Jetzt läuft:

Don McLean American Pie
  • Als nächstes läuft:

  • Um 06:24 Uhr läuft: Patrick Swayze She's Like The Wind
  • Jetzt läuft:

    Don McLean American Pie
  • Davor lief:

  • Um> 06:16 Uhr lief: Eurythmics Who's That Girl?
  • Um> 06:09 Uhr lief: Bruno Mars Grenade
  • Um> 06:05 Uhr lief: Talk Talk It's My Life
  • Um> 05:58 Uhr lief: Dusty Springfield Son Of A Preacher Man
  • Um> 05:54 Uhr lief: Queen These Are The Days Of Our Lives
  • Um> 05:49 Uhr lief: Rosenstolz Ich Bin Ich (Wir Sind Wir)
  • Um> 05:46 Uhr lief: Level 42 Lessons In Love
  • Um> 05:42 Uhr lief: Supertramp Dreamer
  • Um> 05:38 Uhr lief: James Blunt Heart To Heart

Der Morgen mit Britta Uphoff und Marcus Rudolph

Plattdeutsche Nachrichten Plattdüütsche Narichten vun'n 24. März 2021

Plattdüütsche Narichten vun'n 24. März 2021

Audio vom 24. März 2021
Plattdeutsche Nachrichten
Bild: Radio Bremen

Weertschop geiht gewaltig gegen Afkamen gegenan +++ Masken-Schandaal: Dor schüllen woll düütlich höögere Geller fleten +++ Covid-19 schall för mehr Minschen as Beroopkrankheit gellen +++ Debatt vunwegen Corona-Nootbrems in Bremerhaven +++ Utsicht: Netanjahus Partei stärkste Kraft bi de Parlamentswahl in Israel +++ Dat Weer

Informationen zum Audio

Weertschop geiht gewaltig gegen Afkamen gegenan

Berlin – Dat Afkamen vun Bunn un Länner, an Ostern allens op Null to setten, hett vele Firmen dör´nanner brocht un dorvör sorgt, dat de dat böös bekriddeln. Bunnskanzlersch Merkel un de Baaslüüd vun de Bunnslänner harrn an Mandag beslaten, dat Leven an Ostern för Jan un Allemann un bavento de Weertschop op Null to setten. Dor hett nüms mit rekend un dat hett dat betto in de Pandemie ok noch nich geven.
Dat Bunnsministerium schall nu bet to´n Avend an Middeweken ene Vörlaag fardig maken, wo binnen steiht, wo dat utsehen kann, um op apen Fraagen to antern.

Masken-Schandaal: Dor schüllen woll düütlich höögere Geller fleten

München – För dat vermiddeln vun Mund-Nees-Masken an dat Ministerium schüllen CSU-Politiker un verscheeden Geschäftslüüd all tohoop fief bet sess Millioon Euro Andele kregen. Dat mellen na jümehr Naforschen de Medien NDR, WDR un de „Süüddüütsche Zeitung“. Alleen dat bayrische Gesundheitsministerium hett woll 3,5 Millioon Schutzmasken för den Pries vun knapp veer Euro dat Stück kregen. Wiedere Frachten gungen an dat Bunnsgesundheitsministerium un dat Bunnsbinnenministerium. Betahlt wurrn de Masken ut Stüern.

Covid-19 schall för mehr Minschen as Beroopkrankheit gellen

Bremen – De Bremer Regeerungskoalitschoon will, dat ene Corona-Virus-Infektschoon för mehr Minschen as betnu, as Beroopkrankheit gellt. Över den Andrag vun SPD, Grööne un Linke schall an Namiddag in de Bremer Börgerschop snackt warrn. Arbeiters kriegt denn mehr Stütt, wenn se arbeitsundüchtig sünd un dat ünner Beroopkrankheit löppt. Betto köönt Krankheiten dör ene Infektschoon man blots för Personaal in dat Gesundheits- un Wohlfahrtsfeld as Beroopkrankheit anerkennt warrn.

Debatt vunwegen Corona-Nootbrems in Bremerhaven

Bremerhaven – De Magistrat vun de Stadt legg vundaag fast, of de Corona-Regeln leger warrn. Dorachter steiht de hooge Tahl vun Corona-Infektschoon in Bremerhaven. Of de Lüüd vun Tiet to Tiet nich mehr ut jümehr Hüüs dröfft un wenn ja, wo dat denn utsehen schall, weer noch nich ruttokregen. Bi dat wat betnu to hören weer, warrt ok över wiedere Mööglichkeiten mit gauen Tests snackt.

Utsicht: Netanjahus Partei stärkste Kraft bi de Parlamentswahl in Israel

Jerusalem – Ok na de veerten Parlamentswahl binnen twee Johren, süht dat in Israel nich na ene sekere Regeerung ut. De Likud-Partei vun Ministerpräsident Netanjahu hett, so süht dat in Momang ut, de Nees vörn. Man an den nödigen gröttsten Deel an Stimmen is se aver düütlich vörbi suust. Ene föfte Wahl is nich vun Disch. Na Angaav vun de Wahlkommischoon liggt de Andeel an Lüüd, de bi de Wahl mitmaakt hebbt, bi 67,2. Dat sünd 4,3 Perzentpunkte weniger as bi de Wahl in März verleden Johr. Dat wat dorbi rutsuert, warrt eerst an Freedag vun Amts wegen bekannt maakt.

Dat Weer

Un nu kiekt wi op dat Weer: Opstunns sünd dat in Bremen un Bremerhaven 7 Graad, in Em 8 un in Ossenbrügge hebbt wi 9 Graad. Hüüt geiht de Dag daakig un diesig los. An de See sünd de Wulken dichter, rund um Bremen umto un wieder na´n Süüden hen wiesst sik ok mal de Sünn. Mit´n beten Glück blifft de ok mal länger bi us. De Wind weiht flau bet in Maaten, to´n Deel ok böig vun de süüdwesten Kant. Dat Thermometer kladdert op 12 bet 13 Graad. In de Nacht eerst lose wulkig, laterhen denn wedder dickwulig, dorbi kann vun Ostfreesland un de Nordsee her ok mal en beten Regen or Spütterregen rünnerkamen. Dat Thermometer wiest dorbi 6 bet 5 Graad. Morgen trecken vele Wulken dör, de ok mal en beten Natts vun baven smieten. Na de Küst hen blifft dat dröög un ok de Wulken rieten dor mal op. An Namiddag is dat in Bremen un na´n Süüden hen länger dröög, mag ween, dat ok mal de Sünn to Besöök kummt. Dorbi kladdert dat Thermometer denn op 10 bet 13 Graad.

Dat weren de Plattdüütschen Narichten. Tohoopstellt vun Marcus Behrens. Op Platt trechtmaakt un vörleest vun Martina Brünjes.