Jetzt läuft:

Georgie Fame Sitting In The Park
  • Jetzt läuft:

    Georgie Fame Sitting In The Park
  • Davor lief:

  • Um> 18:52 Uhr lief: George Harrison & Jim Horn Bangla Desh
  • Um> 18:47 Uhr lief: The Beatles Think For Yourself
  • Um> 18:44 Uhr lief: The Bobbies Forever Rock'N'Roll
  • Um> 18:35 Uhr lief: The Germans Angelique
  • Um> 18:30 Uhr lief: James Brown Sex Machine
  • Um> 18:26 Uhr lief: Alan Price The House That Jack Built
  • Um> 18:22 Uhr lief: Lake & Palmer Emerson Nut Rocker
  • Um> 18:15 Uhr lief: Traffic Light Up Or Leave Me Alone
  • Um> 18:12 Uhr lief: George Harrison All Things Must Pass

Beat-Club mit Lutz Hanker

Plattdeutsche Nachrichten Plattdüütsche Narichten vun'n 14. Oktober 2021

Plattdüütsche Narichten vun'n 14. Oktober 2021

Audio vom 14. Oktober 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Mehr as 800 Millionen Minschen mit Hunger op de heelen Welt +++ Fief Dode bi Gewaltverbreken in Norwegen +++ Verhanneln över Ampel-Koalitschoon in’n lütten Kring +++ Vun hüüt an Wohrschaulist 0 in Bremen +++ Tarifafsluss för Eenzelhannel in Bremen und Neddersassen +++ Dat Weer

Informationen zum Audio

Mehr as 800 Millionen Minschen mit Hunger op de heelen Welt

Berlin: De Welthungerhölp wohrschaut, datt jümmer mehr Minschen op de heelen Welt nich noog to’n Eten hebbt. De internatschonale Gemeenschaft harr vör, datt bet 2030 keen Minsch mehr hungern mutt. De Welthunger-Index, de nu in Berlin vörstellt worrn is, vermellt aver, datt se dat woll nich henkriegen wardt. De Laag is dör den Klimawannel un de Corona-Pandemie leeger worrn. Op de heelen Welt hungert opstünns meist 811 Millionen Minschen. 41 Millionen liedt meist an en Hungersnot. Besünners leeg süht dat in enige afrikaansche Länner ut.

Fief Dode bi Gewaltverbreken in Norwegen

Kongsbarg: In Norwegen hett en Mann fief Minschen mit Piel un Boog doodschaten. Twee wietere hett he swor versehrt. De Angrepen sünd in de Lüttstadt Kongsbarg passeert, de meist 80 Kilometers wiet weg vun Oslo liggt. Na Utkunft vun de Polizei hett de Schütt sien Opfers an verscheden Steden in de Stadt attackeert, ünner annern in en Inkoopszentrum. De 37-Johrige is fastnahmen worrn. Worüm he dat dahn hett, is betto noch nich klaar. De Polizei kann sik vörstellen, datt terroristische Afsichten dorachter stickt.

Verhanneln över Ampel-Koalitschoon in’n lütten Kring

Berlin: SPD, Gröne un FDP maakt hüüt mit ehr Runn vörweg in’n lütten Kring wieter. De Generaalsekretäre vun SPD un FDP un de Bunnsgeschäftsföhrer vun de Grönen wüllt dat to Papeer bringen, wat se betto verhannelt hebbt. Se wüllt bet to’t Enn vun de Week en gemeensam Grundlaag för den Afsluss vun dat Sondeern schaffen. SPD-Kanzlerkandidaat Scholz geiht dorvun ut, datt de Ampel-Koalitschoon noch vör Wiehnachten tostann kummt.  

Vun hüüt an Wohrschaulist 0 in Bremen

Bremen: De Senaat hett de Corona-Vörgaven för de Stadt Bremen daalschruuvt. Vun hüüt an gellt de Wohrschaulist Null. Dormit fallt to’n Bispill in Theaters oder Gasthüüs de 3G-Regel weg. Weertslüüd un Utrichters vun Veranstalten köönt aver wieter doran fasthollen. In’n Bus un Bahn, an Anhoolpunkten, in Geschäften un bi grode Veranstalten in Binnenrüüm mutt en wieterhen en Mask dragen. In Bremerhaben blifft dat eerstmal wieterhen bi Wohrschaulist 2.

Tarifafsluss för Eenzelhannel in Bremen und Neddersassen

Bremen: För den Eenzelhannel in Bremen un Neddersassen gifft dat en Tarifafsluss. Dat hett de Gewarkschaft verdi na de veerten Runn vun’t Verhanneln mitdeelt. Bet to de Gehaltsgrupp Verkopersche stiggt de Lohn naderhand to’n 1. September üm dree Perzent. För högere Gehaltsgruppen gifft dat eenmal meist 80 Euro. Vun Mai 2022 an kriggt denn all nochmal 1,7 Perzent mehr.

Dat Weer

Un nu en Blick op dat Weer: in Bassum 11, an’n Bremer Flegerhaben 12, un in Bremerhaben, Cuxhaben un Wittmund sünd dat opstünns 13 Graad. Hüüt is dat eerst wulkendüüster bet dicht wulkig, vun Tiet to Tiet mit’n beten Spütterregen. Vun Middag an lockert dat mehr un mehr vun Oostfreesland un dat Emsland her op, un dat blifft meisttiets dröög. Dat ward för en Tiet lang lau mit 15 bet 16 Graad. In de Nacht is dat meisttiets dicht wulkig. Besünners an de Küst fallt Regen, de to’n Morgen hen mehr ward. Dat blifft wieterhen lau bi 11 bet 12 Graad. Morgen treckt mit dichte Wulken en Regenstreek dör. Darna lockert dat vun de Küst her op, un vun Tiet to Tiet wiest sik de Sünn. Dat gifft blots noch enkelte Schuer bi 13 bet 14 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.