Jetzt läuft:

Simply Red Something Got Me Started
  • Jetzt läuft:

    Simply Red Something Got Me Started
  • Davor lief:

  • Um> 23:51 Uhr lief: Jennifer Rush The Power Of Love
  • Um> 23:48 Uhr lief: The Small Faces Lazy Sunday
  • Um> 23:44 Uhr lief: Bruno Mars Marry You
  • Um> 23:40 Uhr lief: Agnetha Fältskog Wrap Your Arms Around Me
  • Um> 23:35 Uhr lief: Steve Miller Band The Joker
  • Um> 23:30 Uhr lief: Paul Young Come Back And Stay
  • Um> 23:25 Uhr lief: Emma Bunton What Took You So Long?
  • Um> 23:21 Uhr lief: Pink Floyd Hey You
  • Um> 23:17 Uhr lief: Kate Bush Babooshka

Nachtprogramm

Plattdeutsche Nachrichten Plattdüütsche Narichten vun'n 13. April 2021

Plattdüütsche Narichten vun'n 13. April 2021

Audio vom 13. April 2021
Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.
Bild: Radio Bremen

Bunnsregerung will desülvigen Corona-Regeln för ganz Düütschland +++ Bremerhaven: Lüüd dröfft nachts wedder rut +++ Union söcht jümmers noch Kanzlerkandidaat +++ AKW Fukushima: Köhlwater mit Strahlenlast schall in de See rin +++ Bremen: Twee Mannslüüd achter Trallen +++ Dat Weer

Informationen zum Audio

Bunnsregerung will desülvigen Corona-Regeln för ganz Düütschland

Berlin: De Bunnsregerung will, dat desülvigen Corona-Regeln för ganz Düütschland gellt. Dor wüllt se dat Infektschoonsschutzgesetz för ännern. Dor schall denn to’n Bispeel binnenstahn: Wenn de 7-Daag-Tall över 100 liggt, dröfft keeneen nachts mehr op de Straat. Bi över 200 gifft dat in de Scholen keen Ünnerricht mehr. Ok schüllt all Arbeitsgevers vun Maandag op an all Mitarbeiders, de nich in’t Kontor to Huus sünd, tominnst eenmal de Week en Corona-Test an de Hand geven.

Bremerhaven: Lüüd dröfft nachts wedder rut

Bremerhaven: Vun Middernacht op an dröfft de Minschen in de Stadt wedder op de Straat ween. Dat hett de Magistrat güstern fastleggt. Oberbörgermester Grantz sä: Se maakt dat, wo de 7-Daag-Tall nu ünner 200 liggt. An’n 30. März harrn se dat Nachts-binnen-Blieven fastleggt. Tomaals stünn de Tall bi 272. Egens schull dat bet Sünndag gellen.

Union söcht jümmers noch Kanzlerkandidaat

Berlin: In de Union is jümmers noch nich kloor, wokeen as Kandidaat in de Bunnsdagswahl in’n September geiht. Vunnamiddag snackt de CDU-CSU-Frakschoon in’n Bunnsdag doröver. Güstern harrn sik de Vörstand un dat Präsidium vun de CDU achter jemehrn Partei-Baas un NRW-Ministerpräsident Laschet stellt. De Böversten vun de CSU hebbt seggt: Jemehr Baas un Bayerns Ministerpräsident Söder schall ran.

AKW Fukushima: Köhlwater mit Strahlenlast schall in de See rin

Fukushima: Japan will Köhlwater mit Strahlenlast ut dat wracke Atomkraftwark in de See rinspölen. De japaansche Regerung hett künnig maakt: In sowat twee Johr wüllt se mehr as ene Million Tunnen rutlaten. Dat radioaktive Water löppt dör Filteranlagen un denn geevt se dor noch rein Water to. Dat is teihn Johr her, dat en Tsunami mit sien Flootwell dat AKW drapen harr. Achteran weer de Kraftwarkskarn smolten.

Bremen: Twee Mannslüüd achter Trallen

Bremen: Twee Weken is dat her, dor weer in Bremen Oorsten op en jungen Mann vun 17 schaten worrn. Anfang April al hett de Polizei twee Lüüd fastsett. De beiden Mannslüüd sünd 17 un 32 Johr oolt. Dat süht kloor dorna ut, dat se schaten un den annern so verletzt hebbt, dat dat um Leven un Dood gung. De Polizei hett en Wahnung op’n Kopp stellt un dorbi Schreckschussgewehren, scharpe Munitschoon, en Metz, en Sweert un anner Bewiesen funnen. De Polizei seggt, de junge Mann vun 17 warrt woll överleven.

Dat Weer

Un woans süht dat mit dat Weer umto ut? Opstunns hebbt wi in Bremen un Bassen 5 Graad, in Bremerhaven un Cuxhaven sünd dat 6 Graad. Vundaag: Bet Middag veel Sünnschien. Later denn ballt sik de Wulken tohoop, un dat kann ok wedder pladdern. Mag ween ok mit Sneeregen oder Grisselgrussel mit Blitz un Dunnerslag. Dat Thermometer krabbelt op 7 bet 9 Graad. De Wind dorto weiht flau oder en beten mehr vun de westen Kant, an de Noordsee un woneem Regen daalkummt ok frisch mit starke Böen. Tokamen Nacht: Blots en Handvull Wulken oder kloor un dröög. Na Middernacht treckt vör allen an Küst ok dichtere Wulken dör, de ok den een oder anner Schuer daalsmiet. Gegen Morgen kann vun dat Ollenborger Mönsterland bet hen na de Wumm oder Werser Daak oder hogen Daak optrecken. Bi 2 Graad över bet 2 Graad ünner 0. Morgen: Wenn sik de Daak oplööst hett, hell un fründlich. Hier oder dor kann dat aver ok wat länger gries un dakig blieven. Vun Middag op an: April-Weer mit Sünnschien, Wulken, Regen un Sneeregen. 7 bet 9 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.