Plattdeutsche Nachrichten Plattdüütsche Narichten vun'n 22. Februar 2021

Welt-Dokotors-Präsident wahrschaut vör Lockern vun Corona-Regeln

Berlin – Wieldat de Corona-Infektschonstallen in Dütschland jümmer wieter na baben kladdert, wahrschaut Welt-Doktors-Präsident Montgomery daför, de Regeln wieter to lockern.  Dardör ward de Tallen wedder anstiegen, sä he. Mit de Mutatschonen steekt sik de Lüüd lichter an un ward woll swarer krank. Montgomery foddert, mit Impfsprütten, de se nu nich los ward, gau jüngere Minschen to impfen.

Corona-Impfen in Ausstralien geiht los

Melbourne – In Australien hett dat Impfen gegen dat Coronavirus anfungen. Güstern hett all Premierminister Morrison een Sprütt kregen. Darmit wull he klaar maken, dat dat Impfmiddel seker is. In Australien gifft dat een luute Minnerheit vun Lüüd, de dat Impfen aflehnt, wiel dat na ehr Meen villicht nich gesund is. In düsse Week schüllt 60-dusend Minschen in Australien dat Impfmiddel kregen.

Utfall vun’t Driefwark: Luftfohrtbehöörd will dat pröfen

Washington – Na dat Utfallen vun een Driefwark vun een Boeing 777 in de Nöögde vun Denver hett de US-Luftfohrtbehöörd ankünnigt, Maschiens vun düsse Oort stantepee to överpröfen. Boeing gifft den Raat, de Fleger nich intosetten, bit se mehr weet. Vörgüstern weern wegen dat Utfallen vun dat Driefwark grode Deele vun den Fleger in Denver as Trümmer in Wahnflachs störrt.

Bunnesbildenministerin steiht achter dat Openmaken vun Grundscholen

Berlin – Bunnesbildenministersche Karliczek steiht achter dat Openmaken vun Grundscholen in een paar Bunneslännern in düsse Week. Na Neddersassen un Sassen nehmt in tein Bunneslännern babenop wedder Kinnergaarns un Grundscholen ehrn Bedreev op or laat mehr Kinners in de Scholen rin.  In Bremen mööt vun’n 1. März an wedder alle Kinner in de Grundscholen un ok in Kinnergaarns ward op de Lüttjen wedder alltohoop oppasst. In Bremerhaben passeert wegen de hogen Tallen erstmal noch nix.

Veer böös Versehrte bi Opfohr-Unfall

Westerstäe – Bi een Opfohr-Unfall op de Autobahn 28 bi Westerstäe sünd veer Minschen böös versehrt worrn. Een Auto weer gegen een annern Wagen kracht, de na een Havaree all op een Afsleepwagen roptrocken  worrn weer. Beid Autos sünd dardör heel un deel utbrannt. Buterdem haarn twee annere Fohrtüüg mit den Unfall to daan. De Autobahn in Richt Ollenborg hebbt se för rund söben Stünnen heel un deel dicht maakt.

Dat Weer

Un nu een Blick op dat Weer: an den Bremer Flegerhaben un in Deefholt 9, in Cuxhaben 10 un an de Fischereehabenslüüs in Bremerhaben sünd dat opstunns 11 Graad. Vundaag schient wedder veel de Sünn, blots een paar lichte Wulken treckt vörbi. To’n Abend hen kummt vun’t Emsland her dickere Wulken op. Dat ward wedder bannig mild bi 15 bit 19 Graad. Tokamen Nacht treckt een paar Wulkenfeller vörbi, to’n Morrn hen köönt se dicker weern. Man dar fallt blots hier un dar een paar Druppen – meist blifft dat dröög. Dat Thermometer sackt op 8 bit 6 Graad. Morrn mal mehr, mal minner Wulken, man de Sünn kiekt ok rut un blots verenkelt fallt een paar Druppen. Dat blifft mild bi 15 bit 18 Graad. Middeweken wieter fründlich un dröög bi 15 bit 19 Graad. Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Heidi Jürgens.