kann dat’n poor Regendruppen geven. En beten Sünnschien is an de Küst un an de Elv mööglich bi 6 bet 8 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.