Plattdeutsche Nachrichten Plattdüütsche Narichten vun'n 06. Januar 2022

Russ’sche Truppen na Kasachstan stüert

Almaty: En Militärmaatschaft, de vun Russland anföhrt ward, hett Suldaten na Kasachstan stüert, üm dor Sluss mit de Krawalle mit Gewalt to maken. De so nöömten Fredenstruppen schüllt dor för en Tiet hölpen, datt de Laag wedder seker un stabil ward. Dat hett de Vörsitter vun de Maatschaft un Ministerpräsident vun Armenien Paschinjan verkloort. In de Nacht sünd in Almaty zig Demonstranten doodschaten worrn.   

Bekennerbreef to OHB-Brandanslag

Bremen: Na den Brandanslag op den Bremer Ruumfohrtkonzern OHB in de Silvesternacht liggt nu en Bekennerbreef vör. To den Anslag bekennt sik en Grupp, de sik „Autonome Antimilitarist:innen“ nöömt. Se smitt den Konzern vör, datt he Geschäften mit dat Rüsten maakt. De Breef is op en Plattform rutgeven worrn, de vun’n Verfatensschutz as linksextrem taxeert ward. Na Utkunft vun de Bremer Polizei liggt de Breef den Staatsschutz vör un ward opstünns ünnersöcht.  

Krisen-Drapen wegen Schippfohrtsmuseum

Bremerhaben: De Stiftungsraat vun dat Düütsche Schippfohrtsmuseum is an’n Vörmiddag to en Krisen-Drapen tohoopkamen. Bi dat Drapen per Video wüllt se beraden, wo dat nu wietergeiht, na dat de Direktersche Kleingärtner ehren Hoot nahmen hett. Kort tovör is Enn Dezember rutkamen, datt in de Verwaltung vun dat Museum wat scheef löppt.

Mehr as 1000 nee’e Corona-Infekschonen in’t Land Bremen

Bremen: De Corona-Tallen in’t Land Bremen gaht wieter na baben. To’n eersten Mal geev dat güstern mehr as 1000 nee’e Infekschonen an een Dag. De Söben-Daag-Weert stiggt op 761,2 in Bremen un 486,1 in Bremerhaben. De bunnswiete Tall is ok hoochgahn un liggt nu bi meist 286. Dat hett dat Robert Koch-Institut hüüt morgen vermellt.

Regio-S-Bahn-Töög fallt ut

Bremen: De Töög vun de Regio-S-Bahn twüschen Bremen-Farge un Vegebüdel fallt opstünns ut. En Hoochleitung mutt repareert warrn. Dat kann mööglicherwies noch bet to’n Namiddag duern, as en Sprekersche vun de Noordwestbahn säe. De Hoochleitung is güstern Avend an’n Bahnhoff Kreinsloger in Bremen-Blomendal afreten. En Tog mit Togföhrer, aver ahn Fohrgäst, stünn na Angaven vun de Füerwehr ünner Stroom. De Togföhrer is reddt worrn, ahn dat he wat afkregen hett.    

Dat Weer

Un nu en Blick op dat Weer: an’n Bremer Flegerhaben 0, in Bremerhaben 2, in Cuxhaben 3, in Brinkum 4, un op Borkum sünd dat opstünns 5 Graad. Hüüt is dat hier un dor eerst noch glatt. Alltohoop is aver mit en fründlichen Dag to reken, an den faken ok mal de Sünn schient un blots’n poor Wulkenfeller dörtreckt. To’n Avend hen ward de Wulken vun’t Emsland her wedder mehr. Dat Thermometer stiggt op 4 bet 6 Graad. In de Nacht ward de Wulken dichter. In de fröhen Stünnen kummt lichter Snee op, de to’n Morgen hen to’n Deel in Sneeregen övergeiht. Dör Sneematsch kann dat hier un dor glatt warrn. De Temperaturen gaht trüüch op 2 bet 0 Graad. Morgen treckt de Sneeregen, de mehr in Regen övergeiht, na Oosten af. Darna blifft dat meisttiets dröög mit dichte Wulken, de af un an mal oplockern. To’n Avend hen treckt vun’t Emsland her nee’e Sneeregenschuer op. De Temperaturen liggt twüschen 4 un 6 Graad.

Dat weern de Narichten op platt. Tohoopstellt hett se Ulrike Müller. Op Platt trechtmaakt un vörleest vun Marc Gelhart.