Jetzt läuft:

The Love Affair Everlasting Love
  • Als nächstes läuft:

  • Um 17:50 Uhr läuft: Duran Duran The Wild Boys
  • Jetzt läuft:

    The Love Affair Everlasting Love
  • Davor lief:

  • Um> 17:44 Uhr lief: Enrique Iglesias Pendejo
  • Um> 17:36 Uhr lief: Kajagoogoo Too Shy
  • Um> 17:33 Uhr lief: Donna Summer She Works Hard For The Money
  • Um> 17:28 Uhr lief: Kool & The Gang Cherish
  • Um> 17:24 Uhr lief: Take That The Flood
  • Um> 17:18 Uhr lief: Meat Loaf Bat Out Of Hell
  • Um> 17:14 Uhr lief: Spandau Ballet True
  • Um> 17:09 Uhr lief: Frans If I Were Sorry
  • Um> 17:05 Uhr lief: Jermaine Jackson & Pia Zadora When The Rain Begins To Fall

Das Wochenende mit Olaf Rathje

Plattdeutsche Nachrichten Plattdüütsche Narichten vun'n 12. Oktober 2021

Plattdüütsche Narichten vun'n 12. Oktober 2021

Audio vom 12. Oktober 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Intensivstatschonen in Bremerhaven utlast +++Stadtbörgerschap Bremen snackt över Klinikverbund GENO +++ De Eer bevert wedder op La Palma +++ Öösterriek: De fröhere Kanzler Kurz ahn Gegenstimm Frakschoons-Baas vun de ÖVP +++ Düütsche Footballers fohrt na de WM +++ Dat Weer

Informationen zum Audio

Intensivstatschonen in Bremerhaven utlast

Bremerhaven: Vunwegen Corona sünd vele Betten op de Intensivstatschonen in Bremerhaven un umto besett. Se kaamt so eben un eben trecht, sä en Spreker vun dat Klinikum Reinkenheid. De Mann hett ok verkloort: De Krankenhüüs in Bremerhaven un Cuxhaven arbeidt tohoop. Se övernehmt Kranke ut anner Hüüs oder bringt jem na dor.

Stadtbörgerschap Bremen snackt över Klinikverbund GENO

Bremen: In de Stadtbörgerschap snackt se an’n Namiddag doröver, dat se den Klinikverbund Gesundheit Nord nee op de Been stellen wüllt. Den Andrag hett de CDU vörleggt. Se meent: De Plaan, den de Geno un Gesundheits-Senatersch Bernhard op den Disch leggt hebbt, düsse Plaan langt vörn un achtern nich. Bet nu schrifft de Geno rode Tallen. Un nu seggt de Gesundheitsbehöörd: Bet 2025 bruukt se keen Geld mehr vun’n Staat. 440 Arbeitssteden wüllt se wegstrieken. De CDU verlangt nu: En groten Personal-Plaan mutt her.

De Eer bevert wedder op La Palma

Santa Cruz: In de Gegend um den Vulkan op La Palma, de letzt opbluckt weer, hett de Eer wedder bevert – so dull as blots ganz an’n Anfang. Dat vermellt en spaanschen Feernsehsender. Vunwegen dat Gift in de Luft hebbt de Behöörden güstern al anseggt: De Lüüd dor mööt in’t Huus blieven. Dat gellt för knapp 3000 Minschen.

Öösterriek: De fröhere Kanzler Kurz ahn Gegenstimm Frakschoons-Baas vun de ÖVP

Wien: De fröhere Bunnskanzler vun Öösterriek, Kurz, is vun de ÖVP-Frakschoon in den Natschonal-Rat as Frakschoons-Baas wählt worrn, nüms hett gegen em stimmt. Kurz harr Sünnavend dat Stüer vun dat Kanzleramt ut de Hand geven. De Staatsanwaltschap hett em op’n Kieker, seggt warrt, he harr Smeergeld geven un annahmen. De Oppositschoon will op en Extra-Sitten vun dat Parlament vundaag ansnacken, wat bi de ÖVP allens verdwars löppt. Se wüllt ok Andrääg vunwegen Misstroen rutgeven. De nödigen Stimmen kriegt se dorför aver nich tohoop.

Düütsche Footballers fohrt na de WM

Skopje: De düütsche Football-Natschonal-Mannschap is bi de Weltmeisterschap tokamen Johr in Katar mit bi. Güstern hett de Kru vun Trainer Flick Nordmazedonien mit 4:0 afrüüscht. Fief Spele na’nanner hett Flick mit sien Mannschap nu de Bavenhand hatt. Mit 21 Punkte steiht se in ehr Grupp seker op Platz Een.

Dat Weer

Un woans süht dat mit dat Weer umto ut? Opstunns hebbt wi in Bremen un Deefholt 10 Graad, in Bremerhaven un Nordholt sünd dat 11 Graad. Vundaag: Mal Sünnschien, mal dicke Wulken, de ok jümmers wedder Regen op uns daal smiet, an’n Namiddag kann ok en Masse daalkamen, un ok mit Grisselgrussel. Wenn dat mal dröög is, krabbelt dat Thermometer op 12 bet 14 Graad. De Wind dorto weiht in Maten, an de See ok frisch vun de noordwesten Kant. Tokamen Nacht: Dat höört op to schuern, un an’n Heven staht blots noch en poor Wulken. Hier un dor kann Daak opkamen. Gegen Morgen wedder mehr Wulken, un an de Küst fangt dat wedder an to pladdern. Op de Inseln 10 bet 8 Graad, in Bremen un umto bi 5 bet 2 Graad. Morgen: Wenn de Daak weg is: Mal dröög, mal pladdert dat, un mal kriegt wi ok de Sünn to sehn. An’n Namiddag kriggt denn aver wedder de Regen de Bavenhand. Dat Ganze bi 12 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Carola Schwirblat.