Jetzt läuft:

Scorpions Wind Of Change
  • Als nächstes läuft:

  • Um 17:35 Uhr läuft: Kim Wilde Cambodia
  • Jetzt läuft:

    Scorpions Wind Of Change
  • Davor lief:

  • Um> 17:21 Uhr lief: Madonna Hung Up
  • Um> 17:18 Uhr lief: The Hollies Bus Stop
  • Um> 17:14 Uhr lief: Nena Leuchtturm
  • Um> 17:11 Uhr lief: Johnny Wakelin In Zaire
  • Um> 16:56 Uhr lief: Owl City Fireflies
  • Um> 16:51 Uhr lief: Mike Oldfield & Maggie Reilly To France
  • Um> 16:47 Uhr lief: George Ezra Blame It On Me
  • Um> 16:43 Uhr lief: The Monkees I'm A Believer
  • Um> 16:37 Uhr lief: The Hooters Johnny B

Der Nachmittag mit Jörn Albrecht

Plattdeutsche Nachrichten Plattdüütsche Narichten vun'n 17. Februar 2021

Plattdüütsche Narichten vun'n 17. Februar 2021

Audio vom 17. Februar 2021
Plattdeutsche Nachrichten
Bild: Radio Bremen

Verleden Johr: Lüüd hebbt weniger verdeent +++ Impf-Steed in Bremen-Vegesack is apen +++ Krankenhuus-Baas blifft in sien Amt +++ Sizilien: Vulkan Ätna is utbraken+++ Sportplätz in Bremen un Bremerhaven kriegt LED-Flootlicht +++ Dat Weer

Informationen zum Audio

Verleden Johr: Lüüd hebbt weniger verdeent

Berlin: De Arbeitnehmers in Düütschland hebbt verleden Johr wegen Corona weniger verdeent – dat eerste Mal siet 2007. De Bruttoverdeenst is in’n Dörsnitt goot 0,6 Perzent weniger worrn. Dat hett dat Statistische Bunnsamt vermellt. Hier wiest sik, dat vele Lüüd Kortarbeit maakt hebbt. Sogor 2008/09 in dat Finanz-Slamassel weer de Verdeenst noch anstegen.

Impf-Steed in Bremen-Vegesack is apen

Bremen: In Vegesack hebbt se en Impf-Punkt inricht: in dat fröhere Hotel Strandlust. Dor köönt se eerstmal so wat 150 Lüüd an’n Dag impfen. Dat kann aver mehr warrn, weer ut dat Gesundheitsressort to hören. Bet nu kunnen sik Lüüd, de en Anrecht op Impfen hebbt, blots in de Messehall in de Binnenstadt impfen laten. In Bremerhaven impft se nu al siet dree Weken in de Stadthall. Ok in Neddersassen hebbt in de letzten Daag de Impfpunkten in de Kreisen jemehr Arbeit opnahmen.

Krankenhuus-Baas blifft in sien Amt

Emm: Ok na den Impf-Schandaal blifft de Baas vun den Klinikverbund Auerk-Emm-Nörden in sien Amt. Gegen den Geschäftsföhrer liggt en Klaag op’n Disch, seggt warrt, he harr för sik sülvst toeerst sorgt. Noch vör vele Dokters un Plegers harr he sik impfen laten. De Kreisdag in Auerk harr dorüm güstern seggt: De Mann schull ut sien Amt rut. Man jüst so veel to seggen hett in de Saak de Raat vun Emm. Un de will, dat de Mann wiedermaakt. En Gootachter schall ünnersöken, wat dor lopen is.

Sizilien: Vulkan Ätna is utbraken

Catania: Op de Insel Sizilien in den Süden vun Italien is de Ätna utbraken. An de süüd-ööstliche Siet vun den Vulkan hett dat güstern Avend eenmal böös rummst. Wat dor wat twei gahn is oder Minschen to Schaden kamen sünd, dat weet se bet nu nich. Op den internatschonalen Flegerhaven vun de Stadt Catania süüdlich vun den Ätna geiht vunwegen de Vulkanasch nix mehr. De Ätna is 3300 Meter hooch un de gröttste Vulkan in Europa, de mit Füer smitt.

Sportplätz in Bremen un Bremerhaven kriegt LED-Flootlicht

Bremerhaven: Op de öffentlichen Sportanlagen in’t Land Bremen stellt se dat Flootlicht op LED-Technik um. Dat spoort Stroom. De Sportdeputatschoon hett Ja seggt to en Plaan vun Sportsenatersch Stahmann. Düt Johr un tokamen Johr köönt se 2,2 Millionen Euro dorför utgeven. Dat Geld is ut dat Klimaschutzpaket vun den Senat.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Rotenborg 6 Graad, in Bremen un Emm sünd dat 7 Graad. Vundaag: Wulken över Wulken, blots kort mal kann dat wat heller warrn. Wenn de Morgenregen dör is, blifft dat en längere Tietlang dröög. Gegen Avend treckt denn vun Westen her mehr Regen ran. Dat Thermometer krabbelt op 7 bet 10 Graad. De Wind dorto weiht flau oder en beten mehr vun de süüdwesten Kant, in Böen ok frisch. Tokamen Nacht treckt de Regen na Oosten af, un de Wulkendeek kann ok mal oprieten. Hier un dor kann ok Daak opkamen. Bi 5 bet 3 Graad. Morgen: Wenn sik de Daak oplööst hett, mal dichte Wulken, mal Sünnschien. Eerst gegen Avend kummt vun de Ems her wedder Regen ran. Dat Ganze bi 10 bet 12 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.