Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 23. Juli 2021

Plattdüütsche Narichten vun'n 23. Juli 2021

Audio vom 23. Juli 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Landdag in Thüringen entscheedt över Misstroonsandrag vun de AfD +++ Sommerspele in Tokio gaht los +++ Neddersassen will Corona-Stufenplan ännern +++ Bremer Sommerwies fangt an +++ Sünner-Impf-Akschoon för Studenten un Werder-Fans in Bremen +++ Dat Weer

Informationen zum Audio

Landdag in Thüringen entscheedt över Misstroonsandrag vun de AfD

Erfurt – In Thüringen entscheedt de Landdag an’n Namiddag över een Misstroonsandrag gegen Ministerpräsident Ramelow. Darmit will de AfD de rot-rot-gröne Minnerheitsregeern afsetten. To de glieke Tied stellt se ehrn Vörsitter Höcke gegen Ramelow to Wahl. Höcke hett aver meist seker keen Schangs. Darför bruukt dat 46 Stimmen, de AfD hett man blots 22 Sitze. De anneren Parteien hebbt ankünnigt, gegen Höcke to stimmen or nich mittomaken.

Sommerspele in Tokio gaht los

Tokio – An’n Middag fangt de Olympischen Sommerspele vun Amts wegen an. De Fier geiht üm Klock een an’n Middag na use Tied los. Se ward wegen de Corona-Pandemie to’n ersten Mal vör bold keen Tokiekers stattfinnen. In’t Stadion sünd blots knapp 1000 Lüüd verlöövt. Dat dütsche Team ward von Beachvolleyball-Spelerin Laura Ludwig un Waterspringer Patrick Hausding anföhrt, de de Fahn dräägt.

Neddersassen will Corona-Stufenplan ännern

Hannober – De Wertschuppsminister vun Neddersassen, Althusmann, will den Corona-Stufenplan ännern. Wieldat de Tallen na baben kladdert, will Althusmann so verhinnern, dat dat in verenkelten Regionen wedder draut, wat dicht to maken. As Althusmann sä, wöör dat vör allens för dat Tourismus-Wertschuppsfeld, för Restaurants un de Ladens slimm. Besünners hooch sünd de Tallen opstunns in’n Kreis Lüneborg. Dar liggt de Inzidenz vundag bi 41,8.

Bremer Sommerwies fangt an

Bremen – Üm Klock twee an’n Middag geiht dat erste grode Volksfest op de Börgerweid los, nadenn dat wegen Corona een Paus geven harr. De Bremer Sommerwies schall so weern as de Osterwies. För de Besööker steiht mehr as 90 Geschäfte praat – darunner de Imbiss- un Drinkstände as ok de Losbuden. Darto kummt 16 Karussells, meist för Kinner un junge Lüüd. Nich mehr as 6000 Besööker sünd to de glieke Tied verlöövt. Se mööt een Test vörwiesen, geimpft or wedder gesund sien – or jünger as 15 Johr old sien.

Sünner-Impf-Akschoon för Studenten un Werder-Fans in Bremen

Bremen – All Lüüd, de in’t Land Bremen studeert, köönt sik vundag un morrn twüschen Klock 11 un Klock söß an’n Abend in’t Bremer Impfzentrum op de Börgerweid gegen Corona impfen laten. Dat gifft de Impfmiddel vun Moderna or Biontec. För all Werder-Fans gifft dat de Schangs, sik vör dat Speel gegen Hannober 96 impfen to laten. Ok twüschen 11 un Klock söß an’n Abend, aver mit dat Impfmiddel vun Johnson & Johnson. Un eben is vermellt worrn, dat de Moderator un Fernseh-Koch Alfred Biolek in’n Öller vun 87 Johren in Köln sturven is.

Dat Weer

Un nu een Blick op dat Weer: in Bremervöör 16, in Cuxhaben, an den Bremer Flegerhaben un an de Fischreehabenslüüs in Bremerhaben sünd dat opstunns 17 Graad. Vundag sünd erstmal dicke Wulken an’n Heben un dat kann nieseln un pieseln. Later lockert de Wulken aver op un dat kann fründlich Weer geven. An’n Abend kiekt ok de Sünn rut un dat blifft dröög bi 20 bit 23 Graad. Tokamen Nacht ward dat locker wulkig un dröög, dar kann ok mal Nevel opkamen. Dat Thermometer sackt op 15 bit 11 Graad. Morrn fangt de Dag mit veel Sünnschien un een paar lüttjen Wulken an. An’n Namiddag treckt mehr Wulken op un dat gifft Schuers un Grummelschuers. Blangen Hagel un Sturmboijen is ok duller Regen mööglich, kann rusig Weer geven! Temperaturen bi 24 bit 28 Graad.  Dat weern de Nahrichten op platt. Gabriele Intemann hett se tohoopstellt. Op Platt trechtmaakt un vörleest hett se Heidi Jürgens.