Plattdeutsche Nachrichten Plattdüütsche Narichten vun'n 16. Februar 2021

Bremen will: All schüllt wedder na School

Bremen: De Senat will hüüt Vörmiddag besnacken, woans dat an de Scholen wiedergeiht. Dat lett: All Schölers mööt vun den 1. März op an wedder na School henkamen. In de Grundscholen schüllt de ganzen Klassen dor ween, mag ween mit en Dook vör’t Gesicht. För de högeren Klassen schall dat Wesselünnerricht geven mit een Part in de School un een Part to Huus. Wo dat in Bremerhaven so vele Corona-Kranke gifft, blifft dat dor ok för de Lütten woll noch bi Wesselünnerricht. Ok leggt de Senat vundaag fast, wat de Goornbedrieven – as in Neddersassen – wedder apen maken dröfft.

Wirtschaftsminister Altmaier snackt mit Wirtschaftsverbänn

Berlin: Bunnswirtschaftsminister Altmaier snackt hüüt Vörmiddag mit 40 Wirtschaftsverbänn över de Corona-Laag. Vör allen geiht dat dorüm, dat eerstmal allens op Null blifft, un üm Hölp för de Wirtschaft. Vörher al is veel bekriddelt worrn, dat de Staat dat Geld to laat utbetahlt. De Verbänn för de Inkoopsgeschäften, för Hotels un Gasthüüs un ok för Bomärkte wüllt weten, wannehr se wedder apen maken köönt.

Kreis Wersermasch: In de Nacht dröfft keeneen rut

Brake: In den Landkreis Wersermasch gellt för tominnst ene Week: Nachts dröfft keeneen ut’t Huus. Dat is wegen de velen Corona-Kranken. Minschen in den Kreis Wersermasch dröfft twüschen abends Klock negen un morgens Klock fief blots noch rut, wenn se en goden Grund hebbt. So’n Grund is, wenn een op’n Weg na de Arbeit is, na’n Dokter oder na en Minsch, de Hölp bruukt. Ok kann een in düsse Tiet för Deerten sorgen. In de Wersermasch steiht de Söven-Daag-Tall opstunns bi 254. In ganz Düütschland is de Tall blots noch grötter in Tirschenreuth an de Grenz na Tschechien.

Corona bi Ies-Fabrik in Ossenbrügge

Ossenbrügge: In de Ieskreem-Fabrik Froneri hebbt sik vele Minschen mit dat Corona-Virus ansteken. Vun de 850 Lüüd hebbt se dor tominnst 170 positiv test. Bi enige hebbt se den Typ B.1.1.7. faststellt, den se toeerst in Grootbritannien funnen hebbt un de sik veel gauer utbreden deit. All de annern Mitarbeiders sünd in Karanteen un warrt test. Dat Wark blifft op jeden Fall teihn Daag lang dicht.

De Europääsche Minschengerichtshoff

Straßborg: De Europääsche Minschengerichtshoff maakt hüüt Vörmiddag sien Ordeel bekannt wegen en NATO-Luftattack 2009 in Kundus in Afghanistan. De Fraag is: Is de düütsche Justiz kloor noog achter de Saak rangahn? En düütschen Oberst harr Order geven, twee Tanklastwagen antogriepen. Meist hunnert Minschen weren to Dode kamen, de meisten Zivilisten, dorbi ok vele Kinner. Klaagt harr en Vadder vun twee Jungs vun 8 un 12 Johr, de dorbi dootbleven sünd.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Kneten un Zeven överall 3 Graad. Vundaag: Dichte Wulken, eerst noch dakig-gries, un af un an kann dat ok mal pladdern oder spüttern. An’n Namiddag denn dröög, un vun Süden her ritt de Wulkendeek ok en beten wat op. Dat Thermometer krabbelt op 7 bet 10 Graad. De Wind dorto weiht flau oder en beten mehr vun de süden Kant. Tokamen Nacht: Dichte Wulken sleept mehr Regen ran. Gegen Morgen wedder dröger. Bi 7 bet 5 Graad. Morgen: Eerst Wulken un Regen. Över Dag denn aver doch dröög mit en beten Sünnschien. Gegen Avend treckt na Oostfreesland to wedder Regen op. In Bremen un umto blifft dat aver dröög. Dat Ganze bi 8 bet 10 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.