Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 16. Juli 2021

Plattdüütsche Narichten vun'n 16. Juli 2021

Audio vom 16. Juli 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Unweerkatastroof: Tall vun Doden stiggt in NRW un Rheinland-Pfalz +++ Merkel in Washington: Tosamenarbeit schall beter warrn +++ Corona-Tallen: RKI vermellt Towass +++ Bremen plaant Imp-Angebott för 12- bet 15-Johrige +++ Bremer Landgericht verurdeelt Drogenhöker in Enchrochat-Verfohren +++ Dat Weer

Informationen zum Audio

Unweerkatastroof: Tall vun Doden stiggt in NRW un Rheinland-Pfalz

Köln: De Tall vun Doden bi de Unweer-Katastroof in’n Westen vun Düütschland is böös anstegen. Alleen in’n Kreis Ahrweiler in Rheinland-Pfalz sünd na Utkunft vun de Polizei mehr as 50 Minschen doodbleven. In Nordrhein-Westfalen weern dat tominnst 30 Minschen. Veele Lüüd ward noch vermisst. De Laag is viegeliensch, denn an veele Steden is dat Stroom- un Telefonnetz utfullen, un de Hölpsinsätz sünd noch nich afslaten. In veele Kreisen in de Eifel is de Katastrofenalarm utlöst worrn. Dat Ahrtal in Rheinland-Pfalz is jümmers noch vun de Butenwelt ofsneden. Opstünns föhrt keen Tofohrtsstraten in dat Flach, as de Polizei vermellt. Ok in’n Kreis Euskarken in Nordrhein-Westfalen is de Laag bannig leeg.

Merkel in Washington: Tosamenarbeit schall beter warrn

Washington: Düütschland un de USA wüllt in Tokunft beter tosamenarbeiden. Dat hebbt Kanzlersche Merkel un US-Präsident Biden bi en Drapen in’t Witte Huus afmaakt. De beiden Länner plaant tosamen en Tokunftsforum. Ok en Klima- un Energiepartnerschaft schall dat geven. Opstünns is dat Inreisen vun europääsche Lüüd in de USA wegen de Pandemie in Schranken sett. Biden hett aver toseggt, datt he sik dat noch mal nipp un nau ankieken will. Dat kann angahn, datt dat al in de tokamen Daag en Lösung ok för düütsche Staatsbörgers gifft.  

Corona-Tallen: RKI vermellt Towass

Berlin: As dat Robert Koch-Institut vermellt, stiggt de Tall vun Corona-Neeinfekschonen in Düütschland wieter an. Vun güstern Morgen an hett dat RKI mehr as 1.450 Fallen noteert. Dat sünd meist 500 mehr as een Week tovör. De Söben-Daag-Wert stiggt op 8,6. In’t Land Bremen sünd 17 nee’e Infekschonen dortokamen, all in de Stadt Bremen. Dor stiggt de Inzidenz vun 12,5 op 13,9. In Bremerhaben is de Wert vun 1,8 op 0,9 daalfullen.     

Bremen plaant Imp-Angebott för 12- bet 15-Johrige

Bremen: Dat Bremer Gesundheitsressort will nu ok för de 12- bet 15-Johrigen in’t Land Bremen en Angebott för’t Impen maken. Dat hett de Gesundheitssenatersche Bernhard to „buten un binnen“ seggt. De Stännige Impkommischoon hett dat twars för düsse Öllersgrupp nich anraden, wat to Anfang för en Hen un Her sörgt hett, säe Bernhard. Liekers will Bremen nu so en Angebott inrichten. Wannehr dat Impen passeern schall, is noch nich klaar. De Senaat will dat aver hüüt fastsetten.     

Bremer Landgericht verurdeelt Drogenhöker in Enchrochat-Verfohren

Bremen: Dat Bremer Landgericht hett in dat eerste vun de so nöömten Enchrochat-Verfohren en Drogenhöker för meist acht Johr achter de Trallen schickt. Bavento lett dat Gericht 400.000 Euro vun sien Vermögen intrecken. De 30-Johrige hett mit en groden Barg vun Marihuana un Kokain hannelt un ok en illegale Scheetwaff hatt. Sien Hannel hett he över Enchrochat afwickelt,  dat Narichten för anner Lüüd unkennbor maakt. De franzöös’sche Polizei hett de Technik aver knackt un de düütschen Kollegen informeert. Wietere Gerichtsperzesse schüllt nu nakamen.   

Dat Weer

Un nu en Blick op dat Weer: in Cloppenborg 17, an’n Bremer Flegerhaben un op Borkum 18, in Bremerhaben 19, un in Ollenborg sünd dat opstünns 22 Graad. Hüüt is de Heben dicht wulkig. In’t Ollenborger Münsterland un Emsland kann dat ok Schuer geven. Af un an schient aver ok de Sünn. Vun Middag oder Namiddag an löst sik de Wulkenfeller mehr un mehr op, so datt de Sünn betere Schangsen hett. Meisttiets blifft dat dröög bi 20 bet 21 Graad op de Eilannen un 23 bet 27 Graad an’t Fastland. In de Nacht is de Heven to Anfang klaar, later licht wulkig un dat blifft dröög. To’n Morgen hen kann dat hier un dor Daak geven bi 18 bet 14 Graad. Morgen is dat blangen de Flachen mit Daak meisttiets fründlich un dröög. Dichte Wulken kann dat geven, de sik later oplöst un de Sünn dörlaat bi 20 bet 24 Graad. An’n Sünndag gifft dat en fründlichen Wessel vun dichte Wulken un Sünnschien, dorbi is dat dröög un puustig bi 20 bet 23 Graad.

Dat weern de Narichten op platt. Tohoopstellt hett se Peter Behrendt. Op Platt trechtmaakt un vörleest vun Marc Gelhart.