Keine Titelinformationen vorhanden!
  • Keine Titelinformationen vorhanden!

Plattdeutsche Nachrichten Plattdüütsche Narichten vun'n 18. Februar 2021

Plattdüütsche Narichten vun'n 18. Februar 2021

Audio vom 18. Februar 2021
Plattdeutsche Nachrichten
Bild: Radio Bremen

Facebook blockeert Weer- un Katastrofenwarnungen +++ Daimler: Pandemiejohr 2020 goot överstahn +++ Städerdag: Nich to veel vun Snelltests verwachten +++ Ok in Bremen jümmer mehr Fallen mit britscher Virusmutatschoon +++ Perzess wegen versöökten Moord +++ Dat Weer

Informationen zum Audio

Facebook blockeert Weer- un Katastrofenwarnungen

Canberra: De US-Konzern Facebook hett in Australien ünner annern Bescheden vun staatliche Internetseiten jüst so as Weer- un Katastrofenwarnungen blockeert, wiel se Striet üm en nee’es Mediengesetz hebbt. Dat hett ünner annern dorto föhrt, datt de austraalschen Behörden över Facebook nich vör drauhende Hochwater un Füer in Woolden un Büsch wahrschauen kunnen. Ok Henwiesen to de Corona-Pandemie hebbt se nich wieterstüern kunnt. De Minschenrechtsorganisatschoon „Human Rights Watch“ hett verkloort, datt dat skrupellos weer, den Togang to Informatschonen för dat Överleven aftosnieden.             

Daimler: Pandemiejohr 2020 goot överstahn

Stuttgart: De Auto- un Lastwagenboer Daimler hett dat Corona-Johr 2020 beter överstahn as se vermoden weern, un sett sik nu wedder högere Ziele. Vörstandsbaas Källenius geiht dorvun ut, datt Afsatz, Ümsatz un dat operative Ergebnis in dütt Johr noch beter sünd as in’t verleden Johr. 2020 hett Daimler ünner’n Streek en Gewinn vun 3,6 Milliarden Euro maakt, de op de Akschonäre fallt. Dat sünd 1,2 Milliarden Euro mehr as in’t Johr tovör.   

Städerdag: Nich to veel vun Snelltests verwachten

Berlin: De Gemeenden wahrschaut dorvör, datt’n sik to veel vun de Corona-Snelltests för ümsünst versprickt, de de Bund künnig maakt hett. De Düütsche Städer- un Gemeendebund hett verkloort, datt de Börgers nich dorvun utgahn schüllt, datt vun’n 1. Märzmaand an överall noog Tests op Lager sünd. Dat Verdelen vun de Tests an Millionen vun Minschen is en Mammutopgaav. De Städerdag will den Insatz vun de Snelltests dorüm pö a pö dörsetten. Toeerst schüllt dorbi de Kitas un Scholen an de Reeg ween.

Ok in Bremen jümmer mehr Fallen mit britscher Virusmutatschoon

Bremen: Ok in dat lüttste Bunnsland gahn jümmer mehr Corona-Infekschonen op de britsche Virusmutatschoon trüch. Nu sünd dat all tohoop 120 Fallen. Alleen güstern sünd 27 Corona-Infekschonen mit de britschen Mutatschoon vermellt worrn. Siet twee Weken kiekt se bi all de positiven Corona-Tests in Bremen genauer hen, wat se dör dat verännerte Virus utlöst worrn sünd.

Perzess wegen versöökten Moord

Bremen: Vör dat Bremer Landgericht steiht vun hüüt an en Autofohrer wegen versöökten Moord vör Gericht. He schall en Radfohrer na en Striet mit en Metz angrepen hebben. De Radfohrer harr in’t Bremer Steentor en Radweg bruukt, de mitten op de Straat twüschen de Stratenbahnschienen liggt. De Autofohrer harr dat Geföhl, datt de Radfohrer em rutfordern will un hett em na Utkunft vun de Polizei toeerst afdrängt. Achteran is de Autofohrer woll utstegen un hett den Mann mit en Metz angrepen un versehrt.   

Dat Weer

Un nu en Blick op dat Weer: In Willemshaben 5, in Noornham 6, an’n Bremer Flegerhaben 7, un in Bremerhaben un Ossenbrügge sünd dat opstünns 8 Graad. Hüüt wiest sik mang de Wulken ok af un an de Sünn. Middags un an’n fröhen Namiddag ward dat ok mal fründlich. To’n Avend hen kamen vun’t Ollenborger Münsterland her dichte Wulken mit nee’en Regen op. Dorto gifft dat Temperaturen twüschen 10 un 12 Graad. In de Nacht gifft dat eerst Regen. To’n Morgen hen blifft dat fakener dröög, un ok de Wulken lockern op. Dat Thermometer fallt op 4 bet 3 Graad. Morgen sünd eerst noch en poor Druppen mööglich. Achteran blifft dat aver gau dröög. Över Dag is dat mal fründlich, mal wulkig. Af un an schient ok de Sünn bi 8 bet 10 Graad.

Dat weern de Narichten op platt. Tohoopstellt hett se Ulrike Müller. Op Platt trechtmaakt un vörleest vun Marc Gelhart.