Jetzt läuft:

Simply Red Something Got Me Started
  • Jetzt läuft:

    Simply Red Something Got Me Started
  • Davor lief:

  • Um> 23:51 Uhr lief: Jennifer Rush The Power Of Love
  • Um> 23:48 Uhr lief: The Small Faces Lazy Sunday
  • Um> 23:44 Uhr lief: Bruno Mars Marry You
  • Um> 23:40 Uhr lief: Agnetha Fältskog Wrap Your Arms Around Me
  • Um> 23:35 Uhr lief: Steve Miller Band The Joker
  • Um> 23:30 Uhr lief: Paul Young Come Back And Stay
  • Um> 23:25 Uhr lief: Emma Bunton What Took You So Long?
  • Um> 23:21 Uhr lief: Pink Floyd Hey You
  • Um> 23:17 Uhr lief: Kate Bush Babooshka

Nachtprogramm

Plattdeutsche Nachrichten Plattdüütsche Narichten vun'n 04. Mai 2021

Plattdüütsche Narichten vun'n 04. Mai 2021

Audio vom 4. Mai 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Bremen plaant dat Lüüd, de impft sünd un Lüüd de na de Corona-Infektschoon wedder gesund sünd, mehr maken dröfft +++ De Minsch de woll de NSU 2.0-Drauhbrefe schreven hett, wurr fastsett +++ Bi´t tosamenbreken vun ene Brüch in Mexico sünd tominnst 20 Minschen doot bleven +++ Deefholt treckt Nootbrems nadem sik de Corona-Virus op en Spargelhoff utbreet hett +++ Wersernett schafft en wiederen Stapp bi Gasümstellung +++ Dat Weer

Informationen zum Audio

Bremen plaant dat Lüüd, de impft sünd un Lüüd de na de Corona-Infektschoon wedder gesund sünd, mehr maken dröfft

Bremen: De Bremer Senaat will an Vörmiddag op´n Weg bringen, dat Lüüd de al impft sünd un Lüüd de achteran se dat Virus hatt hebbt wedder gesund sünd, mehr maken dröfft. Se bruukt denn in Tokunft kiene Coronatests mehr maken, wenn se to´n Bispill in den Zoo wüllt or to´n Putzbüddel. Wenn de Senaat „ja“ seggt to den Plaan, mutt düsse Week noch de Börgerschop doröver snacken. De nee Regel künnt denn vun Freedag af an gellen. Dat düsse Lüüd denn ok mehr Kuntakt to annere Lüüd hebben dröfft, dor will Bremens Börgermeister Bovenschulte aver noch nich ran.

De Minsch de woll de NSU 2.0-Drauhbrefe schreven hett, wurr fastsett

Berlin: De Schriever de woll de rechtsextremen Drauhbrefe mit den Afsenner „NSU 2.0“ schreven hett, wurr fastsett. Na de Staatsanwanwaltschop Frankfurt am Main hett de Polizei den Mann in Berlin tofaat kregen. De 53-Johrige hett woll in ganz Düütschland ene Reeg vun Drauhbrefen verschickt, wo he gegen Volksgruppen ophisst, beleidigt un drauht. Düsse Brefe hebbt meist Minschen ut Politik un Medien kregen.

Bi´t tosamenbreken vun ene Brüch in Mexico sünd tominnst 20 Minschen doot bleven

Mexico-Stadt: In de mexikaanschen Hauptstadt is ene U-Bahn-Brüch tosamensackt. De Behörden mellen, dat dorbi tominnst twintig Minschen doot bleven sünd bavento sünd vele wiedere Minschen an Lief to schaden kamen. Biller ut ene Kamera de allens opnimmt wiesen, dat de Brüch tosamensackt weer, as just ene Bahn doröver weg fahren is. Mehrere Wagen sünd denn op de Straat daalfullen. Anwahners hebbt künnig maakt, dat se al vör Johren Schadens an Deelen vun de Brüch mellt harrn.

Deefholt treckt Nootbrems nadem sik de Corona-Virus op en Spargelhoff utbreet hett

Kirchdorf: Nadem sik dat Coronavirus op en Spargelhoff utbreet hett, gellt vun morgen af an de Bunns-Nootbrems in den Kreis Deefholt. Op den Hoff vun en Spargelbuern harrn sik um un bi 90 Minschen anstickt, de meist all tohoop wahnt. De Söven-Dag-Tahl liggt siet verleden Wekenenn över 100 – Neddersassen sett af düssen Weert de Regel scharper üm. Dat heet denn, dat de Lüüd in de Nacht nich mehr rutdröfft un se mööt ok jümehren Kuntakt inschränken. Kitas maakt dicht un en grooten Deel vun de Schoolkinner mööt wedder vun tohuus ut lehren.

Wersernett schafft en wiederen Stapp bi Gasümstellung

Bremen: Wersernett is mit de Gasümstellung in de Stadt Bremen un in den Gemeenden Stuhr, Weyh un Theenhusen fardig. Siet güstern Avend ströömt överall blots noch H-Gas. Dorför wurrn all tohoop 170.000 Gasinstrumente bi Kunnen ümstellt. Bet Enn 2021 schall ok ganz Bremerhaven mit H-Gas versoorgt ween. De Ümstellung wurr nöödig, wiel dat L-Gas, wat betnu bruukt wurr, man blots noch knapp ünnerstütt warrt.

Dat Weer

Un nu kiekt wi op dat Weer: In Bremen hebbt wi acht Graad, in Bremerhaven un Ollenborg sünd dat negen Graad un in Leer hebbt wi opstunns teihn Graad. Vundaag seht wi dicke Wulken an Heven un dat pladdert jümmer wedder. An Vörmiddag kriegt wi in de Hauptsaak an´ne Noordsee kräftige Schuer, an Namiddag kann dat ok Blitz un Donnerslag geven. Twüschendör, kickt ok mal de Sünn ruut. De Wind weiht frisch bet in Maaten, an´ne See stark bet stöörmsch vun de süüdwesten bet westen Kant. Dat Thermometer schafft dat op teihn bet twolf Graad. In de Nacht hangt de Heven wedder vull Wulken. Vun Ostfreesland, över den Jadebusen bet hen na´t Land Kehdingen pladdert dat meist ok mal kräftig. Vun´t Emsland över Bremen bet to de Wümmeniederungen un ok wieder na´n Süüden warrn de Wulken ok mal weniger aver ok dor sünd verenkelte Regenschuer mööglich. Un dat denn bi söven bet fief Graad. Morgen regent dat meist nöördlich vun Bremen, wieldess in süüden dorvun de Sünn ok mal lacht. Dor regent dat blots noch af un an. An Vörmiddag un över Middag breden sik vun de Noordsee her dicke Wulken ut, de denn nich blots Regen un Grisselgrussel mitbringt, man ok Blitz un Dunnerslag. Na´n Avend hen warrt dat weniger un de Sünn sliekert sik vun de Ems her ran. Dat Thermometer schafft dat op acht bet ölven Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.