Jetzt läuft:

Queen We Are The Champions
  • Als nächstes läuft:

  • Um 11:50 Uhr läuft: BILLY IDOL Sweet Sixteen
  • Jetzt läuft:

    Queen We Are The Champions
  • Davor lief:

  • Um> 11:42 Uhr lief: George Ezra Shotgun
  • Um> 11:39 Uhr lief: Vaya Con Dios Nah Neh Nah
  • Um> 11:34 Uhr lief: The Doors Light My Fire
  • Um> 11:30 Uhr lief: Erasure Always
  • Um> 11:23 Uhr lief: Joshua Kadison Jessie
  • Um> 11:17 Uhr lief: Bap Verdamp Lang Her
  • Um> 11:14 Uhr lief: America Ventura Highway
  • Um> 11:07 Uhr lief: Lenny Kravitz 5 More Days 'til Summer
  • Um> 11:04 Uhr lief: Kim Wilde Kids In America

Der Vormittag mit Ansgar Langhorst

Plattdeutsche Nachrichten Plattdüütsche Narichten vun'n 7. Januar 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 7. Januar 2022

Bund un Länner stimmen över wiederen Kurs in de Corona-Pandemie +++ Börgermeister Bovenschulte geiht toversichtlich in Corona-Drapen mit Bund un Länner +++ Bi de Laag in Kasachstan grummelt dat överall +++ Ministerium för´t Verdeffenderen will Schadenersatz för „Gorch Fock“ +++ Wetenschaftler wohrschauen vör jümmer mehr Minschen mit Demenz +++ Dat Weer

Bild: Radio Bremen

Informationen zum Audio

Bund un Länner stimmen över wiederen Kurs in de Corona-Pandemie

Berlin. Bund un Länner stimmen an´n Middag över wiederen Kurs in de Corona-Pandemie af. In de Vörlaag steiht, den Togang to Krögers un Weertslüüd wegen de Omikron-Oort wieder in Schranken to setten. De Besöök vun Wirtshüüs or Cafés is denn in ganz Düütschland blots noch mit en dagsaktuellen Test möglich. Utnahmen sünd blots för Minschen mit de Opfrisch-Sprütt vörsehn. För de Stadt Bremen gellt dat af Mondag, wenn Punkt veer op de Wohrschaulist anfangt. Neddersassen hett de Regeln al in´n November inföhrt.

Börgermeister Bovenschulte geiht toversichtlich in Corona-Drapen mit Bund un Länner

Bremen. Börgermeister Bovenschulte geiht toversichtlich in dat Corona-Drapen mit Bund un Länner. De SPD-Politiker seeg in dat ARD-Morgenmagazin, mit Blick op de Vörlaag vun de Beslutten, kien groden Problemen. Bovenschulte geiht dorvun ut, de Quarantäänfristen as dat plant weer to lockern, üm dat Üm-un-Bi bi anstiegen Falltallen oprecht hollen to könen. De Börgermeister vun Bremen roop noch mal düütlich dorto op, sick de Sprütt, un ok de Opfrisch-Sprütt geven to laten.

Bi de Laag in Kasachstan grummelt dat överall

Almaty. Bi de Laag in Kasachstan grummelt dat överall. In Almaty un in annern Steden weer ok veleden Nacht wedder schoten worrn. Präsident Tokajew hett dorher an´n Morgen ankünnigt mit sien - as dat nöömt warrt – „Anti-Terror-Operatschoon“ wiedertomaken. En vun Russland föhrde Militär-Maatschaft hett dorto eerste Suldaten in de fröher Sowjetrepublik schickt. Siet en poor Daag gaht de Minschen in Kasachstan gegen dat strenge Leit vun dat zentraalasiatisch Land op de Straat.

Ministerium för´t Verdeffenderen will Schadenersatz för „Gorch Fock“

Elsfleth. Dat Ministerium för´t Verdeffenderen verlangt Schadenersatz för de „Gorch Fock“. De Nordwest-Zeitung schrifft, dat dat Ministerium gegen de Ex-Basen vun de Warft in Elsfleth vör Gericht gahn will. Dat geiht womööglich üm düre Rekens, de de Schippboobedrief den Bund stellt hebben schall. De Warft harr 2019 Bankrott anmellt.

Wetenschaftler wohrschauen vör jümmer mehr Minschen mit Demenz

Seattle. De Wetenschaft wohrschaut dorför, dat jümmer mehr Minschen Demenz kriegen. De Fachzeitschrift „The Lancet Public Health“ vermellt, dat 2050 weltwiet mehr as 150 Millionen utwussen Minschen viellicht vun dat Lieden bedrapen ween könen. Vergleken mit 2019 weern dat binah dree Mal so veel. För Düütschland reken de Forscher en Towass vun 65 Perzent ut. As Hauptrisiko för Demenz gellt Smöken, to veel Pund op de Waag, hoge Blootzucker un en minne Bildung.

Dat Weer

Un nu een Blick op dat Weer: in Demorst dree, an den Bremer Flegerhaben twee, an de Fischreehabenslüüs in Bremerhaben dree un in Wittmund sünd dat opstunns veer Graad. Hüüt Vörmiddag treckt de Regen mit natten Snee af. Dorna gifft dat dichte Wulken, mennigmal riet de Wulken op. An´n Avend koomt wedder Sneeregen un Regenschuer. De Wind weiht in Maten. An de Küst frisch un böig vun de süüdwesten Kant. Dat Thermometer wiest veer bis söss Graad.
Tokamen Nacht hört dat op to regen. Dat Thermometer wiest Temeperaturen vun twee bit minus een Graad. Morrn blifft dat wiedgahns dröög mit en Wessel ut Wulken un en beten Sünnschien. An´n Avend fangt dat wedder an to regen un sneen bi dree bit fief Graad. Sünndag vele Wulken un af un an Regen bi veer bit söss Graad.

Dat weern de Nahrichten op platt. Carsten Putz hett se tohoopstellt. Op Platt trechtmaakt un vörleest hett se Markus Weise.