Plattdeutsche Nachrichten Plattdüütsche Narichten vun'n 19. Februar 2021

Roboter hett op’n Mars opsett

Cape Canaveral – De US-Weltruumbehöörd NASA hett een Roboter, de sik bewegen kann, op’n Mars afsett. Söben Maand na den Start vun de Eer hett de so nöömte “Rover” op’n Mars opsett – mit knapp 20-dusend Kilometer in de Stünn weer he vördem in de Mars-Atmosphär rinkamen, een Fallschirm hett em bremst. Dat geiht bi den Opdrag darüm, Proven vun Steens vun’n Mars to sammeln.

USA wedder bi’n Pariser Klimaverdrag darbi

Washington – Na dat Utstiegen ünner den ehemalig Präsidenten Trump sünd de USA vun hüüt an wedder vun Amts wegen Deel vun’t Pariser Klima-Afkamen. US-Präsident Biden harr dat Trüchgahn to den Verdrag an sien ersten Arbeitsdag, an’n 20. Januar, op’n Weg bröcht. Buterdem hett he ankünnigt, he wull de Vereenten Staaten to de Natschon maken, de in’n Kampf dargegen, dat de Eer jümmer warmer ward, vörangeiht. De Verdrag vun Paris will dat henkregen, den Klimawannel op dütlich ünner twee Graad een P vörtosetten.

Schoolmester-Verband foddert Vörsicht bi Openmaken vun Scholen

Berlin – De Dütsche Schoolmester-Verband hett darför wahrschaut, de Scholen to gau wedder optomaken – wegen de Mutatschonen vun’t Corona-Virus. Dat wees orrig nödig, vörsichtig to sien, sä de Verbandsböverste Meidinger to de „Funke Mediengrupp“. Erst af een Inzidenz ünner 35 schall dat na sien Meen een Ünnerricht geven, de vör allen Schölern direktemang in de School aflöppt.

Biontech wull woll 54 Euro pro Impfsprütt hebben

Hamborg – Dat lange Verhanneln twüschen de EU un de Medzin-Ünnernehmen Biontech/Pfizer geiht villicht darop trüch, dat se hart över de Priesen verhannelt hebbt. As de NDR, WDR un Süddütsche Zeitung rutfunnen hebbt, hebbt de Ünnernehmen erst för een Impf-Sprütt rund 54 Euro foddert. In’n Vergliek to annern Anbotts weer dat een veel högerer Pries. Erst na langet Verhanneln weern se in’n November op een Brett kamen. De Pries schall so richtig nich na buten, man he liggt woll bi rund 16 Euro.

Gedenkfier in Hanau

Hanau – Mit een Gedenkfier wüllt se hüüt Abend in Hanau an de negen Minschen erinnern, de bi een rassistisch Anslag vör een Johr üm’t Leven kamen sünd. Plaant is, dat Vertreder vun de Minschen, de nablieven sünd, snackt – un buterdem ward Bunnespräsident Steinmeier wat seggen. Wegen de Corona-Pandemie köönt blots 50 Lüüd darbi ween. Vör een Johr harr in Hanau een 43-jöhriger Rechtsextremer negen Minschen ut rassistischen Grünnen dootschaten. Achterna hett he sien Mudder ümbröcht un sik sülfst.

Dat Weer

Un nu een Blick op dat Weer: an de Fischereehabenslüüs in Bremerhaben 4, an den Bremer Flegerhaben un op Spiekeroog 5 un in Deefholt sünd dat opstunns 6 Graad. Vundag is dat erst to’n Deel fründlich, to’n Deel wulkig un meist dröög. Later sett sik ok faken de Sünn gegen de Wulken dör – bi 8 bit 11 Graad. Tokamen Nacht is dat locker or dick wulkig un meist dröög. Dat Thermometer sackt op 5 bit 3 Graad. Morrn ward dat erst noch dick wulkig, later treckt de Wulken in Richt Elv un Nordsee af. Un denn lacht jümmer mehr de Sünn an’n Heben un Regen fallt nich, bi 13 bit 17 Graad. Sünndag ward woll de schönste Dag vun de Week: de Sünn schient un dat blifft dröög bi fröhlingshaften 13 bit 18 Graad.  Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Heidi Jürgens.