Jetzt läuft:

Patrick Swayze She's Like The Wind
  • Jetzt läuft:

    Patrick Swayze She's Like The Wind
  • Davor lief:

  • Um> 06:20 Uhr lief: Don McLean American Pie
  • Um> 06:16 Uhr lief: Eurythmics Who's That Girl?
  • Um> 06:09 Uhr lief: Bruno Mars Grenade
  • Um> 06:05 Uhr lief: Talk Talk It's My Life
  • Um> 05:58 Uhr lief: Dusty Springfield Son Of A Preacher Man
  • Um> 05:54 Uhr lief: Queen These Are The Days Of Our Lives
  • Um> 05:49 Uhr lief: Rosenstolz Ich Bin Ich (Wir Sind Wir)
  • Um> 05:46 Uhr lief: Level 42 Lessons In Love
  • Um> 05:42 Uhr lief: Supertramp Dreamer

Der Morgen mit Britta Uphoff und Marcus Rudolph

Plattdeutsche Nachrichten Plattdüütsche Narichten vun'n 6. April 2021

Plattdüütsche Narichten vun'n 6. April 2021

Audio vom 6. April 2021
Plattdeutsche Nachrichten
Bild: Radio Bremen

Huusdokters dröfft nu ok de Sprütt gegen dat Corona-Virus geven +++ Laschets Vörslag för en Brügg-Lockdown warrt bekriddelt +++ Nedderlanne is nu Hoochinzidenzrebeet – In England dröfft de Lüüd wedder mehr +++ Bunnsagentur hett, as dat schient, dusende Henwies op Bedregeree bi dat Kortarbeidergeld +++ Corona-Modellkommuun maakt in Neddersassen allens trecht för den Start +++ Dat Weer

Informationen zum Audio

Huusdokters dröfft nu ok de Sprütt gegen dat Corona-Virus geven

Bremen – Vun hüüt af an dröfft ok de Huusdokters de Sprütt gegen dat Corona-Virus geven. All tohoop wüllt 35.000 Praxen dor mitmaken. In ganz Düütschland gifft dat betnu aver nichmal een Millioon Impfdosen. Dat heet vun de Kassenärztlichen Vereenigung Bremen: In de eersten Week köönt 18 bet 48 Sprütten in jedeen Praxis impft warrn. De Huusdokters bestimmen sülvst wer en Termin för dat Impfmiddel kriggt. Se wüllt sik dorbi aver an de fastleggte Reeg holen, also toeerst de Lüüd de Pleeg bruken un Minschen över achtig Johr.

Laschets Vörslag för en Brügg-Lockdown warrt bekriddelt

Berlin – CDU-Baas Laschet warrt för sien Corona-Vörslag bannig bekriddelt. Laschet will dat Bund-Länner-Drepen ehrder stattfinnen laaten un is dorfür dat kort aver stuur allens op Null sett warrt. Dormit künnt man Tiet winnen, bet mehr Minschen impft sünd. Berlins Börgermeister Müller seggt dorto, dat noch veel unkloor an düssen Vörslag is. Dorum is he dorgegen, dat för tokamen Maandag plaante Bunn-Länner-Drepen vörtotrecken. Liek reageerte Thüringens Ministerpräsident Ramelow: Dor mutt toeerst wat op´n Disch liggen, ehrder man wat tohoop besluten kann.

Nedderlanne is nu Hoochinzidenzrebeet – In England dröfft de Lüüd wedder mehr

Berlin – De Bunnsregeerung hett beslaten, dat de Nedderlannen vun hüüt af an Hoochinzidenzrebeet sünd. Dat hett se fastleggt vunwegen de Corona-Infektschoonstahlen, de böös na baven gahn sünd. Wer inreist, mutt eerst en negativen Test vörwiesen. De Nedderlannen sünd achter Tschechien, Polen un Frankriek nu dat veerte Naverlann, wat as Hoochinzidenzrebeet fastleggt wurr. In England süht dat anners ut: Dor sackt de Tahlen daal, dorüm dröfft de Lüüd af tokamen Week ok wedder mehr maken. Vun Maandag af an schüllt de Ladens, de Sporthüüs un de Butenflachs vun de Pubs wedder opmaken.

Bunnsagentur hett, as dat schient, dusende Henwies op Bedregeree bi dat Kortarbeidergeld

Ossenbrügge – Bi de Bunnsagentur för Arbeid sünd, as dat schient, in dat Corona-Slamassel dusende Henwies op Bedregeree bi dat Kortarbeidergeld ankamen. Na de “Nee´n Ossenbrügger Zeitung” hett de Behöörd, siet de Pandemie losgung, bet Enn Januarmaand um un bi 4300 Fallen opschrieven, wo dat so utsüht as wenn de nich rechtens sünd. Meist stimmt woll de Arbeitstiet dorbi nich. Arbeitgever harrn dorno woll Kortarbeit anmellt, liekers de Arbeiders just soveel arbeit hebbt as vördem or ok mehr. Um un bi dreehunnert Mal hett de Bunnsagentur betnu de Fäll an de Polizei un den Zoll wiedergeven.

Corona-Modellkommuun maakt in Neddersassen allens trecht för den Start

Achim – In Neddersassen maakt sik vun hüüt af an 14 Modellkommuun startkloor, de Corona-Inschränkungen wedder trööch to nehmen. All wüllt düsse or tokamen Week „sekere Zoon“, as se dat nöömt, trechtmaken. Dor dröfft denn Ladens, Weertshüüs buten, Sporthüüs, Kinos un Theoter wedder opmaken. Man blots Minschen mit en negativen Test un en App op´t Handy to´n Nagahn, dröfft dor mitmaken. To de Modellkommuun tellen ok Achim, Cuxhaben, Nienburg/Werser un Ollenborg. All hebbt en Inzidenzweert ünner eenhunnert.

Dat Weer

Un nu kiekt wi op dat Weer: In Bremen un Willemshaven hebbt wi een Graad, op Langeoog un in Bremerhaven sünd dat opstunns dree Graad. Vundaag hebbt wi Aprilweer, mal so mal so. Dat is windig, nattkoolt, af un an schient ok mal de Sünn. Vun de Nordsee trecken to´n Deel kräftige Sneeregen- un Sneeschuer, man ok Grisselgrussel dör´t Land Bremen. Man ok Gewidder sünd mööglich. De Wind weiht frisch bet stark vun de noordwesten bet westen Kant. An de Nordsee kann dat ok stöörmsche Böen geven. Un dat bi veer bet fief Graad. In de Nacht sünd mal mehr mal weniger Wulken ünnerwegens. Vun Tiet to Tiet is dat dröög, denn könnt wi ok de Steerns funkeln sehen. Aver ok kräftige Sneeschuer un Grisselgrussel mit Blitz un Dunnerslag kann dat geven. Dat Thermometer wiest us plus dree bet minus een Graad. Morgen eerst noch Snee or Sneeregen, dorbi kann dat glatt warrn. To´n Deel kriggt wi en poor Zentimeters Nee-Snee. Övern Dag mehr un mehr Sneeregen- or Regenschuer. Wedder kann dat Grisselgrussel mit Blitz un Dunnerslag geven. Man ok de Sünn kickt mal vörbi. Dat Thermometer schafft dat op fief bet acht Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.