Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 15. Juli 2021

Plattdüütsche Narichten vun'n 15. Juli 2021

Audio vom 15. Juli 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Bi rusig Weer in Düütschland tominnst söss Minschen doodbleven +++ Biden begrööt Merkel in Washington +++ Delta-Variant breddt sik wieter ut +++ Bremen mutt woll AstraZeneca wegkippen +++ Bremer Polizei vermellt mehr Straafdelikten an Slacht un Oosterdiek +++ Dat Weer

Informationen zum Audio

Bi rusig Weer in Düütschland tominnst söss Minschen doodbleven

Schuld: Bi rusig Weer un Hoochwater in Nordrhein-Westfalen un Rheinland-Pfalz sünd tominnst söss Minschen to Dode kamen. In Nordrhein-Westfalen sünd twee Füerwehrlüüd doodbleven. In Ahrweiler in Rheinland-Pfalz sünd veer Minschen stürven. Wo genau is opstünns noch nich klaar. In de Gemeend Schuld in de Eifel sünd söss Hüüs instört. As de Polizei vermellt, söökt se na üm un bi 30 Minschen. 25 wietere Hüüs sünd ok nich mehr seker un köönt mööglicherwies tohoopfallen.

Biden begrööt Merkel in Washington

Washington: Bunnskanzlersche Merkel is to ehren Besöök in de US-Hauptstadt ankamen. US-Präsident Biden ward se dor in’t Witte Huus to Gast hebben. Wohrschienlich ward dat en Hen un Her över Themen as de Gas-Pipeline Nordstream 2 un dat Verbodd vun’t Inreisen för europääsche Lüüd in de USA wegen de Pandemie geven. Bavento schall dat en Drapen mit Viezpräsident Harris geven. De Besöök schall en Neeanfang in dat düütsch-amerikaansche Mitnanner ween. Ünner Bidens Vörgänger Trump weer dütt Mitnanner düütlich leger worrn.

Delta-Variant beddt sik wieter ut

Berlin: De Delta-Variant vun dat Corona-Virus breddt sik in Düütschland jümmer mehr ut. As dat Robert Koch-Institut vermellt, ward de Mutatschoon middewiel in meist dree Viddel vun de ünnersökten Proven nawiest. De Delta-Variant is in Indien funnen worrn un gellt as düütlich anstekender as annere Formen vun dat Virus. De Tall vun Neeinfekschonen is in Düütschland wieter hoochgahn. Dat Robert Koch-Institut vermellt meist 1600 nee’e Fallen – dat sünd meist 700 mehr as verleden Dunnersdag. De Söben-Daag-Wert is bunnswiet op 8 stegen. Een Week tovör leeg he noch bi 5,2.     

Bremen mutt woll AstraZeneca wegkippen

Bremen: In’t Land Bremen drauhen meist 40.000 Impdosen vun AstraZeneca to verfallen. As „buten un binnen“ rutfunnen hett, liggt dat doran, datt de Nafraag trüchgahn is. Na dat de Stännige Impkommischoon vun AstraZeneca as twete Sprütt afraden hett, will meist keeneen mehr dütt Impmiddel hebben. Alleen in’n Juli verfallt de Döögde vun 1500 Impdosen vun AstraZeneca, as dat Gesundheitsamt vermellt. Dat Ressort hoopt nu, datt se tominnst en poor vun de Dosen för dat Krüüz-Impen bruken köönt.  

Bremer Polizei vermellt mehr Straafdelikten an Slacht un Oosterdiek

Bremen: An de Bremer Slacht un an’n Oosterdiek gifft dat jümmer mehr Verbreken. Dat geiht ut de aktuellen Tallen vun de Polizei vör, de „buten un binnen“ vörliggt. In de verleden söss Weken hett de Polizei dor meist dreemal so veele Schimpereen un Roovdelikten bestraft as in’t verleden Johr. Se seht den Grund för de hogen Tallen in dat Dichtmaken vun de Clubs an de Discomiel in de Neegde vun’n Bremer Hauptbahnhoff.

Dat Weer

Un nu en Blick op dat Weer: in Emmen 18, in Möppen 19, in Bremerhaben 20, un an’n Bremer Flegerhaben sünd dat opstünns 22 Graad. Hüüt Vörmiddag treckt besünners vun’n Landkreis Cuxhaben bet na Oostfreesland veele Wulken mit Schuer dör. Anners schient vun Tiet to Tiet de Sünn. An’n Namiddag ward de Wulken in’t Binnenland wedder dichter, un dat kann enkelte Schuer un Gewidder geven. Dat Thermometer kladdert op 22 bet 25 Graad an’t Fastland, op de Eilannen blifft dat’n beten köhler bi 20 bet 21 Graad. In de Nacht laat de mehrsten Schuer un Gewidder na. De Wulken lockert af un an ok mal op, to’n Morgen hen billt sik aver vun de Noordsee her wedder dichtere Wulkenfeller. Dat blifft meisttiets dröög bi 18 bet 14 Graad. Morgen is dat eerst dicht wulkig, af un an mit Schuer. Later löst sik de Wulkenfeller op un maakt Platz för de Sünn bi 20 bet 26  Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.