Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 20. Juli 2021

Plattdüütsche Narichten vun'n 20. Juli 2021

Audio vom 20. Juli 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Merkel wedder in Hoochwater-Gegend +++ Hoochwater: Stiggt nu ok Corona wedder? +++ Weltruum-Tourismus geiht wieter: Bezos flüggt +++ Bremerhaven: Vundaag impfen ahn sik antomellen +++ Bremen: Dode Fro bi Unfall op Motorboot +++ Dat Weer

Informationen zum Audio

Merkel wedder in Hoochwater-Gegend

Bad Münstereifel: Bunnskanzlersch Merkel is hüüt Middag wedder in de Hoochwater-Gegenden. Tohoop mit NRW-Ministerpräsident Laschet kummt Merkel na Bad Münstereifel. De Oort mit de velen Fackwarkhüüs harr bi dat gräsige Weer böös wat afkregen. An’t Wekenenn weer Merkel in Rheinland-Pfalz ween, wo se sik mit Ministerpräsidentin Deyer ankeken harr, woans dat in de Hoochwater-Gegenden dor utsüht.

Hoochwater: Stiggt nu ok Corona wedder?

Mainz: In de Hoochwater-Gegenden kunn dat mehr Corona-Kranke geven. Dat köönt sik de Lannsregerungen vun Nordrhein-Westfalen un Rheinland-Pfalz vörstellen – so dat Redakschoonsnettwark Düütschland. Wat dor achter stickt: Bi de Hölpsakschonen un in Nootlagers sünd vele Minschen dicht bi dicht. Dat Corona dor nu nich explodeert, dorför wüllt düsse Landkreise extra Impf-Akschonen op de Been stellen.

Weltruum-Tourismus geiht wieter: Bezos flüggt

Van Horn: Dat is teihn Daag her, dor weer de britsche Milliardär Richard Branson kort in dat Weltall rinflagen. Vundaag will dat nu ok Jeff Bezos maken, de Mann, de Amazon grünnt hett. Bi den Fleger vun sien Firma „Blue Origin“ mit an Boord ween schüllt Bezos un sien Broder Mark, denn en fröhere US-Pilotin, de 82 Johr oolt is, un en 18-johrigen Mann ut de Nedderlannen. Um un bi teihn Minuten schüllt se ünnerwegens ween.

Bremerhaven: Vundaag impfen ahn sik antomellen

Bremerhaven: Bet Freedag gifft dat in de Stadt en Extra-Impf-Deenst. Namiddags twüschen 2 un 5 köönt sik all Lüüd ut Bremerhaven in dat Impf-Zentrum de eerste Sprütt geven laten – un se mööt sik dor nich för anmellen. Jeden Dag köönt denn 200 mal Biontech oder Moderna sprütt warrn. Schull dat Serum weg ween, köönt de Lüüd aver stantepe en Termin afmaken.

Bremen: Dode Fro bi Unfall op Motorboot

Bremen: In Vegesack is güstern bi en Bootsunfall en Fro to Dode kamen. En Ehpoor weer mit jemehr Motorboot op de Werser unnerwegens. Dorbi is de Fro in dat Water rinfullen, mag ween, de Wellen vun en Binnenschipp, dat vun vörn keem, harrn dat Swoien utlööst. De Lüüd op en Polizeiboot hebbt de Fro vun 74 Johr ut’t Water trecken kunnt, man se kunnen ehr nich in’t Leven trüchhalen. De Mann hett en groten Schreck afkregen.

Dat Weer

Un woans süht dat mit dat Weer umto ut? Opstunns hebbt wi in Bremen un in Vechte 17 Graad, in Bremerhaven sünd dat 18 un op Baltrum 19 Graad. Vundaag: Eerst griese Wulken, an de Küst smiet de ok den een oder annern Schuer daal. De Sünn kriegt wi aver ok mal to sehn, vör allen na de Elv to. An’n Namiddag lockert de Wulkendeek wat op, liekers mag dat ok noch kott mal pladdern. Dat Thermometer krabbelt op frische 19 bet 22 Graad. De Wind dorto weiht flau vun noordwesten Kant, an de Küst ok en beten mehr un in Böen ok frisch. Tokamen Nacht: De meisten Wulken lööst sik op, oder se treckt af. Denn blinkert ok de Steerns. Vun de Noordsee her treckt jümmers mal wedder hogen Daak dör, un an de Küst kann dat ok en beten pladdern. Bi 16 bet 11 Graad. Morgen: Vele Wulken, Sünnschien blots af un an mal, un an de Küst kann dat ok drüppeln. Eerst an’n Avend luuschert de Sünn en beten mehr dör de Wulken dör. Dat Ganze bi 20 bet 23 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.