Plattdeutsche Nachrichten Plattdüütsche Narichten vun'n 20. September 2024

Wirtschapsminister Habeck bi’t Volkswagen-Wark in Oostfreesland

Emm: Bunnswirtschapsminister Habeck maakt sik in dat VW-Wark an de Küst en Bild vun de Laag. De Konzern warrt womööglich Fabriken dichtmaken un Arbeitssteden wegstrieken. För Maandag hett Habeck en Auto-Top-Drepen ansett. Mit an’n Disch: de gröttsten düütschen Autoboers un Toleverers, Verbandsvertreders un de IG Metall. Snacken wüllt se över de lege Laag in de Auto-Industrie.

Israel grippt Terrorkoppel Hisbollah an

Beirut: Militärflegers ut Israel hebbt in de verleden Stunnen mit Macht Punkten in den Süüdlibanon angrepen. Dat güng woll vör allen gegen Raketenanlagen un Waffenlager vun de Hisbollah. Israels Verteidigungsminister Galant meen, se wüllt dorför sorgen, dat de Noorden vun Israel wedder so seker warrt, dat de Minschen, de dor rutmüssen, dat de wedder trüchköönt.

Klima-Demos överall in Düütschland

Bremen: Lüüd vun de Klima-Akschoon „Fridays for Future“ gaht vun Middag op an in vele düütsche Städte op de Straat. Ok in den Noordwesten wüllt se sik wiesen, so in Ollenborg, Willemshaven un Papenborg. In Bremen versammelt se sik Klock 12 op den Marktplatz. De Polizei rekent mit sowat dusend Demonstranten.

Vele Handwarksbedrieven in Bremen kunnen dichtmaken

Bremen: De Hannelskamer Bremen weet: Jede föffte Bedriev in Bremen un Bremerhaven schall bald övergeven warrn. Man dat gifft nich noog Fachlüüd, de de Firmen övernehmen köönt.

Football Champions League – de een winnt, de anner verleert

Rotterdam: In de Football Champions League hett de düütsche Meister Bayer Leverkusen dat eerste Speel wunnen. Bi Feyenoord Rotterdam hebbt se mit 4:0 de Bavenhand hatt. RB Leipzig hett bi Atletico Madrid 1:2 verloren.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Achem un Kneten överall 15 Graad. Vundaag: Blots en Handvull Wulken un veel blauen Heven. Meist överall is dat dröög. Dat Thermometer krabbelt op 21 bet 24 Graad. De Wind dorto weiht in Maten, in Böen ok frisch, vun de oosten Kant. Tokamen Nacht: Blots en poor Wulken oder gor kene. In’t Binnenland kann sik na Middernacht dat een oder anner dünne Nevelband utbillen. Dröög. Bi 15 Graad op de Inseln, anners 12 bet 8 Graad. Morgen: Wenn sik de Daak oplööst hett, överall hell un fründlich mit lachen Sunnschien. Blots de een oder anner dünne Wulk seilt mal vörbi. Dröög bi 20 bet 24 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ralph Stölting.