Plattdeutsche Nachrichten Plattdüütsche Narichten vun'n 02. August 2024

Gefangenuttusch warrt bekriddelt

Berlin: Bi en Gefangenenuttusch mit Russland is ok de nöömte Deertengoornmörder Wadim Krassikow free. Eegens harr en Berliner Gericht em to levenslang achter Trallen verordeelt, wiel he en tschechsch-stämmigen Georgier doot schaten hett. Man de Familie vun dat Offer weer bannig dalslaan un menen dat in Düütschland woll kien Gesetten gellen. Bunnskanzler Scholz see, nüms harr sik düsse Entscheeden eenfach maakt. Bunnsjustizminister Marco Buschmann nöömt dat Freelaten vun düssen Deertengoornmörder en bittern Nageven, wat he verantwoordt.

USA achten Sieg vun de Oppositschoon in Venezuela

Caracas: De USA hebbt den Oppositschoonskandidaaten Edmundo González Urrutia as Sieger vun de striedigen Präsidentenwahl in Venezuela acht. US-Butenminister Antony Blinken snackt vun grootordig Bewiesen för den Wahlsieg. Nu is dat an´ne Tiet, een freedlich Övergaav vun de Macht torechttomaken.

Gootachten twiefeln wat in den Huusholt allens recht togeiht

Berlin: Över den Bunnshuusholt för dat tokamen Johr mutt wiederhen snackt warrn. Dat Finanzministerium hett dat Kanzleramt un dat Weertschopsministerium informeert, dat nu nochmal nee verhannelt warrn mutt. Dor achter stickt, dat plaante Akschoon för en poor Finanzeerns vun den Huusholt nich rechtens sünd.

Koopkraft vun Minschen in Bremen kladdert na baven

Bremen: De Minschen in dat Land Bremen köönt wedder mehr vun ehren Inkamen kööpen. De Arbeitnehmerkamer Bremen süht bi dat Thema Koopkraft en Trendwennen. Dorna sünd de Reallöhn in dat Bunnsland in den eersten dree Maanden vun düt Johr üm binah söss Perzent hooch gahn. Vulltietarbeiters verdenen in dat Land Bremen um un bi 3900 Euro brutto. In Bremerhoben liggt de Dörsnittsverdeenst 400 Euro ünner den in annern westdüütschen Grootstäder.

Spinnen-Eier op Frachter maakt Fachlüüd Scherereen

Bremerhoben: Achterna Giftspinnen op en Frachter in Bremerhoben funnen wurrn, gaht Fachlüüd dorvun ut, nich gau gegen de Spinnen antogahn. Man de Eier vun de giftigen Swatten Witt köönt Maleschen maaken, vunwegen de meist allens möögliche överstaht un de Deerten den laater noch slüppen, see en Bremer Schippsakenkünnige. En Beet vun düsse Spinnen kann in selten Fäll Minschen den doot bringen.

Dat Weer

Un nu kiekt wi op dat Weer: In Bremerhoben hebbt wi 16 Graad, in Bremen un Möppen sünd dat 17 Graad un in Emm hebbt wi opstunns 18 Graad. De Dag fangt meist mit dicken Wulken un Regen an, man vun de Ems her warrn de Wulken weniger. De letzte Regen un de Wulken trecken över de Lüneborger Heid un de Aller af, dorachter is dat fründlich un dröög mit en poor lütten Wulken bi 20 bet 22 Graad an de Küst un 23 bet 25 Graad in´t Binnenland. In de Nacht funkeln de Steerns, na Middernacht warrn de Wulken denn vun de Nedderlannen wedder mehr, dat blifft dröög, hier un dor is dat daakig bi 18 bet 16 Graad an de Waterkant un 15 bet 10 Graad in´t Binnenland. Sünnavend eerst en beten daakig, en beten wulkig un ok Sünnenschien, an Middag un Namiddag trecken vun de Ems her dicke Wulken op, de af un an Regen un Gewidder bringen. Dat Thermometer wiest us 22 Graad op de Eilannen un 25 bet 27 Graad in´t Binnenland. Sünndag eerst mehr Wulken as Sünn un en poor Schuer, man ok verenkelte Gewidder sünd mööglich. An Avend dröög mit en Wessel ut Sünn un Wulken bi 19 bet 24 Graad.

Dat weren de Plattdüütschen Narichten. Tohoopstellt vun Sven Kuhnen. Op Platt trechtmaakt un vörleest vun Martina Brünjes.