Plattdeutsche Nachrichten Plattdüütsche Narichten vun'n 6. August 2024

Zentraalraat vun de Juden foddert militärisch Hölp för Israel

Berlin – De Präsident vun’n Zentraalraat vun de Juden, Schuster, hett de Bunnesregeern opfoddert, Israel militärisch Hölp to geven, wenn de Striet in’n Osten Blangenbi leger ward. Dütschland mutt ok mit Militär an de Siet vun Israel stahn, sä he. De USA sünd na dat Drauen vun’n Iran mehr to seen in’n Osten Blangenbi. Ut dat Bunnesministerium för Verdeffenderen heet dat, dat een Inmengeleeren vun de Bunneswehr in’n Momang nich plaant is.

Bunneswehr maakt sik praat, Minschen ut’n Libanon to halen

Wunstorf – De Bunneswehr maakt sik woll praat darför, veele Minschen ut’n Libanon ruttohalen un in Sekerheit to bringen. Wenn de Laag in’n Osten Blangenbi leger ward, schüllt dütsche Staatsbörger ut dat Land bröcht weern. Dat heet, darför steiht in’t neddersässisch Wunstorf Transportfleger praat. Buterdem plaant jüst sowat ok de dütsche Marien.

Harris geiht mit Stütt vun ehr Partei in’n Wahlkampf

Washington – Kamala Harris geiht na’n Afsluss vun dat Afstimmen in ehr egen Partei, de US-Demokraten, mit vulle Stütt in de Präsidentschuppswahl in’n November. Se keem bi dat Afstimmen op 99 Perzent vun de rund 4500 Stimmen vun de Afordneten. Wokeen de Viez-Präsidentschuppskandidat weern ward, is noch nich klaar. Dat erste gemeensam Optreden is egens för hüüt Abend plaant.

Jümmer mehr Rentner gaht arbeiden

Berlin – In Dütschland gaht jümmer mehr Minschen arbeiden, obschoons se Rent kriegt. As de Bunnesregeern vermellt, weern Enn 2022 mehr as 1,3 Millionen Rentnerinnen un Rentner as Arbeiders mellt. De mehrsten darvun arbeidt in een Mini-Job. De Linke bekrittelt dat, dat vele öllere Lüüd wieter arbeiden mööt.

Bekennerschrieven na Bahnanslääg woll nich echt

Bremen – Na de Brandanslääg op de Bahnstreek Hamborg-Bremen weer op linken Internetsieten een Bekennerschrieven opdüükt. De Polizei glöövt nu, dat dat nich echt is. Man liekers sütt dat woll darna ut, dat linksextremistisch Grupps darachter stickt. In Bremen weer vör een Week op Höögde vun’n Börgerpark een Kabelschacht vun de Bahn ansteeken worrn. Dat hett för bannig veel Arger soorgt.

Dat Weer

Un nu een Blick op dat Weer: op Wangerooge 19, in Bremerhaben un Deefholt 22 un in Bremen sünd dat opstunns 23 Graad. Vundaag schient veel de Sünn bi een meist blauen Heben. Later treckt vun de Nedderlannen her Wulken op, de ok mal dicker weern köönt – man dat blifft wieter dröög. Dat ward mehr un mehr bruttig bi 28 bit 31, an de Nordsee bi 25 bit 27 Graad. Tokamen Nacht wiest sik de Heben locker bit dünn wulkig, to’n Morrn hen treckt dat mehr to, man Regen is wieter nich in Sicht. Dat Thermometer sackt op 19 bit 16 Graad. Morrn fangt de Dag erst noch fründlich an, denn treckt vun West na Oost dicke Wulken mit Schuers un Grummelschuers över us weg. Darachter ward dat den Dag över wedder fründlicher mit een beten Sünn. Vör de Schuers hebbt wi 22 bit 27 Graad, mit den Regen köhlt dat af un achterna hebbt wi 21 bit 24 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.