Plattdeutsche Nachrichten Plattdüütsche Narichten vun'n 21. November 2023

Finanzministerium sett den Huusholt op Stopp

Berlin – Finanzminister Lindner hett Deele vun’n Bunneshuusholt op Stopp sett. As dat Ministerium vermellt, dröfft de Fackrebeete erstmal keen Utgaven mehr planen, wenn dardör ok in nöchste Johr Kosten opkummt. Lindner deiht dat vunwegen dat Urdeel to’n Klimaputt ut de verleden Week, dör dat de Bund 60 Milliarden Euro weniger in’n Geldbüdel hett.

Islamsche Verbänne schüllt sik gegen Judenwoot stellen

Berlin – Bunnesbinnenministersche Faeser hett de islamschen Verbänne in Dütschland darto opropen, sik mehr gegen Judenwoot to stellen. Een Bispill weern de Freedagsgebete or dat Internet, in de so nöömten Sotschalen Medien. Hier wünscht se sik mehr Dütlichkeit un Klaarheit, sä Faeser vör de Islamkunferenz, de hüüt un morrn löppt.

Bremsche Evangelsche Kark respekteert, dat Kurschus ehrn Hoot nahmen hett

Bremen – De Bremsche Evangelsche Kark BEK beduert den Wessel bi dat Leit vun de Evangelsche Kark in Dütschland. Ehr Ratsvörsittersche Kurschus harr güstern ehrn Hoot nahmen. Ehr ward vörsmieten, se harr Johre vun’n Verdacht gegen een Karkmitarbeider wusst, de annere womööglich sexuell belästigt hett. Kurschus harr vör een sware Wahl stunnen, sä BEK-Schriftföhrer Kuschnerus.

Demorster Polizei scheet op Mann mit Axt

Demorst – In de Stadt hett de Polizei een Mann anschoten un swar versehrt. As de Polizei vermellt, harr he vördem in een Wahnhuus Krawall maakt un weer denn mit een Axt na buten gahn. Dar hett he mit de Axt op een Auto inslaan un hett een paar Beamte bedraut. Woso he dat daan hett, weet noch nümms.

Kaufland övernimmt Real-Markt in Stuhr

Stuhr – De Real-Markt in Stuhr ward bit to’n Enn vun’n März in’t tokamen Johr vun Kaufland övernahmen. Dardör kann de Bedreev in den Laden wietergahn, darmit so vele Jobs as mögelk sekert ward, vermellt Real. De Markt in Spaden in’n Kreis Cuxhaben ward dagegen dicht maakt. Tohoopnahmen maakt Real bunneswiet mehr as 60 Märkte dicht or övergevt se an annere, wiel dat Ünnernehmen in de Kniep is.

Dat Weer

Un nu een Blick op dat Weer: in Bremen, Bremerhaben un Deefholt 7 un op Wangerooge sünd dat opstunns 8 Graad. Vundaag is dat meist wulkig un vör allens in’t südliche Binnenland fallt erst noch Regen. Vun de Nordsee her lockert de Wulken ok mal op un de Sünn kann rutkieken. Meist hollt sik aver vele Wulken un later treckt wedder een beten Regen dör, bi 7 bit 9 Graad. Tokamen Nacht is dat meist överall dröög un dat lockert mehr op. Later treckt aver Nevel or hoger Nevel op, dat ward dütlich köhler as toletzt. Dat Thermometer sackt op 4 bit 1 Graad op de Eilanden un 0 bit minus 3 Graad in’t Binnenland. Morrn gifft dat kohle Morrnstunnen, hier un dar Nevel, Wulkenfeller un af un an kiekt mal de Sünn rut. An’n Namiddag kummt vun Nordwesten her Wulken op un vör allens an de Küst, in Ostfreesland un in’t nördliche Münsterland fallt een beten Regen, bi 3 bit 7 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.