Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 21. Juli 2021

Plattdüütsche Narichten vun'n 21. Juli 2021

Audio vom 21. Juli 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Twetet Verfahren, Trump ut sien Amt to smieten +++ WHO-Facklüüd kummt in China an +++ Vogt wahrschaut, dat Lüüd ut de Luftfohrt ehr Arbeit verleert +++ Röwekamp warvt för Laschet as CDU-Bunnesvörsitter +++ Holsteen-Anhänger fiert Pokal-Sieg gegen Bayern in Kiel +++ Dat Weer

Informationen zum Audio

Bremer Senat: Corona-Regeln nich mehr so streng

Bremen: De Senat hett fastleggt: De Corona-Regeln sünd nich mehr so streng. Wenn de Börgerschaft dor ja to seggt, gellt dat vun den 2. August op an. Versammeln köönt sik denn bet 25.000 Minschen. Kinner, junge Lüüd un Mitarbeiders in Kitas un Scholen mööt denn nich mehr op Afstand achten, wenn se to faste Gruppen tohöört. Dat gellt ok för Lehrveranstaltungen un Prüfungen an Hoochscholen, wenn de en Hygiene-Plaan hebbt. Schull de Inzidenz dree Daag lang över 35 liggen, köönt de Regeln wedder strenger warrn.

Bunnsregerung: Noothölp för Lüüd, de unner dat Hoochwater lieden doot

Berlin: Vör een Week weer dat Hoochwater kamen – nu hett de Bunnsregerung en Programm för Noothölp op den Weg bröcht. Vun de 400 Millionen Euro övernimmt de Bund dat Halve, de Länner Nordrhein-Westfalen un Rheinland-Pfalz den annern Part. Mit dat Geld wüllt se gegen de gröttste Noot an un de gräsigsten Schaden ut de Welt bringen. Bavento plaant se en Putt för dat Wedderopboen. Woveel Geld dor rinkummt, wüllt se aver eerst fastleggen, wenn se weet, wo groot de Schaden is.

Hoochwater in chineesche Millionen-Stadt

Zhengzhou: In de Millionen-Stadt in de chineesche Provinz Henan sünd bi Hoochwater tominnst twölf Minschen to Dode kamen. De Lüüd weren in en U-Bahn, de unner Water kamen is. Meist 200.000 Minschen müssen ut jemehr Hüüs rut. Eerst harr dat in’t mittlere China böös regent, un dorvun is dat Hoochwater kamen. En Staudamm is tweibraken, bi annern süht dat nich goot ut. Dat Water is över vele Straten weglopen, in vele Gegenden gifft dat keen Stroom mehr. De chineesche Präsiden Xi sä, de Laag weer bannig stuur.

Nord Stream 2: De Striet twüschen Düütschland un de USA is woll vun’n Disch

Berlin: Dat lett: Düütschland un de USA hebbt jemehren Striet wegen de Oostsee-Pipeline Nord Stream 2 vun’n Disch kregen. Mehrere Medien vermellt: En Kuntrakt warrt se womööglich noch vundaag vörstellen. De Knackpunkt is: Wenn Gas direkt vun Russland na Düütschland spöölt warrt – woans kann denn de Schaden vun de Ukraine oder anner Länner in Oosteuropa afnahmen warrn. De Rohrleitung is meist trecht. Bet nu harrn de USA allens dor an sett, dat de Pipeline nich to Enn boot warrt. Dorför harrn se Strafen gegen de Bo-Unnernehmen ansett.

Bremen: Frische-Luft-Fest Breminale geiht los

Bremen: Vunavend geiht dat Frische-Luft Fest Breminale los. Lopen schall dat fief Daag. Wegen Corona sünd de Fiern verdeelt op en Reeg Steden in de Stadt. Fröher leep allens an den Osterdiek un in de Wallanlagen. Bet Sünndag staht um un bi 60 mal Spektakel un Musik op’t Programm. Düt Johr kost dat aver wat. De meisten Koorten sünd aver al weg.

Dat Weer

Un woans süht dat mit dat Weer umto ut? Opstunns hebbt wi in Staad 16 Graad, in Bremen un Deefholt sünd dat 18 un in Bremerhaven 19 Graad. Vundaag: Eerst Wulken över Wulken, de Sünn kriegt wi an’n Vörmiddag blots in’t Emsland to sehn. In’t Natte Dree-Eck kann dat ok en beten drüppeln. An’n Namiddag lockert dat överall wat op, un denn lacht uns ok de Sünn, vör allen an de Küst. Dat Thermometer krabbelt op 20 bet 24 Graad. De Wind dorto weiht flau oder en beten mehr vun de westen bet noordwesten Kant, an de Küst ok mit frische Böen. Tokamen Nacht: Blots en poor Wulken, later treckt vun de Noordsee wedder hogen Daak rin. Hier un dor kann sik gegen Morgen Daak utbillen. Dröög bi 15 bet 12 Graad. Morgen: Wenn sik de Daak oplööst hett: vele Wulken, de Sünn kriggt blots af un an mal de Bavenhand. Över Middag kann dat ok en beten pladdern, eerst gegen Avend lockert de Wulken op, un wi kriegt ok de Sünn to sehn. Dat Ganze bi 19 bet 21 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.