Plattdeutsche Nachrichten Plattdüütsche Narichten vun'n 7. April 2021

Gesundheitsminister snackt in en AstraZeneca-Debatt över de tweete Sprütt

Berlin – Bunnsgesundheitsminister Spahn will mit siene Lännerkollegen över de tweete Sprütt mit dat Impfmiddel vun AstraZeneca bi ünner 60-Johrige snacken. De Impfkommisschoon hett vörslaan, dat düsse Minschen, wenn se eenmal mit AstraZeneca impft sünd, bi de tweeten Sprütt en anner Middel kriegen. Spahn drängt dorop, dat in ganz Düütschland de sülvigen Regeln gellen, um de Inzidenz ünner eenhunnert daal to drücken.

Söder will Corona-Kurs scharper angahn

München – Bayerns Ministerpräsident Söder hett fordert, den Corona-Kurs scharper antogahn. Blots denn maakt ene vörtrocken Bunn-Länner-Konferenz Sinn. Wenn dat, wat dor rutsuert evenso is, as na dat verleden Drepen, denn sünd de Börgerslüüd to Recht bedröbbelt. Dat see he in de Sendung „Markus Lanz“. An Enn gifft dat twee Mööglichkeiten, see de CSU-Baas: Eerst is, dat allens wat op Null sett wurr noch länger anduert. Tweet is, möögliche scharpere Regeln gellen vun sülvst.

Frachtschipp drifft alleen un ahn Andriev vör Norwegen

Oslo – En Frachtschipp ut de Nedderlannen drifft wieder bi betto 15 Meter hooge Wellen in dat Noordmeer vör Norwegen. De Kru kunnt dat Schipp verlaten. De Gefohr besteiht jümmers noch, dat dat Schipp ünnergeiht, see de norwegsche Küstverwaltensbehöörd. Dat Frachtschipp hett um un bi 350 Tünnen Sworöl un ok 50 Tünnen Diesel an Bord. An Oostermaandag hett dat Schipp bi slecht Weer Slaggsiet kregen, achteran sik Deele vun de Fracht verschuuven harrn.

Bürgerslüüd in Brass klaagt dorgegen, dat se in Bremerhaven nich rutdröfft

Bremerhaven – De politsche Koppel Börgerslüüd in Brass hett en Ielandrag dorgegen stellt, dat se nachts nich rutdröfft. Dat stimmt, see dat Verwaltensgericht Bremen. BIW-Lannsbaas Timke meent: Dor fehlt de Rechtsgrundlaag. De Magistrat künnt nich alleen so en groff Inschränken vun dat Grundgesett fastleggen. De Stadtverordnetenversammeln mööt doröver afstimmen.

Grooten Insatz vun de Füerwehr in Bremen-Findorff

Bremen – En Dackstohl vun en Wahnhuus hett verleden Nacht in Findorff Fuer fungen un en grooten Insatz vun de Füerwehr fordert. Nüms is dorbi an Liev to schaaden kamen. De Hölpslüüd kunnen gau all teihn Bewahners in Sekerheit bringen. All tohoop weren achtig Füerwehrlüüd dorbi. Woso de Dackstohl in Flammen opgung un ok wo hooch de Schaaden is, is betnu noch nich kloor.

Dat Weer

Un nu kiekt wi op dat Weer: In Bremen sünd dat een Graad ünner null. In Ossenbrügge hebbt wi een Graad över null, in Bremerhaven un Noordholt sünd dat opstunns plus twee Graad. An Vörmiddag noch Snee, af Middag rieten de Wulken op un de Sünn mengeleert sik dor dör. Vun de Nordsee kriegt wi na´n Avend hen wedder Wulken mit Regenschuer un Grisselgrussel, man ok Blitz un Dunnerslag kann dorbi ween. Mag ween, dat dat hier un dor glatt is. De Wind weiht in Maaten bet stark vun de noordwesten Kant. An de Noordsee sünd an Vörmiddag un Middag ok stöörmsche Böen mööglich. Mag ween dat dat dor ene lütte Stormfloot gifft. In de Nacht mal mehr mal weniger Wulken, de ok mal Sneeregen, Snee un Grisselgrussel rünnersmieten. Dat Thermometer sackt op plus dree bet minus een Graad. Morgen fangt de Dag fründlich mit Sünn un Wulken in Wessel an. Vun Middag af an warrn de Wulken mehr un de Sünn schafft dat blots noch kort an de Wulken vörbi. Övern Dag kann dat ok kort mal pladdern. An Morgen un Vörmiddag kann dor ok Snee bi ween. Dat Thermometer wiest us sess bet acht Graad.

Dat weren de Plattdüütschen Narichten. Tohoopstellt vun Carola Schwirblat. Op Platt trechtmaakt un vörleest vun Martina Brünjes.