Plattdeutsche Nachrichten Plattdüütsche Narichten vun'n 5. August 2024

Wieter Krawalle in Grootbritannien

London – Na dat Angriepen mit Metz op Kinner, wo wecke sturven sünd, gifft dat in Grootbritannien wieter Krawalle vun rechtsradikalen Grupps. An’n Abend sünd ünner annern twee Hotels angriepen worrn, in de Asylbewarver ünnerkamen sünd. De Polizei hett 150 Minschen fastnahmen. Dat weer all de fiefte Dag achtereenanner, wo dat Proteste un Oprohr geev.

EU erkennt Wedderwahl vun Maduro nich an

Brüssel – Na de striedig Präsidentsschuppswahl in Venezuela hett de EU dat aflehnt, de Wedderwahl vun Maduro as Staatsbaas antoerkennen. De Europäische Raat foddert een unafhängig Överpröfen vun de Wahlprotokolle. Papeere, de bitnu pröövt worrn sünd, düdt woll darop hen, dat de Kandidat vun de Oppositschon, Gonzales Urrutia, mit een dütlich Mehrheit wunnen hett.

Ukraine stellt F-16 Kampf-Fleger vör

Kiew – De Ukraine hett de ersten F-16-Kampf-Fleger ut US-Produktschon kregen. To’n Dag vun de Luftwaff hett sik Präsident Selenskyj güstern op een Flugfeld vör twee Maschiens vun den Typ wiest. Wo vele F-16 levert worrn sünd, sä de Präsident nich. He hett aver klaar maakt, dat weern noch nich noog.

Nee’et Schooljohr in Bremen un Neddersassen fangt an

Bremen – Vundaag fangt för Schölerinnen un Schöler in Bremen un Neddersassen dat nee’e Schooljohr an. Vertreder vun’t Personal vun Bremer Scholen gaht darvun ut, dat mehr Schoolmesters fehlen ward as in’t Vörjohr. Akraate Tallen gifft dat bitnu nich. Dat Plaanen vun’t Personal weer aver in dütt Johr besünners vigeliensch, heet dat.

Tourismus an de Küst düssen Sommer dörwussen

Ollenborg – To’n Enn vun de Ferien treckt de Urlaubsanbeder an de Nordsee ünnerscheedliche Bilanz. Ostfreesland Tourismus mellt een Utlasten vun de Hotels un Ferienwahnungen vun 70 bit 90 Perzent, dat is weniger as in’t verleden Johr. De Hotel-un Gaststedenverband snackt vun een slimme Saison wegen de högeren Priese un dat dörwussen Weer. De Verband geiht darvun ut, dat oplaatst in’n Harvst noch mehr Bedreeve opgeven mööt.

Dat Weer

Un nu een Blick op dat Weer: in Bremerhaben un op Wangerooge 18, in Bremen un Deefholt  sünd dat opstunns 19 Graad. Vundaag sünd dicke Wulken an’n Heben, de in’n Loop vun’n Vörmiddag faken aftreckt or oplockert un de Sünn wiest sik ok mal. Man denn kummt vun de Ems her nee’e Wulken op, de bit to’n Avend wieter bit to de Elv treckt. Regen fallt aver woll nich – bi 21 bit 25 Graad. Tokamen Nacht is de Heben een beten wulkig, later ok faken klaar un Regen is wieter nich in Sicht. Dat Thermometer sackt op 18 bit 13 Graad. Morrn schient erst veel de Sünn bi blots een paar Wulken. Later treckt dat vun de Nedderlannen her een beten to, man dat blifft wieter dröög. Bi 28 bit 30, an de Nordseeküst bi 24 bit 27 Graad, dat ward bruttig. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.