Jetzt läuft:

The Rolling Stones Start Me Up
  • Jetzt läuft:

    The Rolling Stones Start Me Up
  • Davor lief:

  • Um> 15:51 Uhr lief: Cutting Crew I'Ve Been In Love Before
  • Um> 15:47 Uhr lief: Lionel Richie Hello
  • Um> 15:43 Uhr lief: Abba Angel Eyes
  • Um> 15:38 Uhr lief: BILLY IDOL Eyes Without A Face
  • Um> 15:34 Uhr lief: Ina Müller Ich Halt Die Luft An
  • Um> 15:32 Uhr lief: Jackie Wilson Higher And Higher
  • Um> 15:26 Uhr lief: Robbie Williams Rock Dj
  • Um> 15:23 Uhr lief: Styx Boat On The River
  • Um> 15:20 Uhr lief: The Cars You Might Think

Der Nachmittag mit Jörn Albrecht

Plattdeutsche Nachrichten Plattdüütsche Narichten vun'n 10. Februar 2021

Plattdüütsche Narichten vun'n 10. Februar 2021

Audio vom 10. Februar 2021
Plattdeutsche Nachrichten
Bild: Radio Bremen

Kanzleramt plaant woll dat allens op Null blifft bet Midde März +++ Inzidenz in Bremen sackt op siedsten Weert siet Anfang Oktober +++ Von der Leyen stellt sik achter den Impfkurs in´t EU-Parlament +++ Verfohren gegen Trump löppt wieder +++ Havareert Frachtschipp is in Sekerheit +++ Dat Weer

Informationen zum Audio

Kanzleramt plaant woll dat allens op Null blifft bet Midde März

Bremen – Dat Kanzleramt will woll de Oplagen, dat allens op null blifft, bet to´n 14. März wieder lopen laten. So steiht dat woll in de Vörlaag to´n besluten för den Bunn, maken verscheeden Medien künnig. Bavento schall dat dorno aver ok Utnahm geven: De Länner köönt sülvst besluten, of un wenehr se de Schoolen wedder apen maken. Putzbüdels dröfft dorno af 1. März ünner Oplagen wedder de Döörn opdoon. Dat Drepen twüschen Kanzlersch Merkel un den Ministerpräsidenten vun de Länner, wo se över de verscheden Stappen in de weltwiede Süük snacken wüllt, fangt an Namiddag an.

Inzidenz in Bremen sackt op siedsten Weert siet Anfang Oktober

Bremen – In dat Land Bremen sünd acht wiedere Minschen an or mit dat Corona-Virus sturven. Bavento mellen de Gesundheitsbehöörd 49 nee Corona-Fallen – all in de Stadt Bremen. De Inzidenzweert in Bremerhaven is to´n eersten Mal siet ene Week wedder rünner gahn – un twars düütlich, op knapp 138. In de Stadt Bremen is he ok daalsackt, op 59. So lütt weer he opletzt Anfang Oktober. In ganz Düütschland geiht de Tahl vun neen Infekschoon trööch. Dat Robert-Koch-Institut mellt binnen een Dag 8072 nee Fallen, goot
1600 weniger as vör ene Week.

Von der Leyen stellt sik achter den Impfkurs in´t EU-Parlament

Brüssel – EU-Kommischoonspräsidentsch von der Leyen snackt an´n Vörmiddag in dat Europaparlament över den Corona-Impfkurs. De Kommischoon kriggt vunwegen de knappen un veel to laaten Impfmiddel-Fracht böös Gegenwind. Von der Leyen hett opletzt togeven, dat se dat Problem vun de Massenproduktschoon verkehrt taxeert hett. De Europaafordneten wüllt nu Insicht in de Verdrääg hebben, de de EU mit de Impfmiddel-Hersteller afsluten hett. En poor hett de Kommisschoon al open leegt, to´n Deel aver mit swatt anmalten Steeden.

Verfohren gegen Trump löppt wieder

Washington – Dat Verfohren gegen den fröheren US-Präsidenten Trump, um em ut dat Amt rut to kriegen, löppt wieder. Dat hett de US-Senaat beslaten. Trumps Advokaaten harrn versöcht dat Verfohren to stoppen. Se meen dat stimmt mit de Verfaaten nich övereen, wiel Trump ja nich mehr in dat Amt is. Düssen Tosamenhang hett de gröttste Deel in den Senaat aver trööchwiest. Dormit kann vundaag de Debatt över de Anklaag losgahn. De Demokraaten smieten Trump ok för, dat he siene Anhänger hisst hett, Anfang Januar in dat Kapitol rintoplatzen.

Havareert Frachtschipp is in Sekerheit

Willemshaven – Twee Daag achteran op de Noordsee dat Frachtschipp „Peak Bilbao“ ut de Nedderlann havareert weer, is dat nu na Willemshaven sleppt worrn. Na dat Havareekommando Cuxhaven hett de Sleepfohrt mehrere Stünn anduert. Den acht Lüüd vun de Mannschaft geiht dat aver woll goot. Bi dat negentig Meters lange Frachtschipp gung an Sünndag in noorden vun de Eilannen Borkum un Juist de Motor twei – siet de Tiet kunnt dat Schipp nüms mehr stuern. De Frachter weer ünnerwegens vun Polen na England.

Dat Weer

Un nu kiekt wi op dat Weer: In Wilshusen hebbt wi opstunns veer Graad ünner Null, in Bremen, Bremerhaven, un Staad sünd dat överall dree Graad ünner Null. Vundaag wesseln sik vele Wulken un en beten Sünn af, mit dorbi en poor Sneeschuer, de aver nich överall rünnerkamen. De Wind weiht flau bet in Maaten, an de See frisch vun de noordoosten Kant. Dat Thermometer wiest us minus dree bet minus een Graad. In de Nacht is dat meist dröög, hier un dor noch en poor lütte Sneeflocken. De Wulken warrn weniger, af un an könnt wi de Steerns funkeln sehn. Dorum rusen de Temperaturen ok in Keller mit minus sess bet minus darteihn Graad. Morgen wannern jümmers mal en poor Wulken vörbi, meist seht wi aver de Sünn an Heven lachen, dorbi blifft dat meist dröög, an de See sünd verenkelt Schuer mööglich bi minus veer bet minus een Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.