Jetzt läuft:

Joni Mitchell Coyote
  • Als nächstes läuft:

  • Um 19:40 Uhr läuft: Jaco Pastorius & Michael Colombier Dreamland
  • Jetzt läuft:

    Joni Mitchell Coyote
  • Davor lief:

  • Um> 19:32 Uhr lief: The Who The Seeker
  • Um> 19:24 Uhr lief: Paul McCartney & Eric Clapton While My Guitar Gently Weeps
  • Um> 19:19 Uhr lief: The Beatles Something
  • Um> 19:13 Uhr lief: David Bowie Silly Boy Blue
  • Um> 19:07 Uhr lief: Jethro Tull Shoshana Sleeping
  • Um> 19:05 Uhr lief: The Lovin' Spoonful Do You Believe In Magic?
  • Um> 18:56 Uhr lief: Georgie Fame Sitting In The Park
  • Um> 18:52 Uhr lief: George Harrison & Jim Horn Bangla Desh
  • Um> 18:47 Uhr lief: The Beatles Think For Yourself

Beat-Club mit Lutz Hanker

Plattdeutsche Nachrichten Plattdüütsche Narichten vun'n 21. Oktober 2021

Plattdüütsche Narichten vun'n 21. Oktober 2021

Audio vom 21. Oktober 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Storm Ignaz keem Noorddüütschland an +++ Verhanneln över de Ampel-Koalitschoon geiht los +++ Ministerpräsidentendrepen op Slott Drakenborg +++ Bremen rüst Stratenlateern üm +++ Bayern hett gegen Lissabon de Nees vörn +++ Dat Weer

Informationen zum Audio

Storm Ignaz keem Noorddüütschland an

Bremen – Dat Stormdeep Ignaz is in den Noordwesten ankamen. Verleden Nacht sünd op de Autobahn 29 bi Ahlhorn en poor Bööm ümfullen.
In Deefholt hett en ümfullen Boom de B-214 dicht maakt. Bet nu löppt noch allens bi de Bahn, man liekers warrt wohrschaut, dat sik dat övern Dag gau ännern kann. An de Küst schall dat gegen Middag en lichte Stormfloot geven.
In Bremen un Bremerhaben  weer de Nacht för de Füerwehr ahn groote Insätt.

Verhanneln över de Ampel-Koalitschoon geiht los

Berlin – De baversten Lüüd vun SPD, Grööne un FDP kaamt an Namiddag in Berlin tohoop, üm nu mit dat Verhanneln üm de  Koalitschoon antofangen. Toeerst warrt över Verfohrensfraagen snackt. Wo dat in de Verhanneln üm geiht, doröver snacken de 22 Arbeitskoppeln wohrschienlich vun tokamen Week af an.

Ministerpräsidentendrepen op Slott Drakenborg

Königswinter – De Lännerbaas draapt sik hüüt Vörmiddag to jümehr Johrskonferenz op Slott Drakenborg in Königswinter bi Bonn. Bet morgen wüllt se dor ok över de Corona-Pandemie un wat bi dat groot Hoochwaater-Malöör in Juli achterna kummt. Bavento schall dat üm Glücksspeel gahn.

Bremen rüst Stratenlateern üm

Bremen – Vun tokamen Week af an schüllt düütlich mehr Lampen in Bremens Straaten mit LED lüchten. Nu will de Stadt um un bi wiedere 19.000 Laternen ümrüsten. Twee vun Dree warrt denn mit de energiespaarenden Lüchten in Gang sett. Dordör warrt denn jedeen Johr mehrere Millioon Kilowattstünnen Stroom inspaart, see Umweltsenatorsche Schaefer.

Bayern hett gegen Lissabon de Nees vörn

München – De FC Bayern stüert wiederhen dorop to, ünner de letzten sessteihn Mannschaften in de Champions League to kamen. De Münchner hebbt mit 4 to 0 bi Benfica Lissabon de Nees vörn. Wenn Bayern in dat tweete Speel nochmal gegen Lissabon winnt, sünd se seker wieder.  
As dat in Momang utsüht, sünd de Plätz 1 bet 16 för den VfL Wulfsborg wiet weg rutscht. Bi den RB Salzborg hebbt de Wülv mit 1 to 3 örntlich een op de Mutz kregen. Dat weer de veerte Daalslag achter´nanner in en Plichtspeel.

Dat Weer

Un nu kiekt wi op dat Weer: In Bremen un Grotenkneten hebbt wi 10 Graad, in Bremerhaben un Em sünd dat opstunns 11 Graad. Hüüt fangt de Dag mit dicke Wulken un Regenschuer an. Hier un dor kann dat ok kräftig Blitz un Donnerslag geven. An´n Namiddag trecken de Regenschuer na süüdoosten af un bet to´n Avend kabbeln sik Sünn un Wulken üm den besten Platz an Heven. Liekers pladdert dat hier un dor, ok Gewidder un Grisselgrussel sünd mööglich. De Wind weiht frisch bet stark, mag ween ok stark bet stöörmsch, to´n Deel sünd swore Stormboen mööglich. An´n Namiddag warrt de Wind in´t Binnenland weniger, man an de Küst wiederhen starke Stormböen. Dat Thermometer wiest us dorbi 9 bet 14 Graad. Över Nacht schuert dat in de Düütschen Bucht, süüdlich vun Bremen warrt dat düütlich weniger mit Regen, hier un dor trecken de Wulken af un wi köönt ok mal de Steerns funkeln sehn. Dat Thermometer wiest 10 bet 7 Grad. Freedag trecken jümmer mal dicke Wulkenfeller vörbi un dat kann kräftig pladdern. Man ok Grisselgrussel is wedder mööglich. För de Sünn is dat nich so licht sik dör de Wulken to schuven, man an de Noordsee schafft se dat denn woll mal övern Namiddag. Un dat denn bi 7 bet 11 Graad.

Dat weren de Plattdüütschen Narichten. Tohoopstellt vun Michael Nendza. Op Platt trechtmaakt un vörleest vun Martina Brünjes.