Jetzt läuft:

Jethro Tull Shoshana Sleeping
  • Als nächstes läuft:

  • Um 19:11 Uhr läuft: David Bowie Silly Boy Blue
  • Jetzt läuft:

    Jethro Tull Shoshana Sleeping
  • Davor lief:

  • Um> 19:05 Uhr lief: The Lovin' Spoonful Do You Believe In Magic?
  • Um> 18:56 Uhr lief: Georgie Fame Sitting In The Park
  • Um> 18:52 Uhr lief: George Harrison & Jim Horn Bangla Desh
  • Um> 18:47 Uhr lief: The Beatles Think For Yourself
  • Um> 18:44 Uhr lief: The Bobbies Forever Rock'N'Roll
  • Um> 18:35 Uhr lief: The Germans Angelique
  • Um> 18:30 Uhr lief: James Brown Sex Machine
  • Um> 18:26 Uhr lief: Alan Price The House That Jack Built
  • Um> 18:22 Uhr lief: Lake & Palmer Emerson Nut Rocker

Beat-Club mit Lutz Hanker

Plattdeutsche Nachrichten Plattdüütsche Narichten vun'n 15. Oktober 2021

Plattdüütsche Narichten vun'n 15. Oktober 2021

Audio vom 15. Oktober 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

SPD, Grönen un FDP kiekt, wat bi dat Sondeern rutkamen is +++ Nee’er Tarifverdrag för Bowirtschaft steiht +++ Verbreker in Norwegen kummt vör den Haftrichter +++ Italien föhrt Corona-Pass bi de Arbeit in +++ Bremer Freimaak fangt an +++ Dat Weer

Informationen zum Audio

SPD, Grönen un FDP kiekt, wat bi dat Sondeern rutkamen is

Berlin: De Mannschaften vun SPD, Grönen un FDP, de sik üm dat Verhanneln kümmert hebbt, sünd an’n Vörmiddag to en Runn vörweg tohoop kamen, de mööglicherwies den Utslag geven kann. Se rekent dormit, datt de Vertreders vun de dree Parteien en Bilanzpapeer präsenteert. Op düsse Grundlaag köönt de Parteigremien daröver afstimmen, wat se dat Verhanneln över en Koalitschoon anfangen wüllt. Bi de Grönen mutt en lütten Parteidag tostimmen.

Nee’er Tarifverdrag för Bowirtschaft steiht

Berlin: De meist 900.000 Mitarbeiders vun de düütschen Bowirtschaft kriggt mehr Geld. Dat hebbt de Tarifparteien an’n fröhen Morgen vermellt. So stiggt de Lohn bet 2023 in dree Stufen – in’n Westen üm all tohoop meist söss, in Oostdüütschland üm över acht Perzent. Bavento sünd Eenmal-Gelder un en Corona-Prämie afmaakt. Bet 2026 schall dat Inkamen in de Bowirtschaft in Westen un Oosten datsülvige ween.   

Verbreker in Norwegen kummt vör den Haftrichter

Kongsbarg: Na dat Gewaltverbreken mit fief Doden in Norwegen bringt se den, de dat woll daan hett, vör den Haftrichter. Bavento schall en Rechtsnervendokter prüfen, wat de 37-Johrige nich heel schier is. De Behörden in Norwegen hebbt de Saak as Terroranslag betekent. Se stellt aver ok klaar, datt wieter ünnersöcht warrn mutt, wat dorachter stickt. De Mann schall ehrgüstern Avend in de Lüttstadt Kongsbarg mehrere Minschen mit Piel un Boog angrepen hebben. Fief Minschen sünd dorbi doodbleven, dree wurren versehrt.    

Italien föhrt Corona-Pass bi de Arbeit in

Rom: In Italien gellt vun hüüt an en nee’e Corona-Regel för Arbeitnehmers, to de dat mehrere Menen gifft. All Arbeitnehmers, sowoll in de Privaatwirtschaft as ok in’n Staatsdeenst, mööt nawiesen, datt se impft, na en Infekschoon wedder gesund oder negativ test worrn sünd. Blots denn kriggt se den so nöömten Grönen Pass. Ahn düssen Pass draff nümms mehr to sien Arbeitssteed. Dat geiht üm meist 23 Millionen Arbeitnehmers. Toletzt geev dat düchtige Proteste gegen düsse Regel.

Bremer Freimaak fangt an

Bremen: Op de Börgerweid fangt an’n Avend de Bremer Freimaak an. Wegen de Corona-Pandemie gellt op dat Volksvergnögen de 3G-Regel. Dat heet, Besökers, de öller sünd as 16 Johr, mööt an’n Ingang nawiesen, datt se impft, na en Infekschoon wedder gesund oder negativ test worrn sünd. Dorvun utnahmen sünd Kinner un junge Lüüd bet 16 Johr. Kuntaktdaten mööt de Gäst blots in slaten Rüüm dorlaten. Op dat Flach vun’n Freimaak dröfft hööchstens 20.000 Minschen to glieke Tiet.

Dat Weer

Un nu en Blick op dat Weer: in Grotenkneten un Nordholt 10, an’n Bremer Flegerhaben un in Bremerhaben 11, un in Wittmund un Nienborg sünd dat opstünns 12 Graad. Hüüt Vörmiddag geiht vun de Küst ut de Kooltfront Gerold mit dichte Wulken un Regen över us henweg. Darna lockert dat aver gau wedder op, un vun Tiet to Tiet schient de Sünn. An’n Namiddag gifft dat wedder opstiegen Wulken un an’n Avend ok Schuer. Dat Thermometer klattert op 13 bet 15 Graad. In de Nacht is dat faken dicht wulkig, meisttiets aver dröög. Besünners an de Küst sünd enkelte Schuer mööglich. De Luft köhlt sik af op 10 bet 5 Graad. Morgen is dat meisttiets dicht wulkig, af un an lockert dat aver op, dormit de Sünn sik ok mal wiesen kann. Enkelte Schuer sünd besünners an de Küst mööglich. Dat blifft köhl bi 12 bet 13 Graad. An’n Sünndag is dat mal mehr, mal weniger wulkig mit’n beten Sünnschien. Dat blifft meisttiets dröög bi 12 bet 14 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.