Jetzt läuft:

10cc Dreadlock Holiday
  • Jetzt läuft:

    10cc Dreadlock Holiday
  • Davor lief:

  • Um> 23:51 Uhr lief: Billy Joel Uptown Girl
  • Um> 23:47 Uhr lief: Katie Melua Your Longing Is Gone
  • Um> 23:44 Uhr lief: Los Bravos Black Is Black
  • Um> 23:39 Uhr lief: Achim Reichel Der Spieler
  • Um> 23:34 Uhr lief: Whitney Houston I Will Always Love You
  • Um> 23:30 Uhr lief: Slade Far Far Away
  • Um> 23:26 Uhr lief: Michael Patrick Kelly Roundabouts
  • Um> 23:19 Uhr lief: José Feliciano Loving Her Was Easier
  • Um> 23:16 Uhr lief: Madonna Like A Virgin

Nachtprogramm

Plattdeutsche Nachrichten Plattdüütsche Narichten vun'n 25. Juni 2021

Plattdüütsche Narichten vun'n 25. Juni 2021

Audio vom 25. Juni 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

EU-Gipfel will keen Top Drepen mit Putin +++ Bunnsdag: Verdrääg för Handys gellt blots noch een Johr +++ Bunnsrat stimmt över letzte Gesetzesvörhaben vun de Koalition af +++ Pendlers mööt rund üm Bremen mit Maleschen reken +++ Spezialtransport mit halven Damper kummt in Ollnborg an +++ Dat Weer

Informationen zum Audio

EU-Gipfel will keen Top Drepen mit Putin

Brüssel: De Mackers ut de EU willt in Tokunft strenger op Hacker Angrepen or Geheemdeenstaktionen reageeren. Dorop hebbt sik de Staats- un Regeerungsbosse bi ehr Top-Drepen fastleggt. Se willt nu eenen Plaan för Strafen utarbeiden, wo se denn ok gegen de Wirtschaft scharper vörgaht. Man een Top-Drepen mit Putin willt se nich. Dat harrn Kanzlersch Merkel un de franzöösche Präsident Macron vörslaan. Dat Drepen geiht hütt wieder.

Bunnsdag: Verdrääg för Handys gellt blots noch een Johr

Berlin: De Looptiet för Verdrääg vun Handys, Streaming-Deenste or Mucki-Buden warrt per Gesetz inschränkt. De Bunnsdag hett an´t fröhen Morrn besluten, dat düsse Verdrääg blots noch een Johr gellt. De Frist to künnigen warrd vun dree op eenen Maand daalsett. Buterdem hebbt se een Gesetzpaket gegen Extremismus un Antisemitismus op den Weg bröcht. Un dat schall strengere Strafen för Stalker geven. Un ok dat Infektionsschutzgesetz willt se anners maken.

Bunnsrat stimmt över letzte Gesetzesvörhaben vun de Koalition af

Berlin: De Bunnsrat hett in ehre letzte Sitzung vör de Sommerpaus so veel Saaken to besnacken as noch nie. Dor staht hütt 86 Gesetze ut den Bunnsdag op`t Tapeet. Ok willt se över mehr Geld för Kinner- un Jugendstationen in Krankenhüüs snacken un över beteren Schutz vun Versehrte vun Gewalt, de keen Recht hebbt hier in Düütschland to blieven.

Pendlers mööt rund üm Bremen mit Maleschen reken

Bremen: In Bremen un umto kann dat in de kamen Daag to grote Probleme in´t Statenverkehr kamen. De Isenbahnverkehr twischen Achim un Bremen is för acht Daag sperrt. Dor glövt se, dat dor noch Bomben ut den Weltkrieg liggt. Buterdem is de B 75 twischen Bremen-Huchting un Delmhorst siet hütt morrn sperrt, dor warrt boet. Plaant is, dat man dor an´t Sünndag Avend wedder dör kann.

Spezialtransport mit halven Damper kummt in Ollnborg an

Ollnborg: De eerste Hälfte vun eenen olen Utfloogsdamper is in de Nacht in Ollnborg ankamen. De knapp 33 Meter lange Spezialtransport güng, vun´t Bad Twüschenahner Meer an, knapp 20 Kilometers över de Landstraat un Autobahn. De tweete Hälfte willt se hütt transporteeren. Den Damper hebbt se vör den Transport extra utenanner sägt. Anfang Juli willt se dat Schipp wedder tohoop schweißen un to een Gasthuus-Schipp ümboen.

Dat Weer

Un nu een Blick op dat Weer: in Cuxhaben 15, in Achim, an den Bremer Flegerhaben un an de Fischreehabenslüüs in Bremerhaben sünd dat opstunns 16 Graad. Hüüt schient meist den ganzen Dag de Sünn. Dor kummt blots so´n paar Wulken twischen Weser un Elb op, man dat blifft meist dröge, bi 20 bit 24 Graad. Tokamen Nacht hier un dor een paar dichte Wulkenfeller, man wi könnt ok af un an de Sterns funkeln sehn. Dat kann ok mal so´n beten pieseln. Dat Thermometer sackt op 15 bit 10 Graad. Morrn is dat jüst so wesselhaft. Mal dichte, mal lockere Wulkenfeller un dat kann jümmers wedder Schuers geven. To´n Nomdag hen is ok Blitz un Dunnerslag mööglich, bi 21 bit 25 Graad. Sünndag lacht us meist de Sünn an un dat blifft dröge, bi 21 bit 27 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Antje Kruppa.