Plattdeutsche Nachrichten Plattdüütsche Narichten vun'n 19. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 19. Juni 2024

  • Faeser: Snacken över Afschuven na Afghanistan
  • Israel mit Akschoonsplaan för Libanon
  • Lauterbach will ne’e Utgaav vun den Klinik-Atlas
  • Bremer hkk-Mitarbeiders op Warnstsreik
  • Anklaag in Ollenborg: Mithelpen bi Stüerbedregeree
  • Dat Weer
Bild: Radio Bremen

Informationen zum Audio

Faeser: Snacken över Afschuven na Afghanistan

Potsdam: De Binnenministers vun de Länner sitt vun hüüt op an op jemehr Vörjohrskunferenz tohoop. Bavenan steiht In- un Utwannern un Asyl. Nadem dat en Polizist in Mannheim mit en Metz dootstaken worrn weer, harrn enige Binnenministers verlangt: Dat schull mööglich ween, ganz lege Verbrekers un Islamisten, de gefährlich warrn kunnen, ok wedder na Afghanistan oder Syrien aftoschuven. Bunns-Binnenministersch Faeser sä in de Ne’e Ossenbrügger Zeitung: Ehr Amt snackt doröver mit Behörden in Usbekistan un ok mit Naverlänner vun Syrien.

Israel mit Akschoonsplaan för Libanon

Tel Aviv: De israelsche Armee hett künnig maakt: Se hebbt en Akschoonsplaan fastleggt, na den se in den Libanon angriepen wüllt. Eerstmal schall dat Militär noch mehr ünner Alarm kamen. Vörher harr Israels Butenminister Katz de Schiiten-Miliz Hisbollah in den Libanon drauht: Dat kann Krieg geven. Israel wörr dat bald anseggen. Dat weer den Butenminister sien Antwoort dor op, dat de Hisbollah Luftbiller bekannt maakt hett. Dor sünd de Haven vun de israelsche Stadt Haifa un anner Ortschaften in de Gegend op to sehn.

Lauterbach will ne’e Utgaav vun den Klinik-Atlas

Berlin: Bunnsgesundheitsminister Lauterbach will, dat een beter dör den Klinik-Atlas dörfinnen kann. In de Rheinische Post sä he: Dat Online-Portal warrt nee opstellt. In en poor Daag schall dat kloor ween. De Internet-Siet, op de Krankenhüüs vergleken warrn köönt, is Mitt Mai online gahn. Dor kann een wat nalesen över jede enkelte vun de 1700 Kliniken in Düütschland. Nu meen Lauterbach, dor kunnen vele Börgerslüüd un Dokters nich goot dörfinnen. Dorum schüllt blots noch de twintig wichtigsten OPs vergleken warrn.

Bremer hkk-Mitarbeiders op Warnstsreik

Bremen: De Mitarbeiders vun de Krankenkass hkk schüllt hüüt Vörmiddag in Warnstreik gahn. De Gewarkschap verdi seggt: Dat gellt för all Deenststeden in Bremen un Neddersassen. En Demo is ansett vun den Bremer Hauptbahnhoff hen na de Schlachte. Verdi rekent dormit, dat 300 Lüüd op de Straat gaht. Bi dat, wat se jüst över de Tarifen uthannelt, verlangt de Gewarkschap 12,7 Perzent mehr Geld. Bi de hkk arbeidt 1400 Lüüd.

Anklaag in Ollenborg: Mithelpen bi Stüerbedregeree

Ollenborg: De Staatsanwaltschap Ollenborg hett en Mann vun 39 Johr anklaagt. Seggt warrt: He hett Gastweertslüüd in Willemshaven, Gannerseer, Haselünne un annerwegens dorbi holpen, en Dreih to finnen, dat se Stüern nich betahlt. Överall in Düütschland hett de Mann woll en Software verköfft, mit de een Innahmen ut de Kass wedder rutlöschen kann. De Schaden för de Stüerkass liggt bi 140 Millionen Euro.

Dat Weer

Un woans süht dat mit dat Weer umto ut? Opstunns hebbt wi in Bremen un Nienborg 14 Graad, in Bremerhaven un op Börkum sünd dat 15 Graad. Vundaag: Eerst süüdlich noch dichte Wulken, an de See lacht aver nu al de Sunn, un dröög is dat ok. Vun Middag op an warrt dat överall hell un kloor mit Sunnschein un en poor Wulken. Dat Thermometer krabbelt op 15 bet 17 Graad op de Inseln un 19 bet 20 Graad in’t Binnenland. De Wind dorto weiht flau oder en beten mehr, an de Waterkant ok frisch vun de noordwesten Kant. Tokamen Nacht blenkert de Steerns bi blots ganz poor Wulken. Gegen Morgen kann in’t Binnenland en beten Daak opkamen. An de See 12 bet 9 Graad, anners 7 bet 6 Graad. Morgen: Sunnschien satt. Blots vun Süüdwesten warrt de Wulken över Dag mehr. Bi 20 bet 23 Graad, an de See 17 bet 19 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend
Der Samstagabend
  • Der Samstagabend