Plattdeutsche Nachrichten Plattdüütsche Narichten vun'n 22. September 2023

US-Präsident Biden seggt de Ukraine noch mehr Hölp to

Washington. US-Präsident Biden hett den ukrainisch Präsidenten Selenskyj in dat Witte Huus to Gast kregen. Biden see, de USA weern dorför sorgen, dat de Welt an de Siet vun de Ukraine steiht. As dat amerikanisch Ministerium för Verdefenderen vermellt, wurrn de Ukraine noch mal Waffen un Utrüstung to´n Fechten in´n Wert vun üm un bi 325 Millionen Dollar toseggt. Selenskyji is wieldes na Kanada wiederreist.

China roopt dorto op de Waffen in de Ukraine rohen to laten

New York. In de Generaaldebatt vun de Vereenten Natschonen hett de Regerung vun China wedder verlangt, dat de Krieg in de Ukraine stantepee ophört. Viez-Präsident Han see, dat Enn vun den Krieg un de Opnahm vun Verhanneln över Freden is de eenzigst Möglichkeit dat Slamassel ut de Welt to bringen. China vermellt, dat dat Land in den Ukraine-Krieg vun Amts wegen unparteisch is. Man dat warrt seggt, dat China eng op de Siet vun Russland steiht.

Bremer Startenbahn AG brukt düütlich mehr Geld

De Bremer Startenbahn AG brukt düütlich mehr Geld vun dat Land Bremen as vermoden. Dat is güstern in den tostännigen Parlaments-Utschuss diskerert wurren. Dorna brukt de BSAG in dat lopen Geschäftsjohr statts 60 Millionen Euro knapp 98 Millionen vun dat Land. In dat tokamen Geschäftsjohr sünd dat sogor 125 Millionen. Dat is mehr as duppelt so veel as egentlich mal plant. As Grünn weern ünner annern de hogen Energiepriesen nöömt.

Bremer Binnenbehöörd will düchtiger gegen Falschparker vörgahn

Bremen. De Binnenbehöörd vun Bremen will bold düchtiger gegen illegal Parken in Bremen vörgahn. Teel is, op engen Straten Platz för Reddungsfohrtüüg to maken. Dat schall pö a pö passeren. Eerstmal will sick de Behöörd op en goods Dutzen Straten in den Stadtdelen Mitt un in de ööstlich Vörstadt konzentreeren. Lüüd, de verkehrt parken, kriegen dor eerstmal noch en geele Worschau-Kort, un eerst later en Straafgeld.

Eerstmal siet Johren wedder mehr Neeshöörn in Afrika

Johannesborg. In Afrika sünd dat eerste Mal siet mehr as thein Johr wedder mehr Neeshöörn tellt wurren. Dat hett de Weltnaturschutzunion mitdeelt. Dorna stieg de Tall op mehr as 23 dusend, dat sünd so üm un bi fief Perzent mehr as noch vör twee Johr. De Organisatschoon snackt vun en „gode Naricht“. De Aktschonen to´n Schutz in de verleden Maanden harrn goot klappt. Vörher harr vör all Wilddeveree den Bestand vun de Neeshöörn över Johrteihnten bannig lütter makt.

Dat Weer

Un nu noch en Blick op dat Weer: in Grodenkneten 13, in Bremen-Mitt 14 un in Bremerhaben un in Nienborg sünd dat opstunns 15 Graad. Hüüt fangt de Dag mit velen Wulken an. Över den Dag gifft dat denn en Wessel ut Sünnschien un Wulken. Hier un dor könen ok mal korte Schuer dörtrecken. De Wind weiht en beten, later in Maten bit frisch vun de Süüdwesten Kant mit starken bit stieven Böen. Dat Thermometer wiest 18 bit 20 Graad. In de Nacht is de Heven vull vun Wulken. An de Küst noch mehr Wulken mit en poor Schuern un mit Blitz un Donnerschlag. In´t Binnenland Wulken. Man mennigmal kann man de Sterns sehen. Dat blifft dröög. De Temperaturen gahn op negen bit 13 Graad torüch. Morn gifft dat en Wessel ut Sünnschien un Wulken. An´n Namiddag fangt dat in´t Binnenland düchtig an to pladdern. Hier un dor sünd Gewidder möglich. 16 bit 18 Graad stahn denn op dat Thermometer. Sünndag: Hier un dor is en beten Nevel. Man den ganzen Dag schient aver de Sünn mit en poor Wulken. Dat blifft dröög bi 17 bit 20 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.