Jetzt läuft:

Simply Red Something Got Me Started
  • Jetzt läuft:

    Simply Red Something Got Me Started
  • Davor lief:

  • Um> 23:51 Uhr lief: Jennifer Rush The Power Of Love
  • Um> 23:48 Uhr lief: The Small Faces Lazy Sunday
  • Um> 23:44 Uhr lief: Bruno Mars Marry You
  • Um> 23:40 Uhr lief: Agnetha Fältskog Wrap Your Arms Around Me
  • Um> 23:35 Uhr lief: Steve Miller Band The Joker
  • Um> 23:30 Uhr lief: Paul Young Come Back And Stay
  • Um> 23:25 Uhr lief: Emma Bunton What Took You So Long?
  • Um> 23:21 Uhr lief: Pink Floyd Hey You
  • Um> 23:17 Uhr lief: Kate Bush Babooshka

Nachtprogramm

Plattdeutsche Nachrichten Plattdüütsche Narichten vun'n 15. April 2021

Plattdüütsche Narichten vun'n 15. April 2021

Audio vom 15. April 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Nato treckt Truppen ut Afghanistan af +++ Mietendeckel in Berlin kippt +++ BamF-Perzess fangt an +++ Een Minsch bi Unfall mit Stroom doodbleven +++ Kerkeling kriggt Bremer Filmpries +++ Dat Weer

Informationen zum Audio

Nato treckt Truppen ut Afghanistan af

Brüssel: Na de USA hett nu ok de Nato offiziell beslaten, datt se de Truppen heel un deel ut Afghanistan aftrecken wüllt. De Butenminister un de Minister för’t Deffenderen vun de 30 Mitgliedsstaaten hebbt sik dorop enigt, datt se dormit an’n 1. Mai anfangt. Nato-Generalsekretär Stoltenberg säe, datt’n dat nipp un nau planen mutt, dormit dat akkraat aflöppt. Kritikers sünd bang, datt dorüm de Börgerkrieg wedder opflammt. Opstünns sünd noch üm un bi 10.000 Soldaten ut de Nato-Länder un de Partnernatschonen in Afghanistan.      

Mietendeckel in Berlin kippt

Karlsroh: Dat Bunnsverfatensgericht hett den Mietendeckel in Berlin kippt. Dat Gesetz is nich rechtens, so dat Ordeel, dat hüüt künnig maakt worrn is. De rood-rood-gröne Landsregeern in Berlin hett in’n Februar 2020 de Hüür för 1,5 Millionen Wahnungen op den Stand vun Juni 2019 infroren. Vun 2022 an dröfft de Vermieters de Inflatschoon utglieken. Wenn nee’e Mieters intrecken, blifft dat bi de oole Hüür. Bavento gifft dat ok Grenzen na baben.  

BamF-Perzess fangt an

Bremen: Mehr as dusend Mal schall de fröhere Böverste vun de Bremer Butenstäe vun’t Bunnsamt för Migratschoon un Flüchtlinge, kort BamF, Asylandragen afnickt hebben, ahn dat se sik de nipp un nau ankeken hett. Vör dree Johr is vun Korrupschoon un Asylmissbruuk snackt worrn. Toletzt hett aver dat Landgericht Bremen de Anklaag vun de Staatsanwaltschaft tosamenstreken. Vun de 121 Verbreken, de toeerst anklaagt weern, sünd blots 22 överbleven. Hüüt hett de Perzess vör dat Landgericht Bremen anfungen.

Een Minsch bi Unfall mit Stroom doodbleven

Bremen: Bi en Unfall mit Stroom in Bremen-Horn is güstern Namiddag een Mann doodbleven un een Füerwehrmann levensgefährlich versehrt worrn. Betto is noch nich klaar, worüm de Ingangsdöör vun en Huus mit Büros un Dokterpraxen ünner Stroom stünn. Bavento geev dat Henwiesen, datt woll ok de Döör to en Ruum mit acht Kinner ünner Stroom stünn. De Füerwehr hett de Kinner wahrschaut un dör en Finster över en Dreihledder ruuthaalt. De Saak ward nu nipp un nau vun de Polizei unnersöcht.

Kerkeling kriggt Bremer Filmpries

Bremen: De Komiker un Schriever Hape Kerkeling kriggt hüüt de Bremer Filmpries. He ward för sien komödiantisch Gesamtwark ehrt. De Priesrichters hebbt dorbi besünners sien Kunstfigur Horst Schlämmer un Sendungen as „Total normal“ un „Doröver lacht de Welt“ loovt. Dat Priesgeld bedrägt 5000 Euro.

Dat Weer

Un nu en Blick op dat Weer: in Deefholt un Nienborg 4, an’n Bremer Flegerhaben un in Bremerhaben 6, op Borkum 7, un in Carolinensiel sünd dat opstünns 9 Graad. Hüüt is dat eerst meisttiets sünnig. An’n Vörmiddag löst sik de leste Daak op, un de Sünn is överall to sehn. An’n Middag un Namiddag trecken Wulkenfeller vun de Elv her un schuuvt sik vör de Sünn. Regenschuer gifft dat aver blots hier un dor. Twüschen Oostfreesland un Emsland blifft dat de mehrste Tiet fründlich bi 9 bet 11 Graad. In de Nacht sünd mal mehr, mal weniger Wulken ünnerwegens un dat blifft överall dröög. Besünners twüschen Emsland un Noordsee sünd ok mal de Steerns to sehn. De Luft köhlt sik af op 3 Graad över bet 1 Graad ünner Null. Morgen schient fakener de Sünn. Vun de Elv her trecken Wulkenfeller dör, aver ahn Regen. Dat ward’n beten lauer mit 10 bet 12 Graad.

Dat weern de Narichten op platt. Tohoopstellt hett se Ulrike Müller. Op Platt trechtmaakt un vörleest vun Marc Gelhart.