Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 30. Juni 2021

Plattdüütsche Narichten vun'n 30. Juni 2021

Audio vom 30. Juni 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Tahl vun Lüüd ahn Arbeit sackt düütlich daal +++ Dusende Patschenten hebbt noch lang wat dormit to doon, wat achteran de Coronainfektschoon nakummt +++ Plicht för Huuskontor geiht toenn +++ Letzte Bunnswehrsuldaten sünd rut ut Afghanistan +++ Mit ruusig Weer hebbt Hölpslüüd in Ostfreesland to doon +++ Dat Weer

Informationen zum Audio

Tahl vun Lüüd ahn Arbeit sackt düütlich daal

Nörnbarg: De Tahl vun Minschen ahn Arbeit in Düütschland is in´n Juni düütlich daal sackt. De Bunnsagentur för Arbeit mellt, dat nu um un bi
2,6 Millioon Minschen kien Job hebbt – dat sünd 73.000 weniger as in den Maimaand. So stark sünd de Tahlen opletzt vör teihn Johren daal sackt. In dat Land Bremen weren knapp 39.000 Minschen ahn Arbeit – um un bi 1200 weniger as verleden Maand. Neddersassen mellt um un bi 242.000 Lüüd ahn Arbeit – dat sünd rund 7600 weniger.

Dusende Patschenten hebbt noch lang wat dormit to doon, wat achteran de Coronainfektschoon nakummt

Berlin: Jümmer mehr Minschen hebbt, as dat utsüht, mit dat wat achteran ene Coronainfektschoon nakummt to doon. Dat steiht in en Bidrag vun de Barmer. De tweetgröttste Krankenkass hett twüschen Harvst un Fröhjohr de Daten vun jümehr Versekerten utweert. To de Tiet harrn um un bi dree-dusend mit dat „Long-Covid-Syndrom“ to doon, mehr Froens as Mannslüüd. De Düütsche Rentenversekerung rekent dormit, dat mehr Minschen ene Reha bruken, vunwegen wat achteran ene Coronainfektschon naklappt.

Plicht för Huuskontor geiht toenn

Berlin: In Düütschland geiht hüüt de „Bunnsnootbrems“ toenn. För Ünnernehmen heet dat, dat se nu nich mehr in´ne Plicht sünd Huuskontor antobeden, ok wenn´t geiht. De SPD-Gesundheitsfachmann Lauterbach is wiederhen dorför, dat Arbeiters vun tohuus ut arbeiden dröfft. De Situatschoon is nich ahn Gefohr, wiel en grooten Deel Minschen noch nich, or blots eenmol impft sünd, see he to de Funke Mediengrupp. Sien Raad is: De Arbeiters in Amtsstuven wiederhen tweemol in´ne Week to testen, üm aftowennen, dat sik vele Minschen anstekt.

Letzte Bunnswehrsuldaten sünd rut ut Afghanistan

Berlin: Na binah twintig Johren hett de Bunnswehr jümehrn Afghanistan-Insatz toenn brocht. Dat Ministerium för´t Verdeffenderen hett an Avend vermellt, dat nu all Suldaten dat Land verlaten hebbt. Se wurrn mit Militärmaschinen ut dat Lager in Masari-i-Scharif rutflagen. Ministersch för´t Verdeffenderen Kramp-Karrenbauer see, mit dat aftrecken vun de letzten Suldaten geiht en historisch Kapittel toenn. De Insatz hett de Bunnswehr fordert un weer en Leitthema. All tohoop weren um un bi
150.000 düütsche Suldaten in Afghanistan togange – 59 sünd dorbi sturven.

Mit ruusig Weer hebbt Hölpslüüd in Ostfreesland to doon

Wittmund: Bet in de Nacht hebbt Hölpslüüd dormit to doon, wat dat ruusig Weer kaputt maakt hett. Dat technische Hölpswark hett Spezialpumpen insett un de Buern ehre Jüüchwagen, üm dat Waater aftpumpen. An mancheen Steed hett dat soveel regent, dat mehr as 100 Liters per Quadraatmeter tohoop kemen. In den Kreis Wittmund harrn bet to 200 Füerwehrlüüd dormit to doon Keller vun´t Water to befreen. Böös Schaden mellen ok Gannersee un Harpstedt in den Kreis Ollenborg.

Dat Weer

Un nu kiekt wi op dat Weer: In Wilhelmshaven hebbt wi 15 Graad, in Bremen un Bremerhaven 16 Graad un in Deefholt sünd dat opstunns 18 Graad. Vundaag sünd dicke Wulken an Heven, de ok den ganzen Dag blieven. Eerst drüppelt dat jümmer mal wedder, övern Dag kann dat kräftige Regenschuer geven, mag ween ok Gewidder. De Sünn warrt dat woll hüüt nich schaffen. De Wind weiht flau, an de Küst un op de Eilannen in Maaten un böig frisch vun de noordwesten Kant. Dat Thermometer wiest us 17 bet 22 Graad. In de Nacht hangen wiederhen dicke Wulken an Heven, vun de Elv her sünd gewittrige Schuer mööglich. Regen is över lange Tiet un massig mööglich. Dorbi sackt dat Thermometer op 15 bet 13 Graad. Morgen wedder vele Wulken, mit Schuern un Gewidder. De Sünn kiekt hier un dor mol kort vörbi un dat denn bi 18 bet 20 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.