Jetzt läuft:

Atomic Kitten Whole Again
  • Als nächstes läuft:

  • Um 16:35 Uhr läuft: Fleetwood Mac Little Lies
  • Jetzt läuft:

    Atomic Kitten Whole Again
  • Davor lief:

  • Um> 16:19 Uhr lief: Queen Radio Ga Ga
  • Um> 16:12 Uhr lief: Lesley Gore It's My Party
  • Um> 16:09 Uhr lief: Rea Garvey I'm All About You
  • Um> 16:05 Uhr lief: Kenny Loggins Footloose
  • Um> 15:56 Uhr lief: Two of Us Blue Night Shadow
  • Um> 15:52 Uhr lief: The Sweet Ballroom Blitz
  • Um> 15:49 Uhr lief: Rick Springfield Jessie's Girl
  • Um> 15:44 Uhr lief: George McCrae Rock Your Baby
  • Um> 15:41 Uhr lief: Shakira Waka Waka (This Time For Africa)

Das Wochenende mit Ariane Wirth

Plattdeutsche Nachrichten Plattdüütsche Narichten vun'n 13. September 2021

Plattdüütsche Narichten vun'n 13. September 2021

Audio vom 13. September 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Reed un Gegenreed bi TV-Triell vun de Kanzlerkandidaten +++ CDU liggt bi Kommunaalwahlen in Neddersassen vörn +++ In Bremen gellt nee’e Corona-Regeln +++ Tall vun Corona-Neeinfekschonen stiggt bunnswiet wedder an +++ Martinistraat in Bremen ward to Eenbahnstraat +++ Dat Weer

Informationen zum Audio

Reed un Gegenreed bi TV-Triell vun de Kanzlerkandidaten

Berlin: Twüschen de Kanzlerkandidaten vun CDU, SPD un Grönen geev dat an’n Avend en Reed un Gegenreed in en TV-Debatt. Unions-Kandidaat Armin Laschet un Annalena Baerbock vun de Grönen hebbt in dat Triell vun ARD un ZDF ehren SPD-Gegenspeler Olaf Scholz angrepen. Se hebbt em vörsmeten, datt he in‘n Kampf gegen dat Geldwaschen nich noog daan hett. Scholz säe to Laschet, datt he de Saken verdreiht. Verscheden Menen geev dat ok bi den Ümgang mit de Linkspartei, bi dat Thema Wahnruum, de ok to betahlen is, oder ok bi de Tokunft vun de Rent.  

CDU liggt bi Kommunaalwahlen in Neddersassen vörn

Hannover: Bi de Kommunaalwahlen in Neddersassen is de CDU de stärkste Kraft worrn. För’t Eerste liggt se na dat amtliche Uttellen mit 31,7 Perzent vör de SPD mit 30 Perzent un de Grönen mit 16 Perzent. De FDP is op 6,5 Perzent kamen, de AfD op 4,6 un de Linken op 2,8. De Tallen hett dat Landsamt för Statistik mitdeelt. En heele Reeg vun Oberbörgermeisters un Landrööt mutt in twee Weken in de Prickwahl gahn.    

In Bremen gellt nee’e Corona-Regeln

Bremen: In Bremen gellt nu nee’e Corona-Regeln. So mutt to’n Bispill bi en Corona-Infekschoon blots noch dat süüke Kind un nich mehr de heele Schoolklass in Quarantään. Bavento mööt sik de Anstellten in’t Krankenhuus Dag för Dag op dat Virus testen, wenn se noch nich heel un deel impft worrn sünd.

Tall vun Corona-Neeinfekschonen stiggt bunnswiet wedder an

Berlin: As dat Robert-Koch-Institut vermellt, hebbt sik 5.500 wietere Minschen mit dat Corona-Virus ansteckt. Dat sünd meist 800 mehr as verleden Maandag. De Söben-Daag-Wert is nu op 82 hoochgahn. 12 wietere Minschen sünd an oder mit dat Virus doodbleven. In’t Land Bremen gifft dat 49 wietere Corona-Infekschonen. De Söben-Daag-Wert in de Stadt is op 102,7 hoochgahn, in Bremerhaben is he op 189,2 daalgahn.   

Martinistraat in Bremen ward to Eenbahnstraat  

Bremen: De Martinistraat in Bremen ward vun hüüt an för’n poor Weken to en Eenbahnstraat. Lüüd, de vun’n Brill kaamt, köönt nich mehr in Richtung Oosterdiek fohren. För all, de vun’n Oosterdiek kaamt, ännert sik nix. Mobilitätssenatersche Maike Schaefer will mit düssen Verkehrsversöök weniger Autofohrers in de Bremer Binnenstadt hebben. Bet Mitt November schall düsse Versöök anduern. Darna kann en op de Martinistraat wedder in beide Richtungen fohren.

Dat Weer

Un nu en Blick op dat Weer: in Deefholt 14, an’n Bremer Flegerhaben 15, in Bremerhaben 16, in Wittmund 17, un in Ollenborg sünd dat opstünns 22 Graad. Hüüt is dat eerst wulkig, hier un dor kann dat ok’n beten Spütterregen geven. De Sünn is eerst vun Middag an af un an to sehen, wenn de Wulken’n beten oplockern. De Temperaturen liggt twüschen 18 un 21 Graad. In de Nacht is de Heven licht wulkig, af un an treckt dichte Wulkenfeller vörbi, de aver keen Regen bringt. Hier un dor is Daak mööglich bi 13 bet 8 Graad. Morgen löst sik düsse Daak fröh op. Darna gifft dat en fründlichen Wessel ut Sünnschien un Wulkenfeller. Later an’n Avend ward de Wulken in’t Emsland vun de Nedderlannen her dichter. Dat Thermometer kladdert op 20 bet 24 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.