Jetzt läuft:

Whitney Houston I Will Always Love You
  • Jetzt läuft:

    Whitney Houston I Will Always Love You
  • Davor lief:

  • Um> 14:21 Uhr lief: Leo Sayer One Man Band
  • Um> 14:18 Uhr lief: DÖF Codo
  • Um> 14:15 Uhr lief: Lost Frequencies Are You With Me
  • Um> 14:08 Uhr lief: The Who Behind Blue Eyes
  • Um> 14:05 Uhr lief: Bangles Walk Like An Egyptian
  • Um> 13:56 Uhr lief: Genesis That's All
  • Um> 13:50 Uhr lief: Electric Light Orchestra Sweet Talkin' Woman
  • Um> 13:47 Uhr lief: David Christie Saddle Up
  • Um> 13:44 Uhr lief: The Tokens The Lion Sleeps Tonight

Der Nachmittag mit Norbert Kuntze

Plattdeutsche Nachrichten Plattdüütsche Narichten vun'n 8. Juni 2021

Plattdüütsche Narichten vun'n 8. Juni 2021

Audio vom 8. Juni 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Geldgevers vun de Greesill-Bank versammelt sik +++ Sachsen-Anhalt: Kenia-Koalitschoon löppt nich wieder +++ Weniger Corona-Kranke +++ Vörslääg för Rentenreform +++ Wennehr kummt de Bremer Sommerwisch? +++ Dat Weer

Informationen zum Audio

Geldgevers vun de Greesill-Bank versammelt sik

Bremen: Wo de Bremer Greensill-Bank bankrott is, löppt jüst de eerste Versammlung vun de, bi de de Bank Schulden hett. Wo vele Geldgevers na de Versammlung henkaamt, is nich kloor. Un ok: Wo veel Geld warrt dor egens verlangt? Lüüd, de sik utkennt, meent: Bet allens oplööst is, warrt dat woll Johren duern. De Bank harr to vele Schulden maakt, dorüm harr de Finanzopsicht Bafin ehr Anfang März dichtmaakt. Mehr as 20.000 Privatminschen harrn jümehr Geld bi de Greensill-Bank anleggt.

Sachsen-Anhalt: Kenia-Koalitschoon löppt nich wieder

Maideborg: De Kenia-Koalitschoon in Sassen-Anholt löppt nich wieder. Güstern Avend hebbt de Grönen anseggt: Mit de CDU un de SPD gaht se nich wedder tohoop. Ok wenn de Grönen dor nich mit bi weren, harrn CDU un SPD tosamen een Stimm mehr as se bruukt. Mit de CDU un de FDP wörrn de Grönen in Sassen-Anholt aver tohoopgahn. Vundaag snackt de neen Frakschonen över den Kurs, den se stüern wüllt.

Weniger Corona-Kranke

Berlin: Jümmers weniger Minschen in Düütschland sünd corona-krank. Dat Robert-Koch-Institut hett siet güstern üm un bi 1200 ne’e Corona-Kranke tellt. Dat sünd sowat 500 weniger as vör een Week. An oder mit Corona storven sünd noch mal 140 Minschen. In’t Land Bremen vermellt dat Gesundheitsamt 2 ne’e Kranke, in Neddersassen sünd dat 54.

Vörslääg för Rentenreform

Berlin: Wetenschaftlers hebbt vörslaan: De Minschen schüllt eerst later Rentengeld kriegen. Blots wenn dat Öllersgeld eerst mit 68 kummt, kunn dat System ok in Tokunft betahlt warrn. Dat schrifft de wetenschaftliche Biraat bi dat Bunnswirtschaftsministerium. De Beraders slaat vör: De Rentenanfang schall verknütt warrn mit de Fraag, wo oolt de Minschen normal warrt. Wenn dat nich maakt warrt, müss de Staat kloor mehr Geld in de Rentenkass ringeven. Oder de Bidrääg müssen hoochsett warrn.

Wennehr kummt de Bremer Sommerwisch?

Bremen: Dat lett: För de Sommerwisch op de Bremer Börgerweid hebbt se en Tiet utkeken. In den Werser-Kurier steiht to lesen: De Johrmarksbedriever sünd mit de Wirtschaftsbehöörd övereenkamen: De Sommerwisch löppt vun den 23. Juli bet to den 8. August. Vundaag will de Senat över de Saak snacken. Fastleggen warrt se dat woll eerst tokamen Week.

Dat Weer

Un woans süht dat mit dat Weer umto ut? Opstunns hebbt wi in Wittmund 14 Graad, in Bremen, Bremerhaven un Bassen sünd dat 17 Graad. Vundaag: Wenn sik de Daak un de Wulken oplööst hebbt, lacht uns vun Oostfreesland över den Jaadbusen bet hen na dat Natte Dree-Eck ok en längere Tietlang de Sünn. In’t Binnenland mal hell un dröög, mal opstiegen düüster Wulken. En beten pladdern kann dat blots an’n Namiddag un Avend vun Deefholt bet hen na den Heidekreis. Dat Thermometer krabbelt op 22 bet 24 Graad, an de See 17 bet 21. De Wind dorto weiht flau vun de noorden Kant. Tokamen Nacht: Blots in’n Süden eerst noch en poor Wulken, denn aver överall kloor un dröög. Bi 13 bet 7 Graad. Morgen: Vörmiddags Sünnschien satt. Vun Middag op an kaamt in’t Binnenland Quellwulken op, de Sünn hett aver ok hier de Bavenhand. Dat Ganze bi 22 bet 26 Graad, an de See 17 bet 21. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.